ខេត្តបន្ទាយមានជ័យ ៖ តាមអនុក្រឹតរបស់រាជរដ្ឋាភិបាលកម្ពុជា លោក ង៉ោ ម៉េងជ្រួន អភិបាលក្រុងប៉ោយប៉ែត ត្រូវបានប្រកាសតែងតាំងមុខតំណែងជាអភិបាលរង នៃគណៈអភិបាលខេត្តបន្ទាយមានជ័យ ជំនួសលោកស្រី…
ខេត្តបន្ទាយមានជ័យ ៖ តាមអនុក្រឹតរបស់រាជរដ្ឋាភិបាលកម្ពុជា លោក ង៉ោ ម៉េងជ្រួន អភិបាលក្រុងប៉ោយប៉ែត ត្រូវបានប្រកាសតែងតាំងមុខតំណែងជាអភិបាលរង នៃគណៈអភិបាលខេត្តបន្ទាយមានជ័យ ជំនួសលោកស្រី ចាន់ ថេង ដែលត្រូវបានផ្ទេរភារកិច្ច ទៅបម្រើការងារនៅទីស្តីការក្រសួងមហាផ្ទៃ។ កម្មវិធីនេះ ប្រារព្ធធ្វើឡើងនៅសាលាខេត្តបន្ទាយមានជ័យ នៅថ្ងៃទី០៤ ខែធ្នូ ឆ្នាំ២០១៧ ក្រោមអធិបតីភាព ឯកឧត្តម ប៉ាវ ហមផានរដ្ឋ លេខាធិការក្រសួងមហាផ្ទៃ តំណាងដ៏ខ្ពង់ខ្ពស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដោយការចូលរួមពី ឯកឧត្តម អស់លោក ជាអភិបាល អភិបាលរងខេត្ត ថ្នាក់ដឹកនាំមន្ទីរ អង្គភាពនានាជុំវិញខេត្ត និងកងកម្លាំងប្រដាប់អាវុធ អាជ្ញាធរមូលដ្ឋាន ក្រុង/ស្រុក ឃុំ/សង្កាត់ និស្សិត ជាច្រើនរូប។
ឯកឧត្តម សួន បវរ អភិបាលនៃគណៈអភិបាលខេត្តបន្ទាយមានជ័យ មានមតិស្វាគមន៍ និងបានធ្វើសេចក្តីរាយការណ៍ថា ខេត្តបន្ទាយមានជ័យ សភាពការណ៍សន្តិសុខ សណ្តាប់ធ្នាប់មានលក្ខណៈល្អប្រសើរ ទាំងនៅក្នុងភូមិសាស្ត្រ និងនៅតាមតំបន់ព្រំដែន។ ការអនុវត្តគោលនយោបាយភូមិ/ឃុំ មានសុវត្ថិភាព នៅតែជាគន្លឹះ ក្នុងការអប់រំ ទប់ស្កាត់ និងបង្ក្រាបជុំវិញបទល្មើសផ្សេងៗ ដូចជា ចោរប្លន់ប្រដាប់អាវុធ ការប្រើប្រាស់ និងជួញដូរគ្រឿងញៀន ការជួញដូរមនុស្ស ការឆ្លងដែនដោយខុសច្បាប់ អំពើហិង្សាក្នុងគ្រួសារជាដើម។ គណៈបញ្ជាការរដ្ឋបាលខេត្តបន្ទាយមានជ័យ គ្រប់គ្រងសភាពការណ៍បានល្អប្រសើរ ពិសេសរក្សាបាននូវស្ថិរភាពនយោបាយ សន្តិសុខ និងសណ្តាប់ធ្នាប់ជូនប្រជាពលរដ្ឋ។
ក្នុងនោះដែរ ស្របតាមគោលនយោបាយ ឈ្នះឈ្នះ របស់សម្តេចនាយករដ្ឋមន្ត្រី ក្រុមប្រឹក្សា ឃុំ/សង្កាត់ ដែលជាអតីត សមាជិកសង្គ្រោះជាតិ បានចូលមករួមរស់ជីវភាពជាមួយគណបក្សប្រជាជនកម្ពុជាចំនួន១៤៦នាក់ ស្មើនឹង៥៣% បន្ទាប់ពីគណបក្សសង្គ្រោះជាតិត្រូវបានតុលាការកំពូលធ្វើការរំលាយ កាលពីថ្ងៃទី១៦ ខែវិច្ឆិកា ឆ្នាំ២០១៧កន្លងមកនេះ។ មានប្រសាសន៍សំណេះសំណាលនាឱកាសនោះ ឯកឧត្តម ប៉ាវ ហមផាន រដ្ឋលេខាធិការក្រសួងមហាផ្ទៃ បានថ្លែងនូវការកោតសរសើររបស់រដ្ឋបាលខេត្តបន្ទាយមានជ័យ ដែលបានខិតខំប្រឹងប្រែងយ៉ាងសកម្ម ក្នុងការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាលសម្រាប់អាណត្តិទី៥ នៃរដ្ឋសភាជាតិ និងបានជំរុញការអភិវឌ្ឍន៍ខេត្តបន្ទាយមានជ័យ ឲ្យមានការរីកចម្រើនលើគ្រប់វិស័យ។ ពិសេសអាជ្ញាធរ កងកម្លាំងប្រដាប់អាវុធ ដែលបានយកចិត្តទុកដាក់បំពេញការងារ រក្សាសន្តិសុខ សណ្តាប់ធ្នាប់សាធារណៈ បានល្អប្រសើរ។
ឯកឧត្តម រដ្ឋលេខាធិការ បានសង្កត់ធ្ងន់ថា ក្នុងនាមមន្ត្រីរបស់រាជរដ្ឋាភិបាលដែលត្រូវបានតែងតាំង ដើម្បីធ្វើឲ្យបានត្រឹមត្រូវគឺត្រូវផ្អែកទៅលើមូលដ្ឋាន លក្ខណៈសម្បត្តិរបស់មន្ត្រីរដ្ឋបាលសាធារណៈ គឺមាន៤ជាសំខាន់គឺ១/-មានឆន្ទៈ ម្ចាស់ការ បើគ្មានឆន្ទៈ គ្មានទឹកចិត្តមោះមុត ដើម្បីបំពេញការងារនោះឡើយ,ទី២/-គឺមានភក្តីភាពចំពោះរាជរដ្ឋាភិបាល និងកម្មវិធីនយោបាយរបស់រាជរដ្ឋាភិបាល ភក្តីភាពចំពោះប្រជាពលរដ្ឋ គោរពផលប្រយោជន៍សាធារណៈ និងផលប្រយោជន៍របស់ប្រជាពលរដ្ឋ,ទី៣/-មានសីលធម៌វិជ្ជាជីវៈ បំពេញកិច្ចការប្រកបដោយតម្លាភាព សមត្ថភាព និងប្រសិទ្ធភាព,ទី៤/-វប្បធម៌សេវាសាធារណៈ គឺបម្រើប្រជាពលរដ្ឋឲ្យកាន់តែប្រសើរឡើង ម្យ៉ាងវិញទៀតគឺត្រូវតែផ្លាស់ប្តូរឥរិយាបថ ពីអ្នកត្រួតត្រាមកការបម្រើប្រជាពលរដ្ឋ ដែលបច្ចុប្បន្ននេះយើងកំពុងតែបំពេញ។ ចុងក្រោយឯកឧត្តម ប៉ាវ ហមផាន ក៏បានផ្តាំផ្ញើដល់ កងកម្លាំងប្រដាប់អាវុធ អាជ្ញាធរ នៅតាមព្រំដែន ត្រូវធ្វើការទប់ស្កាត់ទំនិញគេចពន្ធ និងពលករឆ្លងដែនខុសច្បាប់ទៅរកការងារធ្វើនៅប្រទេសជិតខាងនោះផងដែរ៕
ចែករំលែកព័តមាននេះ