ខេត្តបន្ទាយមានជ័យ ៖ សោកនាដកម្ម ដោយគ្រោះថ្នាក់ចរាចរណ៍លើទឹកដីថៃ ត្រឹមតែមួយថ្ងៃសោះមានពលករខ្មែរស្លាប់ និងរបួសជិត៣០នាក់ កើតឡើងកាលពីថ្ងៃទី១៤ ធ្នូ ដែលមួយករណីកើតឡើងនៅក្នុងស្រុកវ៉ាត់ថាណាណាក់ខន ខេត្តស្រះកែវ…
ខេត្តបន្ទាយមានជ័យ ៖ សោកនាដកម្ម ដោយគ្រោះថ្នាក់ចរាចរណ៍លើទឹកដីថៃ ត្រឹមតែមួយថ្ងៃសោះមានពលករខ្មែរស្លាប់ និងរបួសជិត៣០នាក់ កើតឡើងកាលពីថ្ងៃទី១៤ ធ្នូ ដែលមួយករណីកើតឡើងនៅក្នុងស្រុកវ៉ាត់ថាណាណាក់ខន ខេត្តស្រះកែវ វេលាម៉ោងជាង៩ព្រឹក ខណៈពលករខ្មែរ៥នាក់ ត្រឡប់មកពីតាមបណ្តាខេត្តនានាក្នុងប្រទេសថៃ ជិះរថយន្តធ្លាក់ផ្លូវបុកដើមឈើស្លាប់៣នាក់ របួសធ្ងន់ស្រាល២នាក់ ។
ដោយឡែកករណីគ្រោះថ្នាក់ចរាចរណ៍លើកទី២កើតឡើងនៅល្ងាចថ្ងៃដដែល(១៤ ធ្នូ) នៅក្នុងខេត្តឆាក់ឆឺនសៅ គឺពលករខ្មែរ២២នាក់ ជិះរថយន្តមួយគ្រឿងចេញពីព្រំដែនប្រុងទៅតាមបណ្តាខេត្តក្នុងប្រទេសថៃ ក៏ជួបគ្រោះអកុសលមិនទាន់ដល់គោលដៅផង រថយន្តធ្លាក់ផ្លូវក្រឡាប់ផ្ងារកង់ចូលក្នុងទឹកបណ្តាលឲ្យស្លាប់៤នាក់ និងរបួសជិត២០នាក់ផ្សេងទៀត ។
ជុំវិញករណីទី១ សាកសពនិងអ្នករបួសត្រូវបានមន្ត្រីកម្ពុជាសហការជាមួយអាជ្ញាធរ និងសមត្ថកិច្ចពាក់ព័ន្ធថៃ ធ្វើការបញ្ជូនមកកម្ពុជាតាមច្រកទ្វារអន្តរជាតិប៉ោយប៉ែតរួចហើយ ។ ចំណែកករណីគ្រោះថ្នាក់ចរាចរណ៍លើកទី២នៅខេត្តឆាក់ឆឺនសៅ ត្រូវបានមន្ត្រីការិយាល័យទំនាក់ទំនងព្រំដែនកម្ពុជា-ថៃ ប្រាប់តាមទូរស័ព្ទនៅព្រឹកថ្ងៃទី១៧ ធ្នូថា ពិតជាកើតមានមែនដោយបញ្ជាក់ថាពលករទាំងនោះទើបឆ្លនដែនដោយខុសច្បាប់ចេញពីកម្ពុជាចំនួន២២នាក់ មានស្លាប់៤នាក់ សង្ស័យដោយសារឈ្លក់ទឹក និងរងរបួសធ្ងន់ស្រាលជិត២០នាក់ផ្សេងទៀត ។
ប្រភពដាច់ដោយឡែកមួយទៀតប្រាប់ថា ក្នុងចំណោមជនរងគ្រោះនៅខេត្តឆាក់ឆឺនសៅនោះ មានប្រុសស្រី២នាក់ ទើបរៀបការ ហើយនាំគ្នាទៅថៃ ដែលករណីនេះស្រដៀងគ្នាទៅនឹងករណីគ្រោះថ្នាក់លើកទី១ នៅខេត្តស្រះកែវ គឺក្នុងចំណោមជនរងគ្រោះស្លាប់របួស៥នាក់ មានខ្មែរអ៊ិស្លាម២នាក់ជាគូដណ្តឹងនឹងគ្នាត្រូវវិលមករៀបអាពាហ៍ពិពាហ៍ បែរជាជួបគ្រោះអកុសលស្លាប់បុរសជាគូដណ្តឹង ឯភាគីខាងស្រីរងរបួសស្រាលប៉ុណ្ណោះ ។
យ៉ាងណាក៏ដោយ ករណីគ្រោះថ្នាក់នៅខេត្តឆាក់ឆឺនសៅ គេពុំទាន់ស្គាល់អត្តសញ្ញាណនៅឡើយ ហើយមន្ត្រីទំនាក់ទំនងព្រំដែនកម្ពុជាថៃ អះអាងថា ខាងស្ថានទូតកំពុងរត់ការឯកសារជួយដល់ក្រុមគ្រួសារជនរងគ្រោះទាំងនោះហើយ ។
ចែករំលែកព័តមាននេះ