ខេត្តបន្ទាយមានជ័យ ៖ ពលករ១៤នាក់ ត្រូវបានគេរករថយន្តឲ្យជិះត្រលប់មកព្រំដែនកម្ពុជា-ថៃ ដើម្បីវិលត្រលប់ទៅស្រុកកំណើតវិញ បន្ទាប់ពីចោទក្រុមហ៊ុនមួយថា យកទៅឲ្យធ្វើការខុសលក្ខន្តិកនៅក្នុងខេត្តសុរ៉ាតថានី ប្រទេសថៃ ។ ពលករទាំង១៤នាក់ ស្រី៦នាក់ មកពីខេត្តផ្សេងគ្នាៗ រួមមានខេត្តបាត់ដំបង៦នាក់ ខេត្តពោធិ៍សាត់៦នាក់ និងខេត្តបន្ទាយមានជ័យ២នាក់ ។
ជួបតាមទូរស័ព្ទខណៈពលករទាំងនេះនៅលើទឹកដីថៃ បានប្រាប់ឲ្យដឹងថា ពួកគេទៅធ្វើការលើទឹកដីថៃតាមរយៈក្រុមហ៊ុនខ្មែរឈ្មោះ CL Supply (Cambodia) ហើយចោទប្រកាន់ក្រុមហ៊ុនមួយនេះថា យកពួកគាត់ទៅឲ្យធ្វើការខុសលក្ខន្តិក ដោយមុនចេញពីកម្ពុជាក្នុងលក្ខខណ្ឌថាយកទៅធ្វើការផ្នែកគ្រឿងសង្ហារិមនៅក្រុងបាងកក ដឹងអីពេលទៅដល់ដីថៃ បែរជាឲ្យពួកគេធ្វើការផ្នែកអារឈើនៅខេត្តសុរ៉ាតថានីទៅវិញ ។ ពួកគេថា ដោយសាការងារនោះមិនចេះធ្វើ ពួកគេក៏ទាក់ទងទៅអង្គការ IOM នៅប្រទេសថៃឲ្យជួយអន្តរាគមន៍ដើម្បីបានវិលត្រលប់មកវិញ ។
តាមលោក គ្រៀង សាក់ប៊ុនយ៉ែម មន្ត្រីអង្គការ LPN ធ្វើការលើពលករ៣ប្រទេស រួមមានកម្ពុជា មីយ៉ាម៉ា និងឡាវ ប្រចាំនៅប្រទេសថៃ ប្រាប់តាមសារអេឡិចត្រូនិចថា ក្រោយពីពលករខាងលើទាក់ទងសុំឲ្យជួយតាមរយៈអង្គការមួយខាងលើ ខាងអង្គការលោកបានសហការណ៍គ្នាជាមួយអាជ្ញាធរចុះដល់ចំណុចកើតហេតុ ជួបពលករទាំងនេះ ដោយពួកគេខ្វះខាតសព្វបែបយ៉ាង ទើបអន្តរាគមន៍ជួយឲ្យក្រុមហ៊ុនអារឈើនោះជួយរករថយន្តឲ្យជិះត្រលប់ដល់ផ្សាររុងក្លឿវិញ ព្រំដែនកម្ពុជា-ថៃ ។
ពលករទាំង១៤នាក់បានមកដល់កម្ពុជាវិញ នារសៀលថ្ងៃទី០៧ ខែធ្នូ ឆ្នាំ២០១៧ តាមច្រកទ្វារអន្តរជាតិប៉ោយប៉ែតហើយពេលនេះ សមត្ថកិច្ចពាក់ព័ន្ធកំពុងសាកសួរពួកគេ ដើម្បីចង់ដឹងពីរឿងរ៉ាវដ៏ពិតប្រាកដថា តើទៅតាមក្រុមហ៊ុនណាពិតប្រកដ និងជួបផលលំបាកយ៉ាងណាខ្លះលើទឹកដីថៃនោះ ។ យ៉ាងណាមិញជុំវិញករណីចោទប្រកាន់ខាងលើ លោក ឈាង ឆុំអគ្គ នាយកក្រុហ៊ុន CL Supply (Cambodia) ប្រាប់តាមទូរស័ព្ទថា ការពិតពលករទាំង១៤នាក់មិនមែនទៅប្រទេសថៃតាមរយៈក្រុមហ៊ុនលោកឡើយ គឺទៅធ្វើការលើទឹកដីថៃតាមរយៈក្រុមហ៊ុនB.S.R.O.BEST.MANPOWER.CO,LTD ។ មិនតែប៉ុណ្ណោះលោកថា មុនការវិលត្រលប់ក្រុមពលករបានធ្វើលិខិតសន្យាមួយថា នឹងមិនឲ្យប៉ះពាល់ដល់ក្រុមហ៊ុនលោកទៀតផង ។ អគ្គនាយកក្រុមហ៊ុនរូបនេះបញ្ជាក់ថា ដើមរឿងដែលធ្វើឲ្យពាក់ព័ន្ធដល់ក្រុមហ៊ុនលោក គឺដោយសារមុនការចាកចេញពីកម្ពុជាទៅប្រទេសថៃ ឈ្មោះ ផល ដែលជាកូនចៅចាស់របស់គាត់ បច្ចុប្បន្នធ្វើការឲ្យក្រុមហ៊ុនខាងលើ បាននាំពលករទៅស្នាក់ការលោកនៅភ្នំពេញ សុំដេក១យប់ ព្រោះអាណិតពលករខ្លាចខ្វះខាត ហើយពេលពួកគេចេញទៅនាំគ្នាយកនាមប័ណ្ណរបស់លោកម្នាក់១សន្លឹក ទើបមានការយល់ច្រឡំ ។ អគ្គនាយករូបនេះ បានបញ្ជូនឯកសារឈ្មោះពលករទាំងនេះ ដែលទៅតាមរយៈក្រុមហ៊ុមខាងលើជាភស្តុតាងទៀតផង ។ ជុំវិញករណីខាងលើខាងក្រុមហ៊ុន B.S.R.O.BEST.MANPOWER.CO,LTD កោះសន្តិភាពមិនអាចទាក់ទងសុំការបំភ្លឺបានទេ ព្រោះមិនស្គាល់លេខទូរស័ព្ទ ៕
ចែករំលែកព័តមាននេះ