ខេត្តប៉ៃលិន ៖ បន្ទាប់ពីអាជ្ញាធរសង្កេតឃើញប្រជាពលរដ្ឋ និងអាជីវករដាក់លក់ទំនិញនៅលើចិញ្ចើមផ្លូវសាធារណៈ និងចតរថយន្តលើផ្លូវបណ្តាលឱ្យខូចសណ្តាប់ធ្នាប់ទើបនៅវេលាព្រឹកថ្ងៃទី០៨ ខែធ្នូ ឆ្នាំ២០១៧ លោកចក់ រិទ្ធី អភិបាលរងក្រុងដឹកនាំកម្លាំងសមត្ថកិច្ចចម្រុះចុះរៀបចំសណ្តាប់ធ្នាប់តែម្តង ។
លោកចក់ រិទ្ធី អភិបាលរងក្រុងប៉ៃលិនបានឱ្យដឹងថា រហូតមកដល់ឥឡូវប្រជាពលរដ្ឋនៅតែនាំគ្នាបន្តដាក់លក់នំចំណី និងម្ហូបអាហារនៅលើចិញ្ចើមផ្លូវ មានចតម៉ូតូរ៉ឺម៉ក រថយន្តនៅលើផ្លូវថ្នលសាធារណៈបណ្តាលឱ្យបាត់បង់សណ្តាប់ធ្នាប់ និងកកស្ទះចរាចរណ៍ទើបលោកដឹកនាំកម្លាំងសមត្ថកិច្ចចម្រុះចុះទៅបន្តណែនាំរៀបចំសណ្តាប់ធ្នាប់ជុំវិញផ្សារតែម្តង ។
លោកបន្តទៀតថា ប្រជាពលរដ្ឋហាក់ដូចជាអត់ស្តាប់ការណែនាំសាលាក្រុង ដោយខាងអាជ្ញាធរបានចុះទៅធ្វើការណែនាំជាច្រើនលើកច្រើនសារ ហើយថែមទាំងជូនដំណឹងដល់ពួកគាត់ជារឿយៗ ។ ម្យ៉ាងវិញទៀតបើសិនជាម៉ូតូ ឬរថយន្តជ្រុលចង្កូតទៅប៉ះពាល់ និងបង្កគ្រោះថ្នាក់ចរាចរណ៍នោះពិតជានាំឱ្យទទួលរងគ្រោះខាតបង់ថវិកា និងពេលវេលា និងលំបាកក្នុងការដោះស្រាយទៀតផង ។
ចំណែកប្រជាពលរដ្ឋត្រេកអរពេលឃើញអាជ្ញាធរចុះរៀបចំសណ្តាប់ធ្នាប់ផ្សារ ប៉ុន្តែអ្វីដែលគេកត់សម្គាល់នោះ គឺដូចជាវែកចក ព្រោះអីបន្ទាប់ពីអាជ្ញាធរណែនាំរួច អ្នកលក់នៅតែបន្តលក់ដូរ នៅលើចិញ្ចើមផ្លូវ និងចតរថយន្តនៅលើផ្លូវ បណ្តាលឱ្យលំបាកធ្វើចរាចរណ៍ដដែល ៕
ចែករំលែកព័តមាននេះ