ខេត្តកំពត ៖ កម្លាំងសមត្ថកិច្ចអធិការដ្ឋាននគរបាលស្រុកឈូក បានសហការជាមួយកម្លាំងអន្តរាគមន៍ឈុតខ្មៅ និងនគរបាលការិយាល័យប្រឆាំងបទល្មើសគ្រឿងញៀន ដឹកនាំដោយលោកវរសេនីយ៍ទោ លក ញ៉ាវ នាយការិយាល័យព្រហ្មទណ្ឌកំរិតស្រាលស្នងការដ្ឋានខេត្ត បានចុះបង្ក្រាបទីតាំងចែកចាយ…
ខេត្តកំពត ៖ កម្លាំងសមត្ថកិច្ចអធិការដ្ឋាននគរបាលស្រុកឈូក បានសហការជាមួយកម្លាំងអន្តរាគមន៍ឈុតខ្មៅ និងនគរបាលការិយាល័យប្រឆាំងបទល្មើសគ្រឿងញៀន ដឹកនាំដោយលោកវរសេនីយ៍ទោ លក ញ៉ាវ នាយការិយាល័យព្រហ្មទណ្ឌកំរិតស្រាលស្នងការដ្ឋានខេត្ត បានចុះបង្ក្រាបទីតាំងចែកចាយ និងជួញដូរគ្រឿងញៀនមួយកន្លែង ព្រមទាំងឃាត់ខ្លួនជនសង្ស័យ២នាក់ប្តីប្រពន្ធ កាលពីវេលាម៉ោង១២និង២០នាទីថ្ងៃត្រង់ ថ្ងៃទីទី១៦ ខែធ្នូ ឆ្នាំ២០១៧ នៅចំណុចភូមិពោធិដុះ ឃុំបឹងនិមល ស្រុកឈូក ខេត្តកំពត។
ជនសង្ស័យទាំងពីរនាក់នេះ ប្តីឈ្មោះ ធន់ ភារ៉ា ហៅដូច អាយុ២៤ឆ្នាំ មុខរបរមិនពិតប្រាកដ និងប្រពន្ធឈ្មោះ ប៉ុន មុំ អាយុ២០ឆ្នាំ អ្នកទាំងពីររស់នៅភូមិក្រសាំង ឃុំឈូក ស្រុកឈូក។
លោកវរសេនីយ៍ទោ លក ញ៉ាវ បានឲ្យដឹងថា ដោយមានការបញ្ជាពីលោកឧត្តមសេនីយ៍ទោ និងមានការសំរួលពីព្រះរាជអាជ្ញាអមសាលាដំបូងខេត្ត ក៏បានចុះបង្ក្រាបទីតាំងជួញដូរ និងចែកចាយគ្រឿងញៀនមួយកន្លែងនៅចំណុចភូមិ-ឃុំខាងលើ។ ហើយប្រតិបត្តិការជាក់ស្តែងខាងលើនេះ កម្លាំងសមត្ថកិច្ចយើងបានឃាត់ខ្លួនជនសង្ស័យពីរនាក់ប្តីប្រពន្ធ រួមនឹងវត្ថុតាងថ្នាំញៀនប្រភេទម្សៅថ្លាក្រាម (ម៉ាទឹកកក) ចំនួន៥កញ្ចប់ ក្នុងនោះមានមួយកញ្ចប់ធំ ។
លោកវរសេនីយ៍ទោបានឱ្យដឹងទៀតថា ជនសង្ស័យទាំងពីរត្រូវបានកម្លាំងអន្តរាគមន៍ពិសេសនាំមកកាន់ស្នងការដ្ឋានខេត្ត ដើម្បីធ្វើការសាកសួរ និងកសាងសំណុំរឿងបញ្ជូនទៅតុលាការចាត់ការតាមនីតិវិធីនៃច្បាប់៕
ចែករំលែកព័តមាននេះ