ខេត្តតាកែវ ៖ កាលពីថ្ងៃទី៧ ធ្នូ មន្ត្រីជំនាញបានដឹកនាំកម្លាំងចម្រុះចុះបិទទីតាំងស្ករត្នោតអត់ច្បាប់ចំនួន៤៨កន្លែង នៅក្នុងឃុំចំនួន៣នៃស្រុកបាទី ដែលជាការអនុវត្តតាមលិខិត សជណ លេខ៤៦២ របស់សាលាខេត្ត…
ខេត្តតាកែវ ៖ កាលពីថ្ងៃទី៧ ធ្នូ មន្ត្រីជំនាញបានដឹកនាំកម្លាំងចម្រុះចុះបិទទីតាំងស្ករត្នោតអត់ច្បាប់ចំនួន៤៨កន្លែង នៅក្នុងឃុំចំនួន៣នៃស្រុកបាទី ដែលជាការអនុវត្តតាមលិខិត សជណ លេខ៤៦២ របស់សាលាខេត្ត ដែលបានជូនដំណឹង២សប្តាហ៍មកហើយ ។
គណៈកម្មការចម្រុះ បានដាក់កំហិតឲ្យម្ចាស់សិប្បកម្មទាំងអស់ត្រូវតែបញ្ឈប់សកម្មភាពជាដាច់ខាតនៅត្រឹមវេលាម៉ោង៨ព្រឹកថ្ងៃទី៨ ខែធ្នូ ។ រីឯស្ករដែលផលិតរួច ហើយលើកដាក់រថយន្តប្រុងដឹកយកទៅលក់ឱ្យឈ្មួញ គឺឲ្យដឹកឲ្យអស់ចុះ ប៉ុន្តែរួចពីនោះមិនអនុញ្ញាតឲ្យផលិតបន្តទៀតទេ ។ ប្រសិនបើមានករណីនៅតែបន្តផលិតទៀត គណៈកម្មការចម្រុះនឹងចាត់វិធានការតាមផ្លូវច្បាប់ ដោយដាក់កម្លាំងចាំចាប់រថយន្តដែលដឹកចេញទៅលក់ឲ្យឈ្មួញ ហើយយកទាំងរថយន្តទាំងស្ករ និងកសាងសំណុំរឿងបញ្ជូនទៅសាលាដំបូង ។
បើតាមម្ចាស់សិប្បកម្មនៅឃុំលំពង់ និយាយថា ស្ករនេះមិនមែនពួកគាត់ទិញវត្ថុធាតុដើមមកផលិតដោយខ្លួនឯងទេ គឺមានថៅកែនៅសង្កាត់ទួលទំពូង រាជធានីភ្នំពេញ ដឹកវត្ថុធាតុដើមយកមកឲ្យពួកគាត់ផលិត ។ ក្នុងរយៈពេល៤ទៅ៥ថ្ងៃ គាត់ផលិតបាន២ទៅ៣តោន ទើបគេយកហើយពួកគាត់បានកម្រៃពីថៅកែវិញទេ ។ ការផលិតស្ករត្នោតនេះ មិនមានប្រើប្រាស់សារធាតុគីមីឡើយ តែយ៉ាងណាក៏ដោយគណៈកម្មការចម្រុះនៅតែបិទដដែល ។
ប៉ុន្តែអ្វីដែលពិសេសជាងនេះ គឺមានម្ចាស់អាជីកម្មមួយចំនួនទៀតបានឱ្យដឹងថា ពួកគាត់បានបង់លុយឲ្យប្រធានការិយាល័យសិប្បកម្ម និងឧស្សាកម្មជាបន្តបន្ទាប់និងជាញឹកញាប់ រួមជាមួយកាំកុងត្រូលផង ។ លើសពីនេះទៀត ថ្មីៗនេះពួកគាត់ក៏បានបង់លុយដើម្បីធ្វើច្បាប់ដោយលោកប្រធានការិយាល័យប្រាប់ថាយកទៅមន្ទីរស្នើសុំទៅក្រសួង ។ ប៉ុន្តែមកដល់ពេលនេះ ពួកគាត់មិនទទួលបានច្បាប់ ឬលិខិតអនុញ្ញាតណាមួយឡើយ ឯអស់លោកខាងមន្ត្រីមូលដ្ឋាននៅតែស្ងៀមស្ងាត់ ទើបពួកគាត់ក៏ចេះតែធ្វើទៅ ដែលមិនដឹងថាមានរឿងធំបែបនេះឡើយ ។ ចំណែកខាងមន្ទីរ ឬអាជ្ញាធរពាក់ព័ន្ធ ក៏មិនមានផ្តល់ដំណឹងអ្វីឲ្យដឹងដែរ គឺឃើញមានតែអ្នកមកយកលុយប៉ុណ្ណោះ ៕
ចែករំលែកព័តមាននេះ