ខេត្តកំពង់ឆ្នាំង ៖ សមត្ថកិច្ចចម្រុះដឹកនាំដោយលោក ទី បុរិន្ទ ព្រះរាអាជ្ញាអមសាលាដំបូងខេត្តអមដោយលោក ហ៊ឹម ពុទ្ឋាសុរិយៈ ជាអនុប្រធានលេខាធិការដ្ឋានរដ្ឋបាលសាលាដំបូងខេត្ត នៅព្រឹកថ្ងៃទី១៤…
ខេត្តកំពង់ឆ្នាំង ៖ សមត្ថកិច្ចចម្រុះដឹកនាំដោយលោក ទី បុរិន្ទ ព្រះរាអាជ្ញាអមសាលាដំបូងខេត្តអមដោយលោក ហ៊ឹម ពុទ្ឋាសុរិយៈ ជាអនុប្រធានលេខាធិការដ្ឋានរដ្ឋបាលសាលាដំបូងខេត្ត នៅព្រឹកថ្ងៃទី១៤ ខែធ្នូ ឆ្នាំ២០១៧ បានចុះអនុវត្តសាលក្រមរុះរើដោយបង្ខំរោងស្តង់លក់ឈើមួយកន្លែងជាប់ខាងជើងសាលាសង្កាត់ ដើម្បីយកដីប្រគល់ឱ្យសាលាសង្កាត់វិញតាមបណ្តឹងរបស់លោកស្រីចៅ សង្កាត់ផ្សារឆ្នាំង ក្រុងកំពង់ឆ្នាំង ។ យ៉ាងនេះក្តីពេលចុះអនុវត្តសាលក្រមខាងលើនេះមិនមានភាគីចុងចម្លើយនោះទេ ។
យោងតាមពាក្យបណ្តឹងរបស់លោកស្រី ភួន ឈួយអេង ចៅសង្កាត់ផ្សារឆ្នាំងបានឱ្យដឹងថា កាលពីថ្ងៃទី០៣ ខែកក្កដា ឆ្នាំ២០០០ ឈ្មោះ សុខ សុភា ភេទប្រុស អាយុ៤៩ឆ្នាំ បានខ្ចីដីទំហំ២៥គុណនឹង២១ម៉ែត្រ ពីគណៈបក្សប្រជាជនស្រុកកំពង់ឆ្នាំងតាមរយៈមេឃុំផ្សារឆ្នាំងដើម្បីយកធ្វើរោងដេប៉ូលក់ផលអនុផលព្រៃឈើរយៈពេល១ខែជាបណ្តោះអាសន្ន ។ ប៉ុន្តែដល់ពេលកំណត់ឈ្មោះ សុខ សុភា មិនព្រមរុះរើស្តង់ឈើនោះចេញឡើយរហូតដល់ថ្ងៃទី០៦ ខែសីហា ឆ្នាំ២០១៣ ចៅសង្កាត់បានអញ្ជើញឈ្មោះ សុខ សុភា មកប្រជុំពិភាក្សាដើម្បីឱ្យរុះរើស្តង់នោះចេញ ព្រោះត្រូវយកដីសាងសង់សាលាសង្កាត់ថ្មីក្រោមគម្រោង ADB ហើយពេលនោះ ឈ្មោះ សុខ សុភា បានឯកភាពគ្នាយល់ព្រមរុះរើ នៅថ្ងៃទី៣០ ខែធ្នូ ឆ្នាំ២០១៣ ។ លុះដល់ពេលកំណត់ឈ្មោះ សុខ សុភា នៅតែមិនព្រមរុះរើស្តង់លក់ឈើដែលខ្ចីពីសាលាសង្កាត់ដដែល ។
យោងតាមសាលក្រមលេខ០៥ «ខ» ចុះថ្ងៃទី១២ ខែសីហា ឆ្នាំ២០១៥ បានបញ្ជាក់ថា ចំណុចវិវាទគឺចុងចម្លើយឈ្មោះ សុខ សុភា សំអាងថា ដីនោះត្រូវបានសហគមន៍ដេប៉ូឈើ កែវ លន់ ជាអ្នកចែកឱ្យ ។ ប៉ុន្តែក្នុងសាលក្រមដដែលក៏បានបញ្ជាក់ថា ឈ្មោះ សុខ សុភា ពិតជាបានខ្ចីដីទំហំ២៥គុណនឹង២១ម៉ែត្រ ពីគណៈបក្សប្រជាជនស្រុកកំពង់ឆ្នាំងពិតប្រាកដមែន ដោយមានលិខិតស្នាមផ្តិតមេដៃខ្ចីដី និងមានបោះត្រារបស់សាលាសង្កាត់ពិតប្រាកដមែនដោយលិខិតនេះបានរក្សាទុកយ៉ាងត្រឹមត្រូវបានផ្លូវច្បាប់ ។
ដោយហេតុនេះហើយតុលាការបានសម្រេចទទួលស្គាល់ដើមបណ្តឹងបានប្តឹងពិតជាត្រឹមត្រូវ ព្រោះមានឯកសារ និងសាក្សីច្បាស់លាស់ ចំណែកចុងចោទគ្មានឯកសារអ្វីបញ្ជាក់ជាការពិតនោះឡើយ ។ ដូច្នេះតុលាការបានសម្រេចឱ្យលោក សុខ សុភា រុះរើស្តង់ និងឈើចេញឱ្យអស់ហើយប្រគល់ដីដែលវាស់ឃើញជាក់ស្តែងមានទំហំតែ១០,៥០ម៉ែត្រគុណនឹង២១,៧០ម៉ែត្រ ប្រគល់ទៅឱ្យដើមចោទគឺលោកស្រីចៅសង្កាត់ផ្សារឆ្នាំង និងបង្គាប់ឱ្យសងប្រាក់ចំនួន១០លានរៀលជាសំណងថ្លៃខូចខាតពេលវេលាប្តឹងផ្តល់ជាង១០ឆ្នាំមកហើយ ។ ប៉ុន្តែឈ្មោះ សុខ សុភា នៅតែមិនព្រមរុះរើស្តង់នោះចេញទើបតុលាការចេញសាលក្រមរុះរើដោយបង្ខំបែបនេះថ្ងៃទី១៤ ធ្នូ ដើម្បីយកដីត្រៀមធ្វើសាលាសង្កាត់ថ្មីក្រោមគម្រោង ADB ៕
ចែករំលែកព័តមាននេះ