ខេត្តបន្ទាយមានជ័យ ៖ ព្រោះតែភាពក្រីក្រ និងដើម្បីក្រពះ ! មួយរយៈចុងក្រោយនេះ គេសង្គេតឃើញក្រុមពលករខ្មែរដែលឆ្លងព្រំដែនខុសច្បាប់ទៅរកការងារធ្វើលើទឹកដីថៃ ហាក់ហ៊ានពេកហើយ បង្ខំចិត្តឡើងតាមរបង និងដំបូលផ្សាររុងក្លឿចូលទៅដីថៃនាពេលកន្លងមក និងរសៀលម្សិលមិញថ្ងៃទី១៥ ខែធ្នូ ឆ្នាំ២០១៧ នេះ ដែលក្រុមពលករខ្មែរលូនតាមរន្ធដីក្រោមរបងដើម្បីឆ្លងចូលទៅដីថៃ ចំណុចផ្សាររុងក្លឿដូចគ្នា ប៉ុន្តែស៊យធំ ប៉ះចំនគរបាលអន្តោប្រវេសន៌ និងទាហានឈុតខ្មៅថៃប្រចាំនៅច្រកទ្វារអន្តរជាតិខ្លងលឹក ស្រុកអារញ្ញ ចាប់បានជាបន្តបន្ទាប់ ។
ពលករខុសច្បាប់ដែលសមត្ថកិច្ចចាប់បានកាលពីរសៀលថ្ងៃទី១៥ ម្សិលមិញ មានចំនួន៥នាក់ ស្រីម្នាក់ ប៉ុន្តែគេពុំស្គាល់អត្តសញ្ញាណពលករទាំងនេះថាមកពីស្រុកខេត្តណានោះទេ ។ ព្រោះត្រូវបានសមត្ថកិច្ចថៃចាប់គេយកទៅសួរនាំបាត់ ។
ប្រភពថា ពលករទាំងនេះឆ្លងទៅប្រទេសថៃតាមរន្ធដីមួយដែលជីកដោយក្រុមមេខ្យល់ ហើយរូងដីនោះនៅពីក្រោមរបងថ្មជាប់ព្រំដែនខាងត្បូងចំណតរថយន្ត នៃផ្សាររុងក្លឿ ។
យោងតាមកាសួរនាំពលករទាំងនេះ ប្រាប់សមត្ថកិច្ចថៃថា ពួកគេចេញពីកម្ពុជាតាមរយៈមេខ្យល់ ហើយគេឲ្យលូនតាមរន្ធដីខាងលើ ដោយយកប្រាក់ម្នាក់៧០០បាតថៃ ដឹងអីពេលលូនដល់ខាងដីថៃស្រាប់តែមានសមត្ថកិច្ចឈរចាំចាប់ជាស្រេច ។
សមត្ថកិច្ចថៃប្រាប់ថា ពលករទាំង៥នាក់ ក្រោយសាកសួរ និងធ្វើកំណត់ហេតុរួច បានដឹកបញ្ជូនត្រលប់មកកម្ពុជាវិញហើយ ។
គួរបញ្ជាក់ថា កន្លងមកក៏មានពលករ១ក្រុមធ្លាប់ចាញ់បោកមេខ្យល់ឲ្យឆ្លងព្រំដែនខុសច្បាប់ដោយឲ្យឡើងតាមរបង និងដំបូលផ្សាររុងក្លឿ ហើយគ្រានោះលើដំបូលក៏មានទាំងបន្លាលួស ហើយក្រោយចុះដល់ដីសមត្ថកិច្ចថៃចាំចាប់បញ្ជូនត្រលប់មកកម្ពុជាដូចគ្នា ៕
ចែករំលែកព័តមាននេះ