ខេត្តកំពង់ស្ពឺ ៖ បុរសម្នាក់កំពុងដើរឆ្លងថ្នល់ពេលព្រលប់ៗ ត្រូវក្មេងប្រុសជំទង់ម្នាក់ បើកម៉ូតូឌុបព្រះសង្ឃ២អង្គ ជ្រុលចង្កូតបុកពេញទំហឹង បណ្ដាលឲ្យជនរងគ្រោះដួលបោកនឹងថ្នល់រងរបួសធ្ងន់ ។ ចំណែកអ្នកបើកម៉ូតូ និងព្រះសង្ឃរងរបួសស្រាល ។
គ្រោះថ្នាក់ចរាចរខាងលើនេះ បានកើតឡើងនៅវេលាម៉ោង០៦ល្ងាច ថ្ងៃទី០១ ខែធ្នូ ឆ្នាំ២០១៧ ស្ថិតតាមបណ្ដោយផ្លូវក្រាលកៅស៊ូ ក្នុងភូមិខ្នងក្រាំង ឃុំតាំងសំរោង ស្រុកភ្នំស្រួច ខេត្តកំពង់ស្ពឺ ។
ប្រភពព័ត៌មានពីសមត្ថកិច្ចបានឲ្យដឹងថា ម៉ូតូបង្កម៉ាកហុងដាឌ្រីម ស៊េរី២០១៧ ពាក់ស្លាកលេខ កំពង់ស្ពឺ ១J-៨៧០១ បើកបរដោយក្មេងប្រុសជំទង់ម្នាក់ឈ្មោះ យ៉ុន សុភ័ក្រ អាយុ១៦ឆ្នាំ បានដឹកព្រះសង្ឃ២អង្គ ទី១.ព្រះនាម គឹម ចន្នី ព្រះជន្ម២៦ឆ្នាំ ទី២.ព្រះនាម ជិន គង់ ព្រះជន្ម២៥ឆ្នាំ ។ ព្រះសង្ឃទាំង២អង្គគង់នៅវត្តស្លាបលែង ភូមិក្រាំងក្រូច ឃុំក្រាំងដីវ៉ាយ ស្រុកភ្នំស្រួច ខេត្តកំពង់ស្ពឺ ។ ចំណែកជនរងគ្រោះឈ្មោះ ជុំ ឫទ្ធី ភេទប្រុស អាយុ៣៧ឆ្នាំ រស់នៅភូមិកើតហេតុ ។
ប្រភពព័ត៌មានពីប្រជាពលរដ្ឋ បានឲ្យដឹងថា មុនពេលកើតហេតុ ពួកគាត់បានឃើញម៉ូតូ១គ្រឿងខាងលើ បើកដោយក្មេងប្រុសជំទង់ឌុបព្រះសង្ឃ២អង្គ ឆ្លងកាត់ភូមិទិសដៅពីលិចទៅកើត ។ ខណៈមកដល់កន្លែងកើតហេតុ ម៉ូតូបង្កបានជ្រុលបុកជនរងគ្រោះ ដែលកំពុងដើរឆ្លងថ្នល់ពីជើងទៅត្បូង បណ្ដាលឲ្យជនរងគ្រោះ0ដួលបោកនឹងថ្នល់រងរបួសធ្ងន់ ។ ចំណែកអ្នកបើកម៉ូតូ និងព្រះសង្ឃទាំង២អង្គរងរបួសស្រាល ។
ក្រោយពេលកើតហេតុ សមត្ថកិច្ចបានចុះដល់ទីតាំងកើតហេតុ ប្រញាប់បញ្ជូនជនរងគ្រោះមកកាន់មន្ទីរពេទ្យខេត្ត ដើម្បីសង្គ្រោះជីវិត ។ ចំណែកម៉ូតូបង្ក សមត្ថកិច្ចធ្វើការដកហូតយកមករក្សាទុកនៅប៉ុស្តិ៍នគរបាល រង់ចាំដោះស្រាយតាមច្បាប់នៅពេលក្រោយ ៕
ចែករំលែកព័តមាននេះ