ខេត្តកំពត ៖ អស់រយៈពេលជាច្រើនថ្ងៃមកហើយដែលមន្ទីរសាធារណការ និងដឹកជញ្ជូនខេត្តកំពតបានត្រួតពិនិត្យលក្ខណៈបច្ចេកទេសរថយន្តតូចធំ ដើម្បីឲ្យគ្រប់យានយន្តទាំងអស់ដែលប្រជាពលរដ្ឋប្រើប្រាស់មានស្តង់ដាគ្រប់លក្ខណៈបច្ចេកទេសការពារបាននូវគ្រោះថ្នាក់ផ្សេងៗដែលកើតមានឡើងពីយានយន្តដែលមិនគ្រប់លក្ខណៈបច្ចេកទេស ។
លោកពេជ្រ រដ្ឋា អនុប្រធានមន្ទីរសាធារណការ និងដឹកជញ្ជូនខេត្តបានអំពាវនាវឲ្យប្រជាពលរដ្ឋយករថយន្តមកត្រួតពិនិត្យលក្ខណៈបច្ចេកទេស និងទាន់ពេលវេលា ដើម្បីធានានូវការគ្រោះថ្នាក់ផ្សេងៗ ដើម្បីកុំឲ្យមានការផាកពិន័យតាមដងផ្លូវដែលបណ្តាលមកពីខ្វះលក្ខណៈបច្ចេកទេស និងធ្វើឲ្យរំខានដល់ការធ្វើដំណើរនៅថ្ងៃក្រោយ ហើយជាពិសេសលោកបានអំពាវនាវឲ្យបងប្អូនទាំងអស់គោរពច្បាប់ចរាចរណ៍ឲ្យបានគ្រប់ៗគ្នាផងដែរ ។
លោកអនុប្រធានមន្ទីរសាធារណការ និងដឹកជញ្ជូនខេត្តកំពតបានបន្តថា មន្ទីរធ្វើការត្រួតពិនិត្យបច្ចេកទេសយានយន្តក្នុងមួយខែម្តង ឬពីរដង ហើយការពិនិត្យនេះដោយប្រើឧបករណ៍ទំនើបៗគ្រប់គ្រង និងបញ្ជាដោយប្រព័ន្ធកុំព្យូទ័រទាំងអស់មានក្រុមហ៊ុនពីរផ្លាស់ប្តូរវេនគ្នា ។ មុនពេលធ្វើការត្រួតពិនិត្យមន្ទីរបានធ្វើការផ្សព្វផ្សាយតាមសេចក្តីជូនដំណឹងទៅមន្ទីរនានា រដ្ឋបាលស្រុក-ក្រុង-ឃុំសង្កាត់ និងផ្សព្វផ្សាយតាមប៉ុស្តិ៍វិទ្យុFMជាតិ៩មករា ជាមុន ដើម្បីឲ្យពលរដ្ឋអ្នកប្រើប្រាស់យានយន្តគ្រប់ប្រភេទបានដឹងផងដែរ ។ ដោយឡែកការពិនិត្យនៅពេលនេះនឹងត្រូវបញ្ចប់នៅថ្ងៃទី០១ ខែធ្នូ ឆ្នាំ២០១៧ ដូច្នេះលោកសូមអំពាវនាវឲ្យប្រជាពលរដ្ឋរួសរាន់ក្នុងការយកយានយន្តរបស់ខ្លួនមកពិនិត្យលក្ខណៈបច្ចេកទេសឲ្យទាន់ពេលវេលា ។
សូមបញ្ជាក់ថា ចំពោះទិន្នន័យរថយន្តសរុបដែលបានចូលមកធ្វើការត្រួតពិនិត្យលក្ខណៈបច្ចេកទេសក្នុងខេត្តកំពតគិតត្រឹមថ្ងៃទី៣០ ខែវិច្ឆិការនេះមិនទាន់បានទេ ពីព្រោះមន្ត្រីជំនាញមានការមមាញឹកក្នុងការចុះបំពេញការងារជូនពលរដ្ឋដែលម្ចាស់ទោចក្រយានយន្តនិងត្រីចក្រយានយន្ត ៕
ចែករំលែកព័តមាននេះ