រាជធានីភ្នំពេញ ៖ អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា បានឱ្យដឹងថា គ.ជ.ប កាលគ្រាមុនគ្រោងស្នើទៅកាន់សហភាពអឺរ៉ុបនូវទឹកប្រាក់ប្រមាណ ១០ម៉ឺនដុល្លារអាមេរិក សម្រាប់ដំណើរការបោះឆ្នោតថ្នាក់ជាតិឆ្នាំ ២០១៨ ។
តែកាលពីថ្ងៃទី ១២ ធ្នូ ម្សិលមិញនេះ សហភាពអឺរ៉ុបបានចេញប្រកាសព័ត៌មានមួយបញ្ជាក់ថា EU សម្រេចព្យួរជំនួយដល់ស្ថាប័ន គ.ជ.ប ដោយសារតែការសម្រេចរំលាយចោលគណបក្សសង្គ្រោះជាតិ ដោយតុលាការកំពូលកាលពីថ្ងៃទី ១៦ វិច្ឆិកា កន្លងទៅ។
ពាក់ព័ន្ធនឹងបញ្ហានេះ លោក ហង្ស ពុទ្ធា បានអះអាងថា ការសម្រេចព្យួរជំនួយនេះ គឺជាសិទ្ធិរបស់ EU អញ្ចឹង គ.ជ.ប នឹងប្រើប្រាស់តាមផលទ្ធភាពផ្ទាល់ខ្លួន។ អ្នកនាំពាក្យរូបនេះបានបន្តថា គ.ជ.ប គឺជាស្ថាប័នគោរពច្បាប់ អ្នកនៅស្រុកបារាំងគោរពច្បាប់បារាំង អ្នកនៅកម្ពុជាត្រូវគោរពច្បាប់កម្ពុជា។ អីញ្ចឹងបើច្បាប់ឲ្យបើកបរប្រកាន់ស្តាំ គឺ គ.ជ.បបើកបរប្រកាន់ស្តាំ។
ទោះពីជាមានការលើកឡើងពីប្រជាពលរដ្ឋមួយចំនូននឹងមិនទៅបោះឆ្នោតទេ ដោយសារបក្សប្រឆាំងត្រូវរំលាយនោះ ត្រូវបានអ្នកនាំពាក្យ គ.ជ.ប រូបនេះលើកឡើងថា ទោះបីជាពលរដ្ឋមិនបានបោះឆ្នោតទាំងអស់ក្តី ហើយទោះបីជាមានអ្នកទៅបោះឆ្នោតត្រឹមពាក់កណ្តាលក្តី ក៏មិនមានច្បាប់ណាមួយចែងថា ទទួលស្គាល់ ឬមិនទទួលស្គាល់យ៉ាងណានោះទេ។
ជុំវិញបញ្ហានៃការរំលាយបក្សប្រឆាំងនេះផងដែរ លោក ហង្ស ពុទ្ធា ដែលត្រូវបានជ្រើសរើសចេញពីស្ថាប័នអង្គការសង្គមស៊ីវិល ក្រោមកិច្ចព្រមព្រៀងរបស់គណបក្សកាន់អំណាច និង CNRP ពីមុននោះសម្រាប់ជាតួនាទីសមាជិកទី ៩ របស់ គ.ជ.ប បានបញ្ជាក់ជំហររបស់លោកថា លោកគ្មានបំណងលាឈប់ពី គ.ជ.ប ទេ។
លោក ហង្ស ពុទ្ធា បញ្ជាក់ថា៖ «ខ្ញុំមិនមានបំណងចាកចេញទេ ខ្ញុំគោរពទៅតាមច្បាប់ ។ រដ្ឋសភាបានបោះឆ្នោតជ្រើសរើសខ្ញុំ ទុកចិត្តខ្ញុំឱ្យមកធ្វើការនៅទីនេះ។ ដូច្នេះខ្ញុំត្រូវតែធ្វើការឱ្យចប់អាណត្តិ»៕
ចែករំលែកព័តមាននេះ