រាជធានីភ្នំពេញ៖ ជាការអបអរសាទរខួប ៦២ ឆ្នាំ ដែលកម្ពុជាបានចូលជាសមាជិកអង្គការសហប្រជាជាតិ (UN) សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានឱ្យដឹងថា ប្រទេសកម្ពុជាបានចូលរួមយ៉ាងសកម្មនៅក្នុងសកម្មភាពថែរក្សាសន្តិភាព ស្ថេរភាពដែលក្នុងរយៈពេល១១ឆ្នាំនេះ កម្ពុជារបស់យើងបានបញ្ជូនកងទ័ពមួកខៀវទៅក្រៅប្រទេសបានចំនួនជិត ៥,០០០នាក់ ក្នុងនោះកងទ័ពជាស្ត្រីមាន ២០២នាក់។
សម្តេចបានបន្តថា កន្លងមក កម្ពុជាបានបញ្ជូនកងទ័ពមួកខៀវទៅ៨ប្រទេស រួមមានស៊ូដង់ ស៊ូដង់ខាងត្បូង លីបង់ អាហ្វ្រិកកណ្តាល ស៊ីរី សាយប្រឹស ម៉ាលី និងប្រទេសឆាត។ សម្តេចបានសរសេរសារក្នុងគណនីយហ្វេសប៊ុក ចូលរួមអបអរសាទរខួប ៦២ ឆ្នាំនេះ ហើយបានពន្យល់មហាជនឱ្យបានដឹងថា អង្គការសហប្រជាជាតិ អ.ស.ប (United Nations-UN) គឺជាអង្គការអន្តរជាតិដែលធំជាងគេបំផុតក្នុងពិភពលោក ត្រូវបានបង្កើតឡើងតាំងពីថ្ងៃទី ២៤ ខែ តុលា ឆ្នាំ ១៩៤៥ ក្រោយសង្គ្រាមលោកលើកទី២ ត្រូវបានបញ្ចប់ (១៩៣៩-១៩៤៥)។ មកទល់បច្ចុប្បន្ននេះ អង្គការ UN មានរដ្ឋជាសមាជិករហូតដល់ទៅ១៩៣ប្រទេស ដែលក្នុងនោះប្រទេសកម្ពុជាក៏ជាសមាជិកមួយដែរ។ កម្ពុជាបានចូលជាសមាជិក UN នៅថ្ងៃទី ១៤ ខែ ធ្នូ ឆ្នាំ ១៩៥៥ គឺ១០ឆ្នាំក្រោយពីការបង្កើត UN។
គោលបំណង UN គឺការថែរក្សាសន្តិភាព និងសន្តិសុខអន្តរជាតិ លើកស្ទួយសហប្រតិបត្តិការអន្តរជាតិក្រោមច្បាប់អន្តរជាតិ អភិវឌ្ឍផ្នែកសេដ្ឋកិច្ច ចូលរួមអន្តរាគមន៍ដោះស្រាយជម្លោះរវាងរដ្ឋជាសមាជិក និងបញ្ចៀសមិនអោយមានសង្គ្រាមលោក។
សម្តេចបានបន្ថែមថា៖ «កងកម្លាំងទ័ពមួកខៀវកម្ពុជា ជាកម្លាំងជំនាញ ផ្នែកវិស្វកម្ម កម្លាំងពេទ្យកម្រិត២ កម្លាំងបោសសម្អាតមីន កម្លាំងអាវុធហត្ថ និងកម្លាំងកម្ទេចយុទ្ធភ័ណ្ឌមិនទាន់ផ្ទុះ។ កាលពីពេលថ្មីៗនេះ កម្ពុជាបានជាប់ជាប្រទេសនាំមុខគេដែលផ្តល់ឱកាសឲ្យនារីកងទ័ពមួកខៀវទៅចូលរួមបេសកកម្មជាលក្ខណៈអន្តរជាតិក្នុងក្របខណ្ឌអង្គការសហប្រជាជាតិ»៕
ចែករំលែកព័តមាននេះ