ហ៊ឺ! សូម្បីតែក្នុងវត្ត ក៏រញ៉េរញ៉ៃដែរ
ខេត្តព្រៃវែង ៖ កាលពីរសៀលថ្ងៃទី០៥ ធ្នូ ស្ថិតនៅបរិវេណវត្ត «បេងបុរី» ស្ថិតក្នុងភូមិព្រៃសំរោង ឃុំព្រៃពោន ស្រុកកំពង់ត្របែក …
ខេត្តព្រៃវែង ៖ កាលពីរសៀលថ្ងៃទី០៥ ធ្នូ ស្ថិតនៅបរិវេណវត្ត «បេងបុរី» ស្ថិតក្នុងភូមិព្រៃសំរោង ឃុំព្រៃពោន ស្រុកកំពង់ត្របែក មានពុទ្ធបរិស័ទចំណុះជើងវត្តប្រហែលជាង១០នាក់ តំណាងឱ្យពុទ្ធបរិស័ទជាង១០០នាក់ និងព្រះសង្ឃ៣អង្គផងដែរ នាំគ្នាធ្វើការតវ៉ាដោយបានចោទថា លោកគ្រូព្រះចៅអធិការវត្ត និងគ្រូសូត្រស្តាំ រួមជាមួយលោកតាអាចារ្យធំម្នាក់ បានចាក់សោឃ្លាំងអង្ករមិនឱ្យចង្ហាន់ដល់ព្រះសង្ឃឆាន់ រហូតធ្វើឱ្យព្រះសង្ឃ និងលោកនេនតូចៗ៦អង្គ ទ្រាំលែងកើតបាននិមន្តចេញពីវត្តទៀតផង ។
បើតាមពុទ្ធបរិស័ទបានលើកឡើងទៀតថា វត្តនេះមានតាំងពីដើមមក មិនដែលមានរឿងអាស្រូវអ្វីនោះទេប៉ុន្តែចាប់តាំងពីលោកគ្រូសូត្រស្តាំព្រះនាមជិន ឡន មកគង់នៅវត្តនេះ គឺមានរឿងរកាំរកុះជាប់រហូត និងមានការត្រូវរ៉ូវគ្នាជាមួយអាចារ្យធំឈ្មោះនាង សារិន ដេញដោលគ្នាសោឃ្លាំងអង្ករនៅឯណា និងបានលក់អង្ករអស់ ទុកតែអង្កខ្មួរ ជូនកាលមានសុីម៉ង់ត៍លាយថែមទៀត ដាំបាយឆាន់មិនកើត ធ្វើឱ្យព្រះសង្ឃ និងលោកនេនតូចៗ ដាច់ចង្ហាន់ពេលព្រឹកជាបន្តបន្ទាប់ រហូតមានព្រះសង្ឃអង្គខ្លះ និមន្តទៅឆាន់ចង្ហាន់នៅផ្ទះញ៉ោមទៀតផង ។
បើតាមព្រះសង្ឃ និងលោកនេនតូចៗ បានមានសង្ឃដីកាដែរថា រឿងក្នុងវត្តនេះ ពិតជាមិនខុសពីពុទ្ធបរិស័ទញាតិញ៉ោម ដែលគាត់បានលើកឡើងនោះទេ តែព្រះអង្គចេះតែនាំគ្នាទ្រាំទៅមិនហ៊ានម៉ាត់.កទេ ព្រោះខ្លាចប៉ះពាល់ដល់ព្រះពុទ្ធសាសនា ។ ព្រះសង្ឃនិងលោកនេន មានសង្ឃដីកាបន្តថា ដោយលោកគ្រូសូត្រស្តាំព្រះនាមជិន ឡន និងលោកតាអាចារ្យធំ ឈ្មោះនាង សារិន ជាអ្នកកាន់សោឃ្លាំងអង្ករ ហើយពេលព្រះសង្ឃនិងលោកនេនសួររកសោចាក់យកអង្ករមកដាំបាយ បែរជាគ្រូសូត្រ និងតាអាចារ្យធំ បានរុញដាក់គ្នាទៅវិញទៅមកដោយសួរគ្រូសូត្រថា សោនៅតាអាចារ្យធំគាត់ទៅផ្ទះហើយ ។
ទាក់ទិនករណីនេះ ទើបធ្វើឱ្យពួកគាត់ផ្ទុះការតវ៉ា សូមសំណូមពរឲ្យអាជ្ញាធរស្រុក-ខេត្ត ជាពិសេស មន្ទីរជំនាញធម្មការ និងសាសនា មេត្តាជួយចុះមកត្រួតពិនិត្យមើលផ្ទៃក្នុងវត្តនេះផង និងជួយរៀបចំឲ្យបានសុខស្រួលដូចមុន មានព្រះសង្ឃគង់នៅច្រើនអង្គ ដើម្បីឲ្យពុទ្ធបរិស័ទបានធ្វើបុណ្យដាក់ទានផង ព្រោះសព្វថ្ងៃវត្តនេះ មានព្រះសង្ឃគង់នៅតែ២អង្គគត់ គឺព្រះចៅអធិការ ដែលមានព្រះជន្មច្រើនរញីរញ័រទៅហើយ និងគ្រូសូត្រស្តាំតែប៉ុណ្ណោះ ។
លោកសំ ស៊ន ប្រធានការិយាល័យធម្មការស្រុកកំពង់ត្របែក បានឱ្យដឹងតាមទូរស័ព្ទកាលពីរសៀលថ្ងៃទី០៦ ធ្នូ ថា ការងារនេះរូបលោក និងអនុគុណស្រុកបានចុះទៅសម្របសម្រួលលើកទីមួយហើយ ក្នុងខែវិច្ឆិកាកន្លងមក ដោយត្រូវរ៉ូវគ្នាម្តងហើយ ប៉ុន្តែក្នុងនោះលោកក៏បានស្តីបន្ទោសអ្នកសារព័ត៌មានថា ចុះមកមិនសហការជាមួយអាជ្ញាធរ ។
ចែករំលែកព័តមាននេះ