រាជធានីភ្នំពេញ ៖ ប្រឡាយបង្ហូរទឹកស្អុយដ៏ធំមួយខ្សែ លាតសន្ធឹងពីប្រព័ន្ធបង្ហូរទឹកស្ថានីយបឹងសាឡាងរហូតដល់ស្ថាននីយប៊ូមទឹកបឹងទំពុន បច្ចុប្បន្នត្រូវបានគេសង្កេតឃើញប្រជាពលរដ្ឋដែលរស់នៅជុំវិញសងខាងមាត់ប្រឡាយបានបោះសំរាមចូលនៅក្នុងប្រឡាយ ធ្វើឲ្យកកស្ទះណែនណាន់តាន់តាប់ ហើយគ្មានមន្ត្រីជំនាញណាចុះស្តារ ឬក៏ប្រមូលសំរាមទាំងនោះចោលបានទៀងទាត់ឡើយ។ ជាក់ស្តែងដូចជានៅចំណុចស្ពានទី២ ស្ថិតក្នុងភូមិចំរើនផល សង្កាត់បឹងទំពុន១ ខណ្ឌមានជ័យ និងចំណុចដទៃទៀតជាច្រើន នៅក្នុងភូមិសាស្ត្រសង្កាត់បឹងទំពុនដដែលនេះ ប្រឡាយទាំងមូលកំពុងក្លាយទៅជាគំនរសំរាម គរដូចកន្លែងសម្រាប់ចោលសំរាម ដែលក្រឡេកមើលទៅលែងមើលឃើញផ្ទៃទឹក ក៏ដូចជាផ្ទៃប្រឡាយទាំងមូលទៅហើយ។
លោកស្រី ខឹម វណ្ណី នាយករងរដ្ឋបាលទទួលបន្ទុកបរិស្ថាន បានឲ្យដឹងថា ការស្តារប្រឡាយលូ គឺជាតួនាទីរបស់មន្ទីរសាធារណៈការរាជធានីភ្នំពេញ មិនមែនថ្នាក់ខណ្ឌ ឬសង្កាត់ឡើយ។ ប៉ុន្តែទន្ទឹមនឹងនោះលោកស្រីសោកស្តាយដែលបងប្អូនពលរដ្ឋយើងតែងនាំគ្នាយកសំរាមទៅចោលក្នុងប្រឡាយលូបង្ហូរទឹកនោះជាបន្តបន្ទាប់រហូត បើទោះបីជាអាជ្ញាធរព្យាយាមពន្យល់ណែនាំយ៉ាងណាក៏ដោយ។
ជាមួយគ្នានេះដែរ អាជ្ញាធរក៏មានការសំណូមពរទៅដល់អ្នករស់នៅប្របសងខាងមាត់ប្រឡាយលូបង្ហូរទឹក គួរតែនាំគ្នាវេចខ្ចប់សំរាមគរទុកដើម្បីក្រុមហ៊ុន ប្រមូលសំរាមយកទៅចោលទៅតាមជើងប្រមូលរបស់រថយន្តប្រមូលសំរាមឲ្យបានទៀងទាត់ ចៀសវាងការបោះចោលលើផ្ទៃប្រឡាយធ្វើឲ្យកកស្ទះទឹកស្អុយដែលហូរចេញពីលំនៅឋានរបស់បងប្អូន បង្កឲ្យមានការជន់លិចជាអន្លើៗនៅតំបន់ជាយក្រុង ពិសេសភូមិសាស្ត្រតំបន់សង្កាត់បឹងទំពុន និងសង្កាត់ស្ទឹងមានជ័យ ខណ្ឌមានជ័យខាងលើផងដែរ។ សូមបញ្ជាក់ថា កាលពីពេលកន្លងទៅ គេក៏ធ្លាប់សង្កេតឃើញមានក្រុមមន្ត្រីជំនាញចុះស្តារសំរាមចេញពីតំបន់ខាងលើដែរ ប៉ុន្តែស្តារបានតែមួយខែប៉ុណ្ណោះ ទីតាំងផ្ទៃប្រឡាយទាំងមូលប្រែក្លាយមកជាគំនរសំរាមដូចដើមវិញទៅហើយ៕
https://youtu.be/iX6o9Jxu_X8
ចែករំលែកព័តមាននេះ