ខេត្តបាត់ដំបង ៖ សេចក្តីរាយការណ៍បឋមឱ្យដឹងថា មានការបង្ក្រាបគ្រឿងញៀន២ករណីផ្សេងគ្នា ប៉ុន្តែក្នុងថ្ងៃតែមួយ របស់កម្លាំងនគរបាលការិយាល័យជំនាញ ដោយដកហូតវត្ថុតាងគ្រឿងញៀនបានយ៉ាងច្រើន ។ ករណីទី១-ធ្វើឡើង កាលពីម៉ោង០១រសៀលថ្ងៃទី១៧ ធ្នូ ស្ថិតក្នុងភូមិព្រែកព្រះស្តេច សង្កាត់ព្រែកព្រះស្តេច ក្រុងបាត់ដំបង ។
ក្នុងនោះ កម្លាំងឃាត់ខ្លួនជនសង្ស័យចំនួន២នាក់ ១-ឈ្មោះ លី សីហា ភេទប្រុស អាយុ៣០ឆ្នាំ ជាកម្មករ មានទីលំនៅក្នុងភូមិ ដាំស្ពៃ សង្កាត់ ស្លាកែត ក្រុង បាត់ដំបង និង២-ឈ្មោះអួន ងិ ភេទប្រុស អាយុ២២ឆ្នាំ មានទីលំនៅក្នុងភូមិវត្តរំដួល សង្កាត់ចំការសំរោង ក្រុងបាត់ដំបង ។ រីឯគ្រឿងញៀនដកហូតបាន មានម៉ាទឹកកក៤កញ្ចប់ (ទម្ងន់២,៧០ក្រាម), គ្រឿងញៀនប្រភេទអ៊ិចស្តាស៊ី (ថ្នាំគ្រវីក្បាល)១០គ្រាប់, ទូរស័ព្ទដៃ៣ គ្រឿង និងម៉ូតូ១គ្រឿងផងដែរ ។
ដោយឡែក ករណីទី២-ធ្វើឡើងកាលពីវេលាម៉ោង០៣ និង៣៥នាទីរសៀលថ្ងៃដដែល ស្ថិតក្នុងភូមិនរា ឃុំនរាប ស្រុកសង្កែ ខេត្តបាត់ដំបង ឃាត់ខ្លួនជនសង្ស័យបានម្នាក់ ឈ្មោះលឹម ហាក់ស្រស់ ភេទស្រី អាយុ២៧ឆ្នាំ ទីលំនៅក្នុងភូមិវត្តលៀប សង្កាត់ចំការសំរោង ក្រុងបាត់ដំបង និងដកហូតបានគ្រឿងញៀនម៉ាទឹកកក១៥កញ្ចប់ (ទម្ងន់១៧៤ក្រាម), ទូរស័ព្ទដៃ២គ្រឿង, ម៉ូតូ១គ្រឿងម៉ាកឃ្លីក ពណ៌.ស ស្លាកលេខបាត់ដំបង 1M-9529 ។
បច្ចុប្បន្ន ជនសង្ស័យ រួមទាំងវត្ថុតាងទាំងអស់ ត្រូវបានបញ្ជូនទៅការិយាល័យជំនាញ ដើម្បីកសាងសំណុំរឿងបញ្ចូនទៅតុលាការ ។
ចែករំលែកព័តមាននេះ