ខេត្តបាត់ដំបង ៖ រថយន្តម៉ាកឡិចស៊ីស៥៧០ ស៊េរីឆ្នាំ២០១៨មួយគ្រឿង បានរងការខូចខាតស្ទើរទាំងស្រុងមួយកំណាត់មុខ ដោយសារបុកជាមួយរថយន្តដឹកប្រេងរបស់ក្រុមហ៊ុនតេលា កាលពីវេលាម៉ោង១២ថ្ងៃត្រង់ថ្ងៃទី០៣ ធ្នូ នៅលើផ្លូវជាតិលេខ៥ ត្រង់ចំណុចភូមិកកោះ ឃុំកកោះ ស្រុកមោងឬស្សី ខណ:កំពុងធ្វើដំណើរផ្ទុយគ្នាពីបាត់ដំបង ទៅភ្នំពេញ ។
សមត្ថកិច្ចបានរាយការណ៍ថា រថយន្តម៉ាកឡិចស៊ីស៥៧០ ពណ៏សស៊េរីឆ្នាំ២០១៨ គ្មានស្លាកលេខទេ បើកបរដោយបុរសម្នាក់ឈ្មោះស៊ុម សុផាត អាយុ៥០ឆ្នាំ នៅភូមិ៤ សង្កាត់ទំនប់ទឹក ខ័ណ្ឌចំការមន រាជធានីភ្នំពេញ ធ្វើដំណើរពីលិចទៅកើត រីឯរថយន្តម្ខាងទៀតជារថយន្តស៊ីទែនដឹកប្រេងរបស់ក្រុមហ៊ុនតេលា ពាក់ស្លាកលេខ ភ្នំពេញ4A-4032 បើកបរដោយបុរសម្នាក់ឈ្នោះជីម ប៊ុនលៀង អាយុ២៩ឆ្នាំ ធ្វើដំណើរពីកើតទៅលិច(ផ្ទុយគ្នា) ។ សមត្ថកិច្ចបានបញ្ជាក់ថា បើតាមពិនិត្យស្លាកស្នាមជាក់ស្ដែង រថយន្តដឹកប្រេងនេះទំនងជាជ្រុលចង្កូតទៅបុករថយន្តម៉ាកឡិចស៊ីស៥៧០ដែលមានតំលៃជាង២០ម៉ឺនដុល្លានេះ ដោយសារឡើងជែងរថយន្តមួយគ្រឿងទៀតមិនផុត ។ រថយន្តទាំង២បានរងការខូចខាតផ្នែកខាងមុចដូចគ្នា តែរថយន្តឡិចស៊ិសធ្ងន់ធ្ងរជាង ហើយថែមទាំងរបួសស្ត្រីម្នាក់ ដែលជិះក្នុងរថយន្តឡិចស៊ិសនោះផង។ បើតាមប្រភពព័ត៌មានបានប្រាប់ដែរថា រថយន្តឡិចស៊ិសនោះជារថយន្តរបស់ដង្លងលោកឧត្តមសេនីយសុខ ផល អគ្គនាយកដ្ឋានអន្តោរប្រវែសន៏ ហើយក្រោយកើតហេតុគេឃើញលោកសុខ ផល ក៏មានវត្តមាននៅទីនោះដែរ។
សាក្សីនៅកន្លែងកើតហេតុបាននិយាយប្រាប់សមត្ថកិច្ចថា រថយន្តទាំង២គ្រឿងពិតជាធ្វើដំណើរបញ្ច្រាសទិសគ្នាមែន តែគេឃើញរថយន្តដឹកប្រេងបានជ្រុលចង្កូតទៅបុករថយន្តស៊េរីទំនើបនោះទាំងកំរោល។ ប្រភពដដែលបានបញ្ជាក់ថា នៅកន្លែងកើតហេតុនោះមានរថយន្តពេទ្យមួយគ្រឿងខូចមិនទៅមុខឆេះហុយតែផ្សែង ហើយឈប់លើចិញ្ចើមថ្នល់។ ពេលបើកដល់ចំណុចនេះគេឃើញរថយន្តដឹកប្រេងបានព្យាយាមបើកឡើងជែងរថយន្តដែលឆេះហុយតែផ្សែងនោះ តែឡើងមិនផុតក៏ជ្រុលទៅបុករថយន្តឡិចស៊ិសដែលបើកមកដល់ទីនោះទាំងកំរោលបណ្ដាលឲ្យខូចខាតផ្នែកខាងមុខ និងធ្វើឲ្យស្ត្រីម្នាក់ដែលជិះរថយន្តឡិចស៊ិសរងរបួសស្រាល។
មន្ត្រីចរាចរណ៍ស្រុកមោងប្ញស្សីក៏បានចុះទៅកាន់កន្លែងកើតហេតុភ្លាមៗដែរ ដើម្បពិនិត្យនិងធ្វើការវាស់
វែង។ មន្ត្រីចរាចរណ៏បាននិយាយថា បើតាមការពិនិត្យកន្លែងកើតហេតុ គេអាចសន្និដ្ឋានជាបឋមថា កំហុសភាគច្រើនបង្កឡើងដោយរថយន្តដឹកប្រេង ដែលបើកឡើងជែងរថយន្តមួយគ្រឿងទៀត ដោយខ្វះការប្រុងប្រយ័ត្ន ទើបបង្កឲ្យមានគ្រោះថ្នាក់បែបនេះ ។
ទោះជាយ៉ាងណាមន្ត្រីជំនាញបាននិយាយថា ជុំវិញករណីនេះ ភាគីទាំង២បានសម្របសម្រូលគ្នានៅកន្លែងកើតហេតុ ដោយភាគីខាងរថយន្តដឹកប្រេងជាអ្នកទទូលខុសត្រូវសំណងទាំងស្រុង ឲ្យទៅភាគីរថយន្តឡិចស៊ិស៥៧០ស៊េរីឆ្នាំ២០១៨ ដែលគេអះអាងថា មានតម្លៃដល់ទៅជាង២០ម៉ឺនដុល្លា ៕
ចែករំលែកព័តមាននេះ