ខេត្តព្រៃវែង ៖ អគារសិក្សាថ្មីមួយខ្នងមាន០៦បន្ទប់ នៅសាលាបឋមសិក្សាខ្នាយកូវ ភូមិខ្នាយកូវ ឃុំត្នោត ស្រុកកញ្ជ្រៀច សាងសង់អំពីបេតុងប្រក់ក្បឿង រួមនឹងសមិទ្ធផលផ្សេងៗទៀត ដែលមានតម្លៃជិត១០ម៉ឺនដុល្លារ ដែលជាអំណោយរបស់សប្បុរសជនជប៉ុន មានលោក SUZUKI លោក NAKAMURA ប្រធានមូលនិធិGCU និងលោកស្រី MI WA ត្រូវបានដាក់សម្ពោធឲ្យប្រើប្រាស់នាព្រឹកថ្ងៃទី០៤ ធ្នូ ២០១៧នេះ។ ដោយបានធ្វើឡើងក្រោមអធិបតីភាពលោកបណ្ឌិត ស៊ាង ប៊ុនលាង ទីប្រឹក្សាផ្ទាល់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវ ហ៊ុន ប៊ុនធឿន ទីប្រឹក្សាអមក្រសួងការបរទេស និងសហប្រតិបត្តិការអន្តរជាតិ។
លោក ប៊ិន ជីវ័ន្ត អភិបាលស្រុកកញ្ជ្រៀច បានថ្លែងឲ្យដឹងថា បច្ចុប្បន្នវិស័យអប់រំស្រុកកញ្ជ្រៀចមានការរីកចម្រើនគួរឲ្យកត់សម្គាល់ មានសាលារៀនគ្រប់កម្រិតចំនួន៤៣កន្លែង មានអគារសិក្សាចំនួន១០១ខ្នង ស្មើ៤២៩បន្ទប់ ក្នុងនោះវិទ្យាល័យមាន១កន្លែង មានអគារ៧ខ្នង ស្មើ៣៦បន្ទប់ អនុវិទ្យាល័យមាន៧កន្លែង មានអគារ១៨ខ្នង ស្មើ៦១បន្ទប់ បឋមសិក្សា៣៥កន្លែង មានអគារ៨៣ខ្នង ស្មើ៣៣៧បន្ទប់ មាន៧កម្រងសាលារៀន មត្តេយ្យសិក្សារដ្ឋមាន១៦កន្លែង ស្នើនឹង២១ថ្នាក់ មត្តេយ្យសិក្សាសហគមន៍ចំនួន៥៧ថ្នាក់ ស្មើនង៥៧ភូមិ គ្រូបង្រៀនសរុប៣៧៤នាក់ ស្រី១៣៨នាក់ សិស្សានុសិស្សសរុប១៣.៧២៧នាក់ ស្រី៦.៥៦៥នាក់។
លោក ប៊ិន ជីវ័ន្ត អភិបាលស្រុកកញ្ជ្រៀចថ្លែងបន្តថា ដោយឡែកសាលាបឋមសិក្សាខ្នាយកូវ មានគ្រូចំនួន០៦នាក់ ស្រី០៥នាក់ សិស្សានុសិស្សសរុបចំនួន២១៦នាក់ ស្រី៩៥នាក់ មកពីភូមិខ្នាយកូវ និងភូមិស្វាយចេក។ សាលាមានអគារសិក្សា០១ខ្នង ស្មើនឹង០៥បន្ទប់ ក្នុងនោះ០១បន្ទប់សម្រាប់ទីចាត់ការ និងនៅសល់០៤បន្ទប់ សម្រាប់បម្រើសកម្មភាពបង្រៀន និងរៀនចំនួន០២វេន ដែលជាហេតុនាំឲ្យខ្វះបន្ទប់សិក្សា និងបន្ទប់បណ្ណាល័យ។ ដោយពិនិត្យឃើញពីកំណើននៃការចូលរៀនរបស់សិស្សានុសិស្សមានការកើនឡើងជាលំដាប់ និងឆ្លើយតបការលំបាកខាងលើ ទើបលោកបណ្ឌិត ស៊ាង ប៊ុនលាង បានខិតខំប្រឹងប្រែងកៀងគរសប្បុរសជនក្នុងនោះតាមរយៈមូលនិធិ ជី ស៊ី យូ ជប៉ុន ដែលបានផ្តល់ជូនអគារសិក្សាថ្មី០១ខ្នង មាន០៦បន្ទប់ បង្គន់អនាម័យ០១ខ្នង មាន០៤បន្ទប់ និងទោងសម្រាប់ក្មេងជិះលេង១ឈុត។
អគារថ្មីនេះបានចាប់ផ្តើមកសាងនៅថ្ងៃទី១៤ ខែសីហា ឆ្នាំ២០១៧ និងបញ្ចប់ការសាងសង់ជាស្ថាពរនៅថ្ងៃទី១៣ វិច្ឆិកា ២០១៧ ដោយបានចំណាយថវិការអស់ចំនួន៧៨.០០០ដុល្លារ ស្មើនឹង៣១២លានរៀល ក្នុងនោះគណៈកម្មការទ្រទ្រង់សាលា លោកគ្រ អ្នកគ្រូ និងសប្បុរសជនបានចូលរួមថវិកា ដើម្បីចាក់ដីបំពេញទីធ្លាសាលាអស់ថវិកាចំនួន១៧២០.០០០រៀលផងដែរ។ លោក SUZUKI ប្រធានក្រុមហ៊ុនអចលនទ្រព្យនៅប្រទេសជប៉ុន មានប្រសាសន៍ថា ដោយសារតែមានការស្នើសុំពីលោកបណ្ឌិត ស៊ាង ប៊ុនលាង នូវអគារសិក្សាថ្មី០១ខ្នងនៅក្នុងសាលាបឋមសិក្សាខាងលើ មានពេលមួយនោះរូបលោកបាននាំគ្នាហូបបាយជុំគ្នា ហើយសមាគមន៍សាងសង់នៅប្រទេសជប៉ុនក៏បានយល់ព្រមសាងសង់អគារសិក្សា ដែលកំពុងតែមានការខ្វះខាតនៅ សាលាបឋមសិក្សាខ្នាយកូវ។
ជាមួយនោះសូមឪពុកម្តាយមេត្តាបញ្ជូនកូនមករៀនសូត្រឲ្យបានគ្រប់ៗគ្នា ដើម្បីឲ្យមានអនាគតភ្លឺស្វាង មិនដឹងថា នៅថ្ងៃអនាគតក្មេងៗទាំងនោះនឹងក្លាយទៅជានាយកក្រុមហ៊ុន នាយករដ្ឋមន្ត្រីក៏អាចថាបាន សូមឲ្យសាលារៀននេះក្លាយទៅជាថ្នាលបណ្តុះនូវចំណេះវិជ្ជា ដល់ក្មេងៗគ្រប់ជំនាន់ផងដែរ។ ហើយប្អូនៗប្រៀបបានដូចជាគ្រាប់ពេជ្រ ដ៏មានតម្លៃសម្រាប់ប្រទេសកម្ពុជា។ លោកស្រី MI WA ប្រធានអង្គការជប៉ុនប្រចាំប្រទេសកម្ពុជា(Globe jungle) ថ្លែងឲ្យដឹងថា រូបគាត់ផ្ទាល់បានមករស់នៅប្រទេសកម្ពុជាជាង១០ឆ្នាំហើយ ជាមួយនោះថែមទាំងចូលចិត្តហូបប្រហុករបស់ខ្មែរដែ
លមានរសជាតិឆ្ងាញ់ ព្រមទាំងមុខម្ហូបផ្សេងៗទៀត ហើយថែមទាំងស្រលាញ់ក្មេងៗកម្ពុជាថែមទៀត។
នៅពេលដែលប្អូនៗមករៀននៅសាលា ប្រសិនណាបើសិនជាមិនយល់នូវមេរៀនណាមួយត្រូវសួរទៅមិត្តភក្តិដែលចេះ ឬក៏សួរទៅគ្រូ ហើយនៅព្រឹកនេះពិតជាមានសំណាង ដោយបានទទួលអគារសិក្សា១ខ្នងថ្មីសន្លាងដូច្នេះត្រូវតែប្រឹងប្រែងរៀនសូត្រ ថវិកាដែលបានមកគឺដោយសារការបរិច្ចាគនូវថវិកាផ្ទាល់ខ្លួនម្នាក់បន្តិចៗទើបធ្វើឲ្យអគារសិក្សានេះបានកកើតឡើង ជាមួយនោះប្រជាជនជប៉ុននឹងបន្តជួ
យផ្នែកមនុស្សធម៌ដល់ប្រទេសកម្ពុជាបន្តទៀត។ លោកបណ្ឌិត ស៊ាង ប៊ុនលាង ទីប្រឹក្សាផ្ទាល់សម្តេចតេជោ មានប្រសាសន៍ឲ្យដឹងដែរថា ដោយមានការយកចិត្តទុកដាក់ពីប្រមុខរាជរដ្ឋាភិបាលកម្ពុជានោះ ការធ្វើសំបុត្រកំណើត អត្តសញ្ញាណប័ណ្ណមិនឲ្យយកលុយនោះទេ សូម្បីតែស្ពានដែលជារបស់ឯកជន ធ្វើតែធ្វើដំណើរឆ្លងកាត់ត្រូវចំណាយថវិកា ក៏ត្រូវបានរដ្ឋទិញមកវិញដោយប្រជាពលរដ្ឋមិនបាច់ចំណាយលុយទៀតឡើយ។
សូមឲ្យឪពុកម្តាយត្រូវតែត្រួតពិនិត្យមើលសៀវភៅរបស់កូនថា តើកូននោះពិតជាបានមករៀនមែនឬអត់? បើពឹងតែទៅលើគ្រូបង្រៀននោះមិនអាចទៅរួចទេ ទាល់តែមានកិច្ចសហការគ្នាទើបទទួលបានជោគជ័យ។ ជាមួយនោះសូមក្មួយ និងចៅត្រូវតែនាំគ្នាថែរក្សាអគារសិក្សានេះ ធ្វើយ៉ាងណាប្រើប្រាស់ឲ្យបានយូរអង្វែងទៅថ្ងៃអនាគតហើយប្រឹងប្រែងសម្អាតទីធ្លាឲ្យបានស្អាត ដើម្បីមានការប្រកួតប្រជែងជាមួយនឹងសាលារៀននៅកន្លែងផ្សេងៗទៀត ដើម្បីឈានទៅចាប់យករំដួល៣ទងផងដែរ៕
https://youtu.be/02d3GLUmFNY
ចែករំលែកព័តមាននេះ