ខេត្តប៉ៃលិន ៖ គេសង្កេតឃើញអាកាសធាតុនៅក្នុងក្រុងប៉ៃលិន មានការត្រជាក់ខ្លាំងខុសប្រក្រតី ដែលជាហេតុធ្វើឱ្យប្រជាពលរដ្ឋម្នាក់ស្ទើរតែមិនចង់ដើរចេញពីក្នុងផ្ទះកាលពីព្រឹកថ្ងៃទី១៨ ខែធ្នូ នេះ ។ ការត្រជាក់នេះ លាយឡំជាមួយនឹងខ្យល់បក់បោករំភើយៗ…
ខេត្តប៉ៃលិន ៖ គេសង្កេតឃើញអាកាសធាតុនៅក្នុងក្រុងប៉ៃលិន មានការត្រជាក់ខ្លាំងខុសប្រក្រតី ដែលជាហេតុធ្វើឱ្យប្រជាពលរដ្ឋម្នាក់ស្ទើរតែមិនចង់ដើរចេញពីក្នុងផ្ទះកាលពីព្រឹកថ្ងៃទី១៨ ខែធ្នូ នេះ ។ ការត្រជាក់នេះ លាយឡំជាមួយនឹងខ្យល់បក់បោករំភើយៗ មកពីទិសខាងជើងកាន់តែបន្ថែមឱ្យត្រជាក់ថែមទៀត ។ ហេតុការណ៍ត្រជាក់ខ្លាំងនេះ បានកើតឡើងតាំងពីយប់រំលងអធ្រាត្រឈានចូលថ្ងៃទី១៨ ខែធ្នូ ឆ្នាំ២០១៧ នៅទូទាំងខេត្តប៉ៃលិន ។
ប្រភពព័ត៌មានពីប្រជាពរដ្ឋរស់នៅក្នុងក្រុងប៉ៃលិនបានឱ្យដឹងថា ឈានចូលដល់ខែរំហើយនេះ អាកាសធាតុនៅក្នុងខេត្តប៉ៃលិនពិតជាត្រជាក់ជាងឆ្នាំមុនៗ ជាពិសេសនៅព្រឹកថ្ងៃទី១៨ ខែធ្នូនេះ ពិតជាត្រជាក់ខ្លាំង រហូតដល់ចាស់ៗមួយចំនួនមិនចង់ចេញពីផ្ទះនោះឡើយ ដោយមានរុំភួយ និងពាក់ខោអាវរងារគ្រប់ៗគ្នាតែម្តង ។
ចំណែកអាជីវករលក់ដូរនៅក្នុងផ្សារក៏មានសភាពខុសប្លែកដែរ អ្នកខ្លះត្រជាក់ខ្លាំងពេកចាប់ឥវ៉ាន់លក់ទាំងស្ពឹក និងរឹងដៃរឹងជើង តែមានប្រជាពលរដ្ឋចូលមកនាំគ្នាទិញម្ហូបអាហារដូចសព្វមួយដងដែរ ។
ពាក់ព័ន្ធទៅនឹងបញ្ហានេះ លោក ង៉ា លីហុង ប្រធានមន្ទីរធនធានទឹក និងឧត្តុនិយមខេត្តប៉ៃលិនបានឱ្យដឹងថា នៅព្រឹកថ្ងៃទី១៨ ខែធ្នូនេះ អាកាសធាតុពិតជាមានការត្រជាក់ជាងរាល់ថ្ងៃ ដោយវេលាម៉ោង៥និង០០នាទីព្រឹកថ្ងៃដដែលសីតុណ្ហភាពចុះដល់១៧ អង្សាសេ និងបន្តមកដល់វេលាម៉ោង៦និង០០នាទីសីតុណ្ហចុះរហូតដល់១៦.២អង្សាសេ ។ លោកបន្តទៀតថា ជារៀងរាល់ថ្ងៃសីតុណ្ហភាពត្រឹម២០អង្សាសេ ប៉ុន្តែនៅថ្ងៃនេះពិតជាមានការត្រជាក់ខ្លាំងគួរឱ្យកត់សម្គាល់ ហើយបើតាមព្យាករណ៍អាកាសធាតុរបស់ក្រសួងខេត្តមួយចំនួនត្រជាក់ខ្លាំង ។
លោកបញ្ជាក់ថា បន្តទៅថ្ងៃខាងមុខទៀត មិនដឹងជាអាកាសធាតុចុះត្រជាក់ជាងនេះ ឬឡើងកំដៅវិញ នោះទេ ដូច្នេះដោយសារអាកាសធាតុមានការប្រែប្រួលសូមឱ្យបងប្អូនប្រជាពលរដ្ឋទាំងចាស់ និងក្មេងយកចិត្តទុកដាក់ថែរក្សាសុខភាពរបស់ខ្លួនឱ្យបានល្អជៀសវាងកើតជម្ងឺផ្សេងៗ នាំឱ្យខាតបង់ថវិកាផងដែរ ៕
ចែករំលែកព័តមាននេះ