ខេត្តពោធិ៍សាត់ ៖ ផ្ទះមួយខ្នងបានក្លាយជាផេះដោយមិនដឹងមូលហេតុច្បាស់លាស់ ខណៈពេលដែលម្ចាស់ផ្ទះមិននៅ ។ ករណីភ្លើងឆេះផ្ទះនេះបានកើតឡើងកាលពីរសៀលថ្ងៃទី១០ ខែធ្នូ ឆ្នាំ២០១៧ត្រូវនឹងថ្ងៃអាទិត្យ នៅភូមិតាំងគោក ឃុំតាលោ ស្រុកបាកាន ។
នគរបាលប៉ុស្តិ៍រដ្ឋបាលតាលោឲ្យដឹងថា ផ្ទះដែលក្លាយជាចំណីអគ្គិភ័យនេះធ្វើអំពីឈើប្រក់ស្បូវ ជញ្ជាំងស្បូវ ក្រាលក្ដារ មានទំហំ០៤ គុណនឹង០៧ម៉ែត្រ ។ ម្ចាស់ផ្ទះឈ្មោះផ្អ ផ្អេន ភេទប្រុសអាយុ៦១ឆ្នាំ ប្រពន្ធឈ្មោះហ៊ុន ឡេង អាយុ៦១ឆ្នាំ ។ នៅថ្ងៃនោះក្រុមគ្រួសារខាងលើរវល់ទៅច្រូតស្រូវតាំងពីព្រលឹមលុះពេលថ្ងៃត្រង់ត្រឡប់មកទទួលទានបាយស្រាប់តែឃើញផ្ទះក្លាយជាផេះ ទើបមានការស្លុតចិត្តនិយាយលែងចេញតែម្ដង ។ ទ្រព្យសម្បត្តិដែលមានក្នុងផ្ទះទាំងប៉ុន្មាន គឺអស់ទាំងស្រុងពិសេសស្រូវចំនួន០៨ការ៉ុង ចានឆ្នាំង សំលៀកបំពាក់ សម្ភារប្រើប្រាស់ និងអត្រានុគោលដ្ឋានជាដើម ។ ពេលដែលក្រុមគ្រួសាររបស់គាត់ចេញទៅច្រូតស្រូវនោះពុំមានដុតភ្លើង ទៀន ភ្លើងធូប ឫភ្លើងចង្ក្រានទុកចោលនោះទេ គឺមានតែអាគុយមួយគ្រឿងនៅលើផ្ទះសម្រាប់ចាប់បំភ្លឺពេលយប់តែប៉ុណ្ណោះ ។
ម្ចាស់ផ្ទះសង្ស័យមានអ្នកគេលួចដុត ប៉ុន្តែតាមការស្រាវជ្រាវរបស់សមត្ថកិច្ចបញ្ជាក់ថា ករណីភ្លើងឆេះផ្ទះនេះអាចបណ្ដាលមកពីផ្ទុះអាគុយ ព្រោះឃើញមានស្នាមឆាបឆេះចេញពីកណ្ដាលផ្ទះដែលជាកន្លែងដាក់អាគុយនោះតែម្តង ៕
ចែករំលែកព័តមាននេះ