ខេត្តប៉ៃលិន ៖ គេសង្កេតឃើញមានប្រជាពលរដ្ឋមួយចំនួន បាននាំគ្នាយកសំរាមមានសម្បកដូង កាកអំពៅ និងសំណល់បន្លែផ្ទះបាយ ដូចជាស្រកាត្រី ក្បាលត្រី យកទៅបោះចោលនៅលើចិញ្ចើមផ្លូវក្រាលកៅស៊ូមួយកន្លែង ស្ថិតនៅក្នុងភូមិបឌិននៀវ…
ខេត្តប៉ៃលិន ៖ គេសង្កេតឃើញមានប្រជាពលរដ្ឋមួយចំនួន បាននាំគ្នាយកសំរាមមានសម្បកដូង កាកអំពៅ និងសំណល់បន្លែផ្ទះបាយ ដូចជាស្រកាត្រី ក្បាលត្រី យកទៅបោះចោលនៅលើចិញ្ចើមផ្លូវក្រាលកៅស៊ូមួយកន្លែង ស្ថិតនៅក្នុងភូមិបឌិននៀវ សង្កាត់ប៉ៃលិន ក្រុងប៉ៃលិន ដែលបណ្ដាលឱ្យប៉ះពាល់ដល់សុខភាពផ្លូវដង្ហើមប្រជាពលរដ្ឋ ធ្វើដំណើរឆ្លងកាត់ទៅមកតាមផ្លូវនោះ ។
ប្រភពព័ត៌មានពីអ្នកធ្វើដំណើរឆ្លងកាត់កន្លែងខាងលើ បានឱ្យដឹងថា គេសង្កេតឃើញប្រជាពលរដ្ឋមួយចំនួនរស់នៅក្នុងក្រុងប៉ៃលិន បាននាំគ្នាលួចយកកាកសំណល់ទៅបោះចោលនៅលើចិញ្ចើមផ្លូវខាងលើនាពេលយប់ស្ងាត់អស់រយ:ពេលជាយូរមកហើយ រហូតដល់ក្លាយទៅជាគំនរសំរាម ហើយក៏ស្អុយរលួយជះក្លិនអសោចទៅលើប្រជាពលរដ្ឋ ដែលធ្វើដំណើរបើកបរម៉ូតូ និងរថយន្តចេញចូលទៅមកតាមផ្លូវក្រាលកៅស៊ូនោះ ។
ប្រភពបន្តថា ការបោះចោលសម្រាមរាយពាសពេញនៅក្នុងក្រុងបែបនេះ ធ្វើឱ្យខូចដល់សោភ័ណភាព និងប៉ះពាល់ដល់បរិស្ថានធ្ងន់ធ្ងរ បើសិនជាអាជ្ញាធរមូលដ្ឋានមិនទប់ស្កាត់ នោះអាចនឹងក្លាយទៅជាកន្លែងចាក់សំរាមមិនខានឡើយ ។
ពាក់ព័ន្ធទៅនឹងបញ្ហានេះ លោក គឹម សុខា ប្រធានមន្ទីរបរិស្ថានខេត្តប៉ៃលិន បានឱ្យដឹងកាលពីរសៀល ថ្ងៃទី១៤ ខែធ្នូ នេះថា បើសិនជាមានសំរាមច្រើនមែនខាងលោកនឹងចាត់ឱ្យមន្ត្រីក្រោមឱវាទ ចុះទៅពិនិត្យមើល ដើម្បីធ្វើការដោះស្រាយកុំឱ្យប៉ះពាល់ដល់បរិស្ថាន ។ ចំណែកលោកកំពុងជាប់ប្រជុំនៅឯរាជធានីភ្នំពេញ ហើយនៅពេលក្រោយនឹងចុះទៅមើលផ្ទាល់តែម្តង ៕
ចែករំលែកព័តមាននេះ