ខេត្តពោធិ៍សាត់ ៖ បុរសជាអ្នកនេសាទម្នាក់ បានត្រូវក្រុមសមត្ថកិច្ចមួយក្រុម បើកកាណូតដេញបាញ់ដល់ផ្ទះ ដោយត្រូវមួយគ្រាប់បៀមជាប់ខ្លួន បណ្ដាលឱ្យរងរបួសយ៉ាងធ្ងន់ធ្ងរ លុះពេលបញ្ជូនទៅសង្គ្រោះនៅ
ឯភ្នំពេញ ក៏បានដាច់ខ្យល់ស្លាប់តាមផ្លូវបាត់ ។ ហេតុការណ៍បាញ់ប្រហារដ៏ឃោរឃៅ បានកើតឡើងកាលពីវេលាម៉ោង១០ និង៥០នាទីព្រឹកថ្ងៃទី០៤ ធ្នូ ស្ថិតនៅលើផ្ទៃទឹកបឹងទន្លេសាប ក្នុងភូមិកោះក្អែក ឃុំរាំងទិល ស្រុកកណ្ដៀង ។
ប្រភពពីអាជ្ញាធរមូលដ្ឋានបានប្រាប់កោះសន្តិភាពឱ្យដឹងថា ជនរងគ្រោះឈ្មោះហោ យ៉ាំងទឹង ភេទប្រុសអាយុ៣៥ឆ្នាំ ជាជនជាតិវៀតណាម និងជាអ្នកនេសាទ រស់នៅភូមិកោះក្អែក ឃុំរាំងទិល ស្រុកកណ្ដៀង ។
ប្រភពបន្តថា នៅថ្ងៃកើតហេតុ ជនរងគ្រោះបានធ្វើនេសាទរាយមងនៅកណ្ដាលទន្លេ ប៉ុន្តែមិនដឹងថា ស្ថិតនៅក្នុងដែនអភិរក្សហាមឃាត់ ឬមួយនៅខាងក្រៅនោះទេ ។ ពេលនោះ ស្រាប់តែមានសមត្ថកិច្ចមួយក្រុមមានគ្នា៥នាក់ ជិះកាណូតមួយគ្រឿងសំដៅមក ។ ឃើញដូច្នេះ អ្នកនេសាទរូបនោះបានបើកកាណូតរត់ ត្រូវសមត្ថកិច្ចដេញតាមរហូតដល់ផ្ទះ ហើយបានបាញ់ចំនួន៣គ្រាប់ (១គ្រាប់ចំគល់ក្លៀកខាងឆ្វេង រួចហើយបើកកាណូតចូលក្នុងព្រៃហក់ចោលគេចខ្លួនបាត់អស់ ។ ភ្លាមៗនោះ សមត្ថកិច្ចចម្រុះបានចុះទៅដល់កន្លែងកើតហេតុ ឃើញនៅលើកាណូតរបស់ក្រុមជនដៃដល់មានកាំភ្លើងអាកាបត់ពីរដើម កាំភ្លើងខ្លីមួយដើម វិទ្យុទាក់ទង២គ្រឿងរូបថត និងឯកសារមួយចំនួនទៀត។
ប្រភពឱ្យដឹងទៀតថា ក្រុមសមត្ថកិច្ចទាំងនោះមានគ្នា៥នាក់ ក្នុងនោះមានបុគ្គលិកអង្គការសហគមន៍០២ ធ្នូចំនួន៣នាក់ និងទាហាន២នាក់ ។ អង្គការសហគមន៍០២ធ្នូ មានទីស្នាក់ការនៅលើផ្ទៃទឹកបឹងទន្លេសាបក្នុងភូមិសាស្ត្រខេត្តពោធិ៍សាត់ ។ចំណែកទាហានអធិការកិច្ច២នាក់ ដែលមកសហការនោះ មានលិខិតបញ្ជាបេសកកម្មពីអង្គភាពថ្នាក់លើ ។
មិនទាន់ដឹងច្បាស់ថា ជាការបង្ក្រាបបទល្មើសនេសាទ ឬមួយមានគំនុំនឹងគ្នាពីមុនមកនោះទេ ប៉ុន្តែមាត់ចាបមាត់ព្រាបនិយាយថា គ្មានអ្វីក្រៅពីមិនបង់លុយឱ្យពួកគេនោះទេ ។ ក្រុមខ្មាន់កាំភ្លើងទាំងនោះ ត្រូវសមត្ថកិច្ចកំពុងធ្វើការស្រាវជ្រាវ តែបានកំណត់មុខសញ្ញាអស់ហើយ ។
ចែករំលែកព័តមាននេះ