ខេត្តបន្ទាយមានជ័យ ៖ ផ្លូវដើរជាប់គល់ស្ពានមិត្តភាពកម្ពុជាថៃ នៃច្រកទ្វារអន្តរជាតិប៉ោយប៉ែត (ខាងកម្ពុជា) ក្លាយជាកន្លែងផ្សព្វផ្សាយលក់បារីធ្វើឲ្យប៉ះពាល់ដល់អ្នកដំណើរជាតិ និងអន្តរជាតិឆ្លងកាត់ជារៀងរាល់ព្រឹក ខណៈក្រុមអ្នកឈរផ្សព្វផ្សាយនោះមានហាងលក់យ៉ាងត្រឹមត្រូវទៅហើយ ។
មុខហាងលក់ស្រា បារី និងភេសជ្ជៈ ចំណុចអតីតអគារចល័ត្រចំនួន៤ជាប់គល់ស្ពានព្រំដែនខាងលើ គេឃើញមានមនុស្សស្រីប្រុសឈរលក់បារី មានហុចមានហៅកន្លែងមួយមានទាំងលើកយីហោ៣៣៣ និយាយទាំងភាសារថៃផងនោះ ទំនងប្រជែងគ្នាដើម្បីអូសទាញយកអតិថិជនឲ្យជួយទិញទំនិញរៀងខ្លួនៗ ដោយមិនខ្វល់ពីផលប៉ះពាល់សណ្តាប់ធ្នាប់ ការកកស្ទះជើងដំណើរអ្នកឆ្លងកាត់ និងការរិះគន់ពីគ្រប់មជ្ឈដ្ឋានឡើយ ។
អ្នកឃើញហេតុការលើកឡើងថា ហេតុអ្វីម្ចាស់ហាងលក់ស្រា បារី និងភេសជ្ជៈទាំងនេះចាំបាច់ដាក់តាំងបារីលក់ និងឈរផ្សព្វផ្សាយខាងមុខហាងទៀត បើហាងសុទ្ធតែមានលក់គ្រប់គ្នាយ៉ាងត្រឹមត្រូវទៅហើយនោះ ។ ឬជាការលក់ប្រជែងគ្នា? ករណីនេះប្រភពពីសមត្ថកិច្ចនៅមាត់ច្រកទ្វារអន្តរជាតិប៉ោយប៉ែតអះអាងថា កើតមានជិត១ឆ្នាំមកហើយ ប៉ុន្តែការឈរផ្សព្វផ្សាយលក់បារីនេះគេធ្វើឡើងចាប់ពីពេលបើកទ្វារព្រំដែនម៉ោង០៦ព្រឹក ដល់ម៉ោង០៨និង៣០នាទីព្រឹក តែប៉ុណ្ណោះ ក្រៅពីនេះគឺគេលក់ក្នុងហាងជាធម្មតា ។
ប្រភពពីសមត្ថកិច្ចដដែលអះអាងថា ទើសភ្នែកខ្លាំងណាស់ ព្រោះពេលខ្លះកកស្ទះភ្ញៀវឆ្លងកាត់កកកុញ ហើយថាបានប្រាប់ជាច្រើនដងឲ្យផ្អាកការផ្សព្វផ្សាយ ឬលក់បារីបែបនេះ ប៉ុន្តែពួកគេមិនស្តាប់ឡើយ ។ ប្រភពដដែលបានបញ្ជាក់ច្បាស់ងថាមានម្ចាស់ហាងចំនួន២ជាសមត្ថកិច្ច ។
បញ្ហាខាងលើម្ចាស់ហាងដែលមានកម្មករកាន់យីហោលេខ៣៣៣ ប្រាប់ថា បើមានការរិះគន់ពីមជ្ឈដ្ឋាននានាលោកនឹងឲ្យកម្មករផ្អាក់ពីថ្ងៃស្អែកមិនឲ្យកើតមានតទៅទៀតទេ ខណៈម្ចាស់ហាងមួយចំនួនទៀត មិនអាចទាក់ទងសុំកាបំភ្លឺបានព្រោះមិនស្គាល់លេខទូរស័ព្ទ ។
ទោះជាបែបនេះក្តី គេគិតថាបើហាងផ្សេងៗនៅតែបន្តលក់ការកកស្ទះពិសេសការរិះគន់ និងនៅតែកើតមានដដែល ដូច្នេះអាជ្ញាធរ និងសមត្ថកិច្ចច្រកទ្វារអន្តរជាតិមួយនេះ គួរមានវិធានការលើបញ្ហានេះផង ។
លោក វួច អូន ប្រធានស្នាក់ការត្រួតពិនិត្យព្រំដែនច្រកទ្វារអន្តរជាតិប៉ោយប៉ែត មិនអាចទាក់ទងសុំការបំភ្លឺបានទេ ដោយទូរស័ព្ទរបស់លោកចុចមិនចូលហើយ ក្រុមការងាររបស់លោកប្រាប់ថា លោកមានធុរៈរវល់រៀបមង្គលការកូន ៕
ចែករំលែកព័តមាននេះ