ខេត្តតាកែវ ៖ នៅវេលាម៉ោង០៣និង៣០នាទីរសៀល ថ្ងៃទី១៧ ខែធ្នូ ឆ្នាំ២០១៧ ស្ថិតនៅភូមិព្រែស្លឹក ឃុំព្រែស្លឹក កម្លាំងនគរបាលស្រុកទ្រាំង បានឃាត់ខ្លួនជនសង្ស័យម្នាក់រួចកសាងសំណុំរឿងបញ្ជូនមកការិយាល័យព្រហ្មទណ្ឌធ្ងន់ខេត្ត…
ខេត្តតាកែវ ៖ នៅវេលាម៉ោង០៣និង៣០នាទីរសៀល ថ្ងៃទី១៧ ខែធ្នូ ឆ្នាំ២០១៧ ស្ថិតនៅភូមិព្រែស្លឹក ឃុំព្រែស្លឹក កម្លាំងនគរបាលស្រុកទ្រាំង បានឃាត់ខ្លួនជនសង្ស័យម្នាក់រួចកសាងសំណុំរឿងបញ្ជូនមកការិយាល័យព្រហ្មទណ្ឌធ្ងន់ខេត្ត ដើម្បីចាត់ការបន្ត ។ ខណៈពេលដែលជនសង្ស័យបានធ្វើសកម្មភាពយកដុំថ្មគប់ទៅលើជនរងគ្រោះ បណ្ដាលឲ្យរងរបួសធ្ងន់រួចក៏ស្លាប់នៅមន្ទីពេទ្យ ។
លោក ប៊ិច វណ្ណា អធិការរងនគរបាលស្រុកទ្រាំង បានឲ្យដឹងថា ជនសង្ស័យដែលត្រូវឃាត់ខ្លួននៅពេលនេះមានឈ្មោះ ម៉ែន សុវត្ថិ ភេទប្រុស អាយុ៣៩ឆ្នាំ រស់នៅភូមិព្រៃស្លឹក ឃុំព្រៃស្លឹក ស្រុកទ្រាំង ចំណែកជនរងគ្រោះមានឈ្មោះ សួន កែវ ភេទប្រុស អាយុ៥៧ឆ្នាំ រស់នៅភូមិឃុំជាមួយគ្នា ។
គួរំឭកផងដែរថា កាលពីវេលាម៉ោង០៨និង២៥នាទីថ្ងៃទី១៦ ខែធ្នូ ឆ្នាំ២០១៧ ជនរងគ្រោះត្រូវជាឪពុកក្មេករបស់ជនសង្ស័យ បានផឹកស្រាស្រវឹង រួចក៏យកដុំថ្មគប់ពាងទឹករបស់ជនសង្ស័យ បណ្ដាលឲ្យបែកមួយ រួចធ្វើឲ្យជនសង្ស័យជាកូនប្រសាបានខឹងយ៉ាងខ្លាំង ដោយតោងបានដុំថ្មគប់ទៅជនរងគ្រោះវិញ បណ្ដាលឲ្យរងរបួសធ្ងន់ រួចក៏បានស្លាប់នៅមន្ទីពេទ្យនៅភ្នំពេញ រួចក៏ដឹកសពមកធ្វើបុណ្យនៅឯភូមិវិញដែរ ។
នៅចំពោះមុខសមត្ថកិច្ច ជនសង្ស័យបានសារភាពថា រូបគាត់ពិតជាបានជ្រុលដៃយកដុំថ្មគប់ទៅលើឪពុកក្មេក បណ្ដាលឲ្យស្លាប់ពិតប្រាកត់មែន ។ លោកវរសេនីយ៍ឯក សែម សុជាតិ នាយការិយាល័យព្រហ្មទណ្ឌកំរិតធ្ងន់ខេត្ត បានឲ្យដឹងថា កម្លាំងសមត្ថកិច្ចបានកសាងសំណុំរឿងគ្រប់គ្រាន់អស់ហើយនៅរសៀលថ្ងែទី១៨ ខែធ្នូ ឆ្នាំ២០១៧ នេះ នឹងបញ្ជូនជនសង្ស័យទៅសាលាដំបូងខេត្តចាត់ការទៅតាមច្បាប់ ៕
ចែករំលែកព័តមាននេះ