ខេត្តតាកែវ ៖ ក្រោយពីទទួលពត័មានថាមានកម្មករ-កម្មការីនីពុលដួលសន្លប់ជាបន្តបន្ទាប់រួចមក នៅរសៀលថ្ងៃទី០៦ ខែវិច្ឆិកា ឆ្នាំ២០១៧ លោកឡាយ វណ្ណៈ អភិបាលនៃគណៈអភិបាលខេត្តតាកែវលោកស្រីនូ សុវណ្ណនី ប្រធានសាខាកាកបាទក្រហមកម្ពុជាខេត្តបានអញ្ជើញចុះសួរសុខទុក្ខ និងនាំយកអំណោយលោកឧបនាយករដ្ឋមន្ត្រី ប៊ិន ឈិន ប្រធានក្រុមការងារថ្នាក់ជាតិចុះជួយខេត្តតាកែវ ។
អំណោយមនុស្សធម៌សាខាកាកបាទក្រហមខេត្តជូនដល់កម្មករ-កម្មការីនីចំនួន១៨៩នាក់ជួបបញ្ហាដួលសន្លប់ ក្នុងនោះកម្មករ-កម្មការីនីធ្ងន់ធ្ងរជាងគេត្រូវបានបញ្ជូនទៅមន្ទីពេទ្យបង្អែកខេត្តតាកែវ ហើយរោងចក្រដែលជួបបញ្ហាធ្វើឲ្យកម្មករ-កម្មការីនីដួលសន្លប់នោះគឺរោងចក្រជេឌី & តូយូស៊ីមា ខូអិលធីឌី ស្ថិតនៅឃុំពត់ស ស្រុកបាទី ។
នាឱកាសសួរសុខទុក្ខដល់កម្មករ-កម្មការីនីសម្រាកព្យាបាលនៅមន្ទីរពេទ្យលោកឡាយ វណ្ណៈ អភិបាលខេត្តតាកែវ មានប្រសាសន៍ ផ្តាំផ្ញើពាំនាំនូវសាកសួរសុខទុក្ខពីសំណាក់សម្តេចគតិព្រឹទ្ធបណ្ឌិតប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងលោកឧប ប៊ិន ឈិន មកជម្រាបជូនដល់បងប្អូនកម្មករ-កម្មការនីសេចក្តីនឹករំលឹក ។
លោកអភិបាលខេត្តក៏បានណែនាំ និងជម្រុញដល់ក្រុមគ្រូពេទ្យត្រូវយកចិត្តទុកដាក់ថែទាំ និងព្យាបាលជម្ងឺដល់ពួកគាត់ឲ្យបានដិតដល់ជាទីបំផុត និងពិនិត្យស្ថានភាពជម្ងឺគ្រប់ពេល ហើយដោយឡែកចំពោះបញ្ហាដែលបណ្តាលឲ្យដួលសន្លប់នេះខាងជំនាញក្រសួងការងារ និងបណ្តុះបណ្តាលវិជ្ជាជីវៈរួមនឹងអាជ្ញាធរស្រុក កំពុងតែធ្វើការស៊ើបអង្កេតពិតប្រាកដថា កើតឡើងដោយសារអ្វី? ។
បញ្ហានេះសូមឲ្យមន្ទីរជំនាញសហការណ៍ជាមួយមន្ទីសុខាភិបាលខេត្តស៊ើបអង្កេត រកមូលហេតុឲ្យបានច្បាស់ព្រោះវាធ្វើឲ្យប៉ះពាល់ដល់សុខភាពកម្មករ-កម្មការីនី យើងធ្ងន់ធ្ងរណាស់អញ្ចឹង ហើយសូមឲ្យខាងរោងចក្រជួយសហការណ៍ផង ៕
ចែករំលែកព័តមាននេះ