ខេត្តប៉ៃលិន ៖ កាលពីរសៀលថ្ងៃទី៧ ខែធ្នូ ឆ្នាំ២០១៧ នៅក្នុងបរិវេណសាលាខេត្តប៉ៃលិន អាជ្ញាធរខេត្ត សហការជាមួយនឹងក្រុមហ៊ុនហ្វត (Ford) បានរៀបចំកម្មវិធីចែកអំណោយដល់ប្រជាពលរដ្ឋក្រីក្រមកពីទូទាំងខេត្តប៉ៃលិន ចំនួន២០០គ្រួសារ ។ ពីធីចែកអំណោយនេះធ្វើឡើងក្រោមអធិបតីភាពលោក អៀង វុធ អភិបាលរងខេត្តប៉ៃលិន ដោយមានការចូលរួមពីមន្ត្រីរាជការមួយចំនួនមកពីមន្ទីរជុំវិញខេត្ត ព្រមទាំងប្រធានក្រុមហ៊ុន និងអតិថិជនហ្វត (Ford) ផងដែរ ។
បន្ទាប់ពីប្រធានក្រុមហ៊ុនហ្វត បានធ្វើកិច្ចស្វាគមន៍រួចមក លោក អៀង វុធ អភិបាលរងខេត្ត បានមានប្រសាសន៍ថា នៅក្នុងខេត្តប៉ៃលិន ប្រជាពលរដ្ឋមានដីសម្រាប់ប្រកបរបរកសិកម្ម៥ម៉ឺនហិកតា ដោយក្នុងនោះមានដីសម្រាប់ធ្វើស្រែចំនួន១ម៉ឺនហិកតា និងដីសម្រាប់ដាំពោតក្រហម ដំឡូងមី និងដំណាំហូបផ្លែផ្សេងៗដូចជាមៀនប៉ៃលិន ចំនួន៤ម៉ឺនហិកតា ។ លោកបន្តទៀតថា នៅពេលនេះពិតជាថ្លែងអំណរគុណដល់ក្រុមហ៊ុនហ្វត ដែលបានរៀបចំជាអំណោយសម្រាប់ចែកជូនដល់ប្រជាពលរដ្ឋក្រីក្រមកពីទូទាំងខេត្តប៉ៃលិន ។ បើទោះបីជាអំណោយនេះហាក់ដូចជាតិចតួចក៏ដោយ ក៏អាចជួយដោះស្រាយបញ្ហាប្រឈមដល់ជីវភាពរស់នៅប្រចាំថ្ងៃ ជូនដល់ពួកគាត់មួយចំនួនផងដែរ ។ លើសពីនេះ សូមឱ្យបងប្អូនប្រជាពលរដ្ឋចេះថែរក្សាសុខភាពផ្ទាល់ខ្លួន ព្រោះរដូវរងារបានមកដល់ហើយ ជំងឺរោគារក៏អាចនឹងកើតមានដល់មនុស្សក្មេងចាស់ប្រុសស្រី ដោយត្រូវរស់នៅស្អាត ហូបស្អាត មានអនាម័យគ្រប់ពេលវេលា ដើម្បីបង្ការ និងសន្សំសំចៃថវិកាសម្រាប់ក្រុមគ្រួសារ ។
សូមបញ្ជាក់ថា អំណោយដែលសប្បុរសជន និងអាជ្ញាធរខេត្តចែកជូនពលរដ្ឋក្រីក្រនេះ មានអង្ករ២០គីឡូក្រាម ទឹកត្រី១យួរ មី១កេស មុង១ និងភួយ១ផងដែរ ។ ចំណែកប្រជាពលរដ្ឋដែលបានទទួលអំណោយ មានសេចក្តីសប្បាយរីករាយ និងជូនពរដល់ម្ចាស់អំណោយ ក៏ដូចជាអាជ្ញាធរខេត្ត ឱ្យជួបតែសេចក្តីសុខគ្រប់ពេលវេលា ៕
ចែករំលែកព័តមាននេះ