ខេត្តកំពង់ឆ្នាំង ៖ ផ្លូវមួយកន្លែងប្រវែងជាង៥០០ម៉ែត្រ បច្ចុប្បន្នបានក្លាយជាផ្លូវសេដ្ឋកិច្ចយ៉ាងសំខាន់សម្រាប់អ្នកភូមិចំបកខ្ពស់ ឃុំស្វាយរំពារ ស្រុកកំពង់លែង ដោយសារតែផ្លូវមួយនេះជាច្រកដឹកជញ្ជូនផលស្រូវប្រាំងចំនួន៦៨ហិកតា ប៉ុន្តែដោយសារតែគ្មានការកសាងផ្លូវយ៉ាងសំខាន់នេះបានក្លាយជាផ្លូវយ៉ាងលំបាកក្នុងការដឹកជញ្ជូនស្រូវរបស់ប្រជាពលរដ្ឋនៅទីនោះ ហេតុនេះហើយទាំងលោកមេភូមិ និងប្រជាពលរដ្ឋ បានសំណូមពរ ដល់អាជ្ញាធរ មន្ទីរពាក់ព័ន្ធ និងប្រមុខរាជរដ្ឋាភិបាលសូមមេត្តាជួយកសាងផ្លូវមួយខ្សែនេះដើម្បីសម្រួលដល់ការដឹកជញ្ជូនរបស់ពួកគាត់ផង ។
លោក ឯម អឿន មេភូមិចំបក់ខ្ពស់ ឃុំស្វាយរំពារ ស្រុកកំពង់លែង មានប្រសាសថា ផ្លូវបុរាណ១ខ្យែនេះមានប្រវែងជាង៥០០ម៉ែត្រ បែកចេញពីផ្លូវក្រាលកៅស៊ូក្នុងស្រុកចុះទៅចំណុចស្រែប្រាំងរបស់ប្រជាពលរដ្ឋដែលមានចំនួន៦៨ហិកតា ។ ផ្លូវនេះតាំងពីដើមមកគ្មានការកសាងជួសជុលអ្វីទាំងអស់ប្រជាពលរដ្ឋធ្វើស្រូវប្រាំងបានតែងដឹកចេញតាមផ្លូវនេះរហូតមក ប៉ុន្តែកាលពីដើមមកដីស្រែប្រាំងមិនមានច្រើនដូចសព្វថ្ងៃនេះទេ លុះដល់ដីស្រែប្រាំងចេះតែច្រើន ទិន្នផលស្រូវចេះតែកើនទើបការដឹកជញ្ជូនក៏កាន់តែធំធេង ហេតុនេះហើយផ្លូវដែលគ្មានការជួសជុលកសាងនោះបានរងការខូចខាតលំបាកក្នុងការដឹកជញ្ជូនផលស្រូវតាមគោយន្តត្រូវជាប់ផុង និងពេលខ្លះក្រឡាប់គោយន្ត បង្គ្រោះថ្នាក់ដល់មនុស្សទៀតផង ។ ក្នុងនាមរូបគាត់ជាអាជ្ញាធរភូមិក៏ដូចជាប្រជាពលរដ្ឋដែលកំពុងជួបការលំបាកទាំងនេះសូមសំណូមពរដល់អាជ្ញាធរមន្ទីរសាធារណៈការ ពិសេសប្រមុខរាជរដ្ឋាភិបាលសូមមេត្តាជួយកសាងផ្លូវមួយខ្សែប្រវែងជាង៥០០ម៉ែត្រនេះផង ។
ជាមួយនេះដែរលោក ឌី អឿន មេឃុំស្វាយរំពារបានមានប្រសាសន៍ប្រាប់តាមទូរស័ព្ទថា ផ្លូវលំមួយខ្សែខាងលើនេះកាលដើមឡើយវាធំទូរលាយអាចបើកបរចៀសគ្នាបានស្រួលទៀតផង តែក្រោយមកប្រជាពលរដ្ឋដែលនៅសងខាងផ្លូវខាងលើនេះចេះតែនាំគ្នាបំពានយកម្នាក់បន្តិចៗធ្វើឱ្យផ្លូវនេះរួមតូចចង្អៀតស្ទើរតែមិនអាចចរាចរណ៌បាន ៕
ចែករំលែកព័តមាននេះ