រាជធានីភ្នំពេញ ៖ បុរសអ្នកបើកបររថយន្តដឹកកុងតឺន័រម្នាក់ ត្រូវបានតំណាងក្រុមហ៊ុនផែស្ងួតតិចស្រ៊ុន ធ្វើការចាប់ខ្លួនបាន បន្ទាប់មកបាននាំយកទៅប្រគល់ឲ្យនគរបាលប៉ុស្ដិ៍ចោមចៅ៣ សាកសួរកាលពីវេលាម៉ោង៣ និង៣០នាទីរសៀល ថ្ងៃទី៤ ខែធ្នូ ឆ្នាំ២០១៧នេះ។ ក្រោយពេលដែលជននោះធ្វើសកម្មភាព ដោះដូរកង់រថយន្តដោយយកកង់ថ្មីដែលក្រុមហ៊ុនទើបប្ដូរនោះ ទៅដូរយកកង់ចាស់១ទឹក ដាក់ចូលជំនួសវិញនិងឲ្យជាងថែមលុយឲ្យមួយគ្រាប់៧០ដុល្លារ។ សកម្មភាពខាងលើនេះបានកើតឡើងកាលពីប៉ុន្មានថ្ងៃមុនកន្លងមកនេះ ក្នុងខណៈដែលជនសង្ស័យម្នាក់នោះត្រូវក្រុមហ៊ុន តម្រូវឲ្យទៅបើករថយន្តដឹកទំនិញ ចេញពីក្នុងទីរួមខេត្តព្រះសីហនុមកភ្នំពេញ ហើយពេលចេញពីទីរួមខេត្តបានចម្ងាយប្រមាណជាង២គីឡូម៉ែត្រ ក៏បានឈប់រថយន្តធ្វើសកម្មភាពខាងលើតែម្ដង។
ចំណែកនគរបាលប៉ុស្ដិ៍ចោមចៅ៣ ក្រោយពីការសួរនាំរួចមួយជំហានដឹងថា ចំណុចកើតហេតុដែលជាកន្លែងដោះដូរកង់រថយន្តស្ថិតនៅក្នុង ភូមិសាស្ត្រខេត្តព្រះសីហនុ នគរបាលប៉ុស្ដិ៍ចោមចៅ៣ បានបញ្ជូនជននោះទៅកាន់ទីនោះវិញ នាវេលាល្ងាចថ្ងៃដដែលនោះដើម្បីឲ្យនគរបាលខេត្តព្រះសីហនុចាត់ការតាមច្បាប់។ ជនសង្ស័យដែលត្រូវចាប់ខ្លួននោះឈ្មោះ ង៉ាំ មន អាយុប្រហែល៣០ឆ្នាំ មានទីលំនៅក្នុងខេត្តតាកែវ ហើយសព្វថ្ងៃស្នាក់នៅក្នុងក្រុម ហ៊ុនផែស្ងួត តិច ស្រ៊ុន ដែលមានទីតាំងស្ថិតនៅតាមបណ្ដោយ ផ្លូវជាតិលេខ៤ ខាងលិចផ្សារជម្ពូវ័ន ក្នុងភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។ នគរបាលបានប្រាប់ឲ្យដឹងថា កាលពីប៉ុន្មានថ្ងៃមុនពេលកើតហេតុចាប់ខ្លួន ជនសង្ស័យបានបើកបររថយន្តដឹកកុងតឺន័រ១គ្រឿង ដឹកទំនិញពីកំពង់ផែខេត្តព្រះសីហនុ ចូលមកភ្នំពេញ ហើយរថយន្តនោះទៀតសោតក្រុមហ៊ុនទើបប្ដូរកង់ថ្មីៗ ដើម្បីសុវត្ថិភាពក្នុងការដឹកជញ្ជូន លុះពេលបើកចេញពីទីរួមខេត្តព្រះសីហនុ បានចម្ងាយប្រមាណជាង២គីឡូម៉ែត្រ ក៏បានឈប់នៅកន្លែងជាងប៉ះកង់រថយន្ត។
បន្ទាប់មកបានឃុបឃិតគ្នាជាមួយជាងប៉ះកង់រថយន្ត ដោះយកកង់រថយន្តថ្មីពីរថយន្តកុងតឺន័រ ដែលខ្លួនបើកបរ ដែលក្រុមហ៊ុនទើបទិញដាក់ថ្មីៗនោះ ដូរជាមួយកង់រថយន្ត១ទឹកដែលជាងដាក់លក់ ហើយជាងបានថែមលុយចំនួន៧០ដុល្លារ ប៉ុន្តែខណៈនោះដោះដូរតែ១គ្រាប់ទេ បន្ទាប់មកទើបចេញដំណើរបន្តមកភ្នំពេញ។ ប្រភពដដែលបានបន្តទៀតថា លុះពេលបើកបរទៅដល់ក្នុងភូមិសាស្ត្រស្រុកភ្នំស្រួច ខេត្តកំពង់ស្ពឺ ជនសង្ស័យបានឈប់នៅកន្លែងជាងប៉ះកង់រថយន្ត១កន្លែងទៀត ហើយបានដោះឃុបឃិតជាមួយជាងនៅទីនោះ និងបានដោះដូរកង់ថ្មី១គ្រាប់ចេញ ទៀតដោយដាក់ជំនួសនូវកង់ចាស់១ទឹកចូល ហើយជាងបានថែមលុយឲ្យចំនួន៧០ដុល្លារទៀត។ ក្រោយមកទើបបន្តដំណើរចូលមកភ្នំពេញយករថយន្តចូលទៅទុកនៅក្នុងផែស្ងួត តិច ស្រ៊ុន ហើយធ្វើមិនដឹងខ្លួនដោយនឹកស្មានថា គ្មានរឿងអ្វីកើតឡើងចំពោះខ្លួននោះទេ។
ប៉ុន្តែរហូតដល់វេលារសៀលថ្ងៃទី៤ ខែធ្នូ តំណាងក្រុមហ៊ុនបានពិនិត្យមើលរថយន្ត ហើយបានដឹងថាបាត់កង់ថ្មីដែលទើបដូរដាក់ ស្រាប់តែឃើញសុទ្ធតែកង់ចាស់ទើបធ្វើការឃាត់ខ្លួនអ្នកបើកបររូបនោះសួរនាំ ហើយបានដឹងថារូបគេបានដោះដូរកង់រថយន្តនោះមែន។ ប្រភពខាងលើបានបន្តថា ក្រោយពីឃាត់ខ្លួនបានតំណាងក្រុមហ៊ុន បាននាំជននោះទៅប្រគល់ជូននគរបាលប៉ុស្ដិ៍ចោមចៅ៣ សាកសួរ ហើយជនសង្ស័យបានសារភាពពីសកម្មភាពរបស់ខ្លួនទាំងអស់ និងបានសុខចិត្តសងការខាតបង់ទៅក្រុមហ៊ុន ដោយឲ្យប្រពន្ធយកលុយពីស្រុកមកឲ្យក្រុមហ៊ុន ពេលនោះខាងក្រុមហ៊ុនក៏បានយល់ព្រមទទួលយកបញ្ចប់រឿងដែរ។ ប៉ុន្តែរង់ចាំយកលុយសំណងចាំបាត់ៗមិនឃើញ ទើបក្រុមហ៊ុនសំណូមពរឲ្យនគរបាលចាត់ការតាមច្បាប់ ហើយនៅវេលាល្ងាចថ្ងៃដដែលនោះ នគរបាលប៉ុស្ដិ៍ចោមចៅ៣ បានបញ្ជូនជននោះទៅកាន់ខេត្តព្រះសីហនុវិញតាមរថយន្តរបស់តំណងក្រុមហ៊ុន ដើម្បីឲ្យនគរបាលខេត្តព្រះសីហនុចាត់ការតាមច្បាប់វិញ៕
https://youtu.be/A8ouBPqSAm4
ចែករំលែកព័តមាននេះ