ខេត្តប៉ៃលិន ៖ បុរសចំណាស់ម្នាក់បានស្លាប់ភ្លាមៗនៅនឹងកន្លែង ខណ:កំពុងអង្គុយហូបបាយសុខៗ ស្រាប់តែជនសង្ស័យម្នាក់បានទាញយកកាំបិតចិតបន្លែចុងស្រួចស្ទុះទៅចាក់ចំឆ្អឹងជំនីផ្នែកខាងឆ្វេង (ដោះ) ចំនួន២កាំបិត បណ្តាលឱ្យដេកដួលស្លាប់ក្នុងថ្លុកឈាម ដោយសារតែទាស់ពាក្យសម្តីបន្តិចបន្តួចរវាងគ្នានឹងគ្នា ។…
ខេត្តប៉ៃលិន ៖ បុរសចំណាស់ម្នាក់បានស្លាប់ភ្លាមៗនៅនឹងកន្លែង ខណ:កំពុងអង្គុយហូបបាយសុខៗ ស្រាប់តែជនសង្ស័យម្នាក់បានទាញយកកាំបិតចិតបន្លែចុងស្រួចស្ទុះទៅចាក់ចំឆ្អឹងជំនីផ្នែកខាងឆ្វេង (ដោះ) ចំនួន២កាំបិត បណ្តាលឱ្យដេកដួលស្លាប់ក្នុងថ្លុកឈាម ដោយសារតែទាស់ពាក្យសម្តីបន្តិចបន្តួចរវាងគ្នានឹងគ្នា ។ ក្រោយចាក់សម្លាប់បុរសរងគ្រោះរួច ជនសង្ស័យបានដាក់មេប្រូចរត់គេចខ្លួនបាត់ស្រមោល ហើយនគរបាលកំពុងតាមប្រមាញ់ ។
ហេតុការណ៍នេះ បានកើតឡើងនៅវេលាម៉ោង០៩និង៤៥នាទីយប់ ថ្ងៃទី១៥ ខែធ្នូ ឆ្នាំ២០១៧ ត្រង់ចំណុចវត្តព្រៃសន្ទះ ក្នុងភូមិព្រៃសន្ទះ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។
ប្រភពព័ត៌មានបានឱ្យដឹងថា ជនរងគ្រោះមានឈ្មោះ រដ្ឋ បញ្ញា ភេទប្រុស អាយុ៥៤ឆ្នាំ ជាជាងសំណង់ មានទីលំនៅក្នុងភូមិបឹងត្រគួន ឃុំឃ្លាំងមាស ស្រុកបវេល ខេត្តបាត់ដំបង ។ ចំណែកជនសង្ស័យមានឈ្មោះ ថុង សុខុម ភេទប្រុស អាយុ២៧ឆ្នាំ មុខរបរមិនពិតប្រាកដ មានទីលំនៅភូមិព្រៃសន្ទះ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។
ប្រភពបន្តទៀតថា មុនពេលកើតហេតុ ជនរងគ្រោះ និងជនសង្ស័យបានឈ្លោះទាស់ទែងពាក្យសម្តីរវាងគ្នានឹងគ្នា បន្ទាប់ពីផឹកស្រាស្រវឹង ។ ពេលនោះជនសង្ស័យបានចងគំនុំនៅក្នុងចិត្តជានិច្ច លុះមានឱកាសល្អ ខណ:ឃើញជនរងគ្រោះកំពុងអង្គុយហូបបាយម្នាក់ឯង ស្រាប់តែទាញយកកូនកាំបិតចិតបន្លែចុងស្រួច ចាក់ពេញទំហឹង ទៅលើជនរងគ្រោះចំនួន២កាំបិត ត្រង់កន្លែងក្រោមដោះខាងឆ្វេង បណ្ដាលឲ្យប្រកាច់ស្លាប់ភ្លាមៗនៅនឹងកន្លែងតែម្តង ។
ក្រោយពីធ្វើសកម្មភាពចាក់ទៅលើជនរងគ្រោះរួច ជនសង្ស័យក៏បានគេចខ្លួនបាត់ស្រមោល ។ពាក់ព័ន្ធនឹងបញ្ហានេះ នគរបាលកំពុងតាមស្រាវជ្រាវ ដើម្បីចាប់យកមកផ្តន្ទទោសតាមផ្លូវច្បាប់ ។ ចំណែកជនរងគ្រោះ ត្រូវបានក្រុមគ្រួសារយកទៅរៀបចំធ្វើបុណ្យតាមប្រពៃណី ៕
ចែករំលែកព័តមាននេះ