ខេត្តពោធិ៍សាត់ ៖ ឧបករណ៍ឆក់ត្រីចំនួន១១៩គ្រឿងបានធ្វើពិធីដុតកម្ទេចចោលនៅចំពោះមុខលោកម៉ៅ ធនិនអភិបាលនៃគណអភិបាលខេត្តពោធិ៍សាត់កាលពីថ្ងៃទី១៤ ខែធ្នូ ឆ្នាំ២០១៧ នៅក្នុងបរិវេណសាលាឃុំរំលេចស្រុកបាកាន ។ លោកម៉ៅ ធនិនបានឲ្យដឹងថា…
ខេត្តពោធិ៍សាត់ ៖ ឧបករណ៍ឆក់ត្រីចំនួន១១៩គ្រឿងបានធ្វើពិធីដុតកម្ទេចចោលនៅចំពោះមុខលោកម៉ៅ ធនិនអភិបាលនៃគណអភិបាលខេត្តពោធិ៍សាត់កាលពីថ្ងៃទី១៤ ខែធ្នូ ឆ្នាំ២០១៧ នៅក្នុងបរិវេណសាលាឃុំរំលេចស្រុកបាកាន ។
លោកម៉ៅ ធនិនបានឲ្យដឹងថា ការធ្វើនេសាទដោយប្រើប្រាស់ឧបករណ៍ឆក់ត្រីពិសេសឧបករណ៍នេសាទខុសច្បាប់ គឺវាបំផ្លិចបំផ្លាញធនធានជលផលយ៉ាងធ្ងន់ធ្ងរ គឺបណ្តាលឲ្យប៉ះពាល់ទាំងត្រីធំ និងត្រីតូចដែលទាមទារឲ្យមានកិច្ចសហការរវាងសមត្ថកិច្ចជំនាញជាមួយអាជ្ញាធរដែនដីគ្រប់លំដាប់ថ្នាក់ កងកម្លាំងប្រដាប់អាវុធទាំងបីប្រភេទ ព្រមទាំងប្រជាពលរដ្ឋទើបការទប់ស្កាត់ និងបង្ក្រាបបទល្មើសខាងលើទទួលបានជោគជ័យ និងមានប្រសិទ្ធភាពខ្ពស់ ។ បន្ទាប់ពីទទួលបានសំណូមពរ និងការលើកឡើងរបស់ប្រជាពលរដ្ឋក៏ដូចជាតំណាងមេភូមិ លោកក៏ដាក់ចេញនូវវិធានការឲ្យអាជ្ញាធរស្រុកមេឃុំ មេភូមិ និងកម្លាំងមានសមត្ថកិច្ច ចាត់ការតាមផ្លូវច្បាប់ ចំពោះអ្នកលក់ឧបករណ៍នេសាទខុសច្បាប់ និងត្រូវបញ្ឈប់ការប្រើប្រាស់ឧបករណ៍ឆក់ចាប់ពីពេលនេះតទៅ ។
លោកបានបន្ថែមទៀតថា បើទោះបីជាបងប្អូនមានឈ្មោះនៅប៉ុស្តិ៍ពីមុនមកក្តី ប៉ុន្តែអីឡូវនេះបងប្អូនយើងបានយល់ដឹង និងស្ម័គ្រចិត្តប្រគល់ឧបករណ៍ឆក់ឲ្យអាជ្ញាធរ និងសមត្ថកិច្ចដោយខ្លួនឯងរួចរាល់ហើយនោះលោកនឹងលើកលែងទោសកំហុសឲ្យ តែបើនៅតែរឹងទទឹងល្មើសនឹងច្បាប់ជលផល នឹងត្រូវចាត់វិធានការតាមផ្លូវច្បាប់ ដោយគ្មានការលើកលែង ។ លោកអភិបាលខេត្តបានអំពាវនាវដល់បងប្អូនប្រជាពលរដ្ឋ ត្រូវចូលរួមសហការគ្នាក្នុងការអនុវត្តគោលនយោបាយ ភូមិ ឃុំ មានសុវត្ថិភាពទាំង៩ចំណុច និងគោរពច្បាប់ចរាចរណ៍ឲ្យបានទាំងអស់គ្នា ។
បងប្អូនប្រជាពលរដ្ឋបានសន្យាថា នឹងចូលរួមជាមួយអាជ្ញាធរ និងមន្ត្រីជលផល បញ្ឈប់នូវសកម្មភាពរបស់ខ្លួនក្នុងការប្រើឧបករណ៍ឆក់ ងាកមកប្រើឧបករណ៍បុរាណវិញ ។
លោក ម៉ៅ ធនិនបានចែកជូនវត្ថុកំដរដៃអ្នកចូលរួមជិត៣០០នាក់ ក្នុងម្នាក់ៗទទួលបាន សារុង១ និងថវិកា២ម៉ឺនរៀល មេភូមិ និងប្រជាការពារ ទាំង១៣ភូមិ ក្នុងមួយភូមិទទួលបាន វិទ្យុទាក់ទង២គ្រឿង និងថវិកា៤ម៉ឺនរៀល និងប៉ុស្តិ៍នគរបាលរដ្ឋបាលរំលេចទទួលបាន វិទ្យុទាក់ទង៤គ្រឿង បុគ្គលិកមណ្ឌលសុខភាពរំលេច៧នាក់ ម្នាក់សារុង២ផងដែរ ៕
ចែករំលែកព័តមាននេះ