ទ្វីបអឺរ៉ុប ៖ ព្រិលព្រមទាំងព្យុះនាថ្ងៃទី១១ ធ្នូ បានប៉ះពាល់ប្រទេសជាច្រើននៅភាគខាងលិចទ្វីបអឺរ៉ុប បណ្តាលឱ្យស្ទះដល់ការដឹកជញ្ជូន ដាច់ចរន្តអគ្គិសនី បិទទ្វារសាលារៀនលុបចោលជើងហោះហើររបស់យន្តហោះ រហូតដល់លុបចោលការជួបគ្នាខាងការទូតមួយ ។…
ទ្វីបអឺរ៉ុប ៖ ព្រិលព្រមទាំងព្យុះនាថ្ងៃទី១១ ធ្នូ បានប៉ះពាល់ប្រទេសជាច្រើននៅភាគខាងលិចទ្វីបអឺរ៉ុប បណ្តាលឱ្យស្ទះដល់ការដឹកជញ្ជូន ដាច់ចរន្តអគ្គិសនី បិទទ្វារសាលារៀនលុបចោលជើងហោះហើររបស់យន្តហោះ រហូតដល់លុបចោលការជួបគ្នាខាងការទូតមួយ ។
នៅប្រទេសហូឡង់ជើងហោះហើររបស់យន្តហោះជាង៤០០ជើងត្រូវលុបចោលនាថ្ងៃទី១១ ធ្នូ នៅព្រលានយន្តហោះអាមស្ទ័រដាម-ស៊ីផុល ជាព្រលានយន្តហោះមានសកម្មភាពយន្តហោះចុះឡើងច្រើនបំផុតនៅអឺរ៉ុប ។
អ្នកនាំពាក្យព្រលានយន្តហោះនេះ លោក PAUL WEBER ថ្លែងប្រាប់ AFP ថា ការយឺតយ៉ាវនៃការហោះហើរអាចមានរហូតដល់ថ្ងៃទី១២ ធ្នូ ទោះបីព្រិលរលាយក្តី ។
ព្រលានយន្តហោះ EINDHOVEN ជាព្រលានយន្តហោះធំទី២របស់ហូឡង់ក៏គូសបញ្ជាក់ដែរថា ដោយសារលក្ខខណ្ឌឧតុនិយមព្រលានត្រូវបិទ ។
រលកយ៉ាងខ្ពស់បោកច្រាំងដោយព្យុះ ANA
នៅបែលហ្ស៊ិកជើងហោះហើរប្រមាណជា៣០០ជើងរបស់យន្តហោះក៏ត្រូវលុបចោលដែរ ហើយជើងហោះហើរប្រមាណជា១០០មានការយឺតយ៉ាវនៅព្រលានយន្តហោះក្រុងព្រុចសែល ។ ការជួបគ្នារវាងប្រធានគណៈកម្មាធិការអឺរ៉ុប លោក JEAN CLAUDE JUNCKER និងលោកបេនចាមីន នេតាន់យ៉ាហ៊ូ នាយករដ្ឋមន្ត្រីអ៊ីស្រាអែល ត្រូវលុបចោលមកពីព្រិល ដែលធ្វើឱ្យស្ទះដល់ការដឹកជញ្ជូននៅក្រុងព្រុចសែល ។
នៅបារាំងខ្យល់ព្យុះឈ្មោះ ANA បានបោកបក់ក្នុងល្បឿនពី១៤០ទៅ១៥០គីឡូម៉ែត្រ ក្នុងមួយម៉ោង ជាមួយរលកសមុទ្រធំៗបោកមកមាត់ច្រាំង ។ នាយប់ថ្ងៃទី១១ ធ្នូ មនុស្សប្រមាណ៥០.០០០គ្រួសារ នៅតែដាច់ភ្លើង ។ នៅក្រុងប៉ារីស TOUR EIFFEL បិទមិនឱ្យសាធារណជនចូលមកពីលក្ខខណ្ឌឧតុនិយម ។
នៅអង់គ្លេសសាលារៀនជាច្រើនរយនៅតែបិទទ្វារមកពីព្រិលធ្លាក់ខ្លាំងពេក ។ ភាគខាងត្បូងអេស្ប៉ាញ ក៏រងប៉ះពាល់ដោយព្យុះព្រិលនេះដែរ ។
ព្យុះព្រិលនៅអឺរ៉ុបនេះបណ្តាលឱ្យមនុស្សស្លាប់តែម្នាក់គត់ទៅព័រទុយហ្គាល់ ដោយត្រូវដើមឈើបាក់រលំត្រូវ ៕
ចែករំលែកព័តមាននេះ