អ្នកណាក៏ស្រឡាញ់ និងចង់ថែទាំរថយន្ដរបស់ខ្លួនឲ្យបានល្អ ប៉ុន្តែដឹងទេថា រឿងមួយចំនួនដែលយើងរាល់ថ្ងៃ ដែលធ្លាប់គិតថាវាជាវិធីថែទាំមួយដ៏ស័ក្តិសមនោះ បែរជាអាចបំផ្លាញរថយន្តរបស់យើងទៅវិញ ។
ខាងក្រោមនេះ គឺជាការយល់ខុសរបស់ម្ចាស់រថយន្ដមួយចំនួនលើការថែទាំ ដែលយើងគួរឈ្វេងយល់ដើម្បីចៀសវាងមានហេតុការណ៍បែបនេះកើតឡើង ។
១-ចតរថយន្តនៅក្រោមដើមឈើ ៖
ចំណុចនេះមើលទៅ គឺជាវិធីថែទាំមួយដ៏ត្រឹមត្រូវ ដោយសារដើមឈើមានម្លប់ត្រជាក់ ប៉ុន្តែបើត្រូវចតរថយន្តយូរឆ្លងថ្ងៃ អ្នកត្រូវពិនិត្យមើលបរិវេណផ្លូវនោះជាមុនថា មានស្នាមដានពីអាចម៍បក្សីច្រើនប៉ុនណា ។ បើមានស្នាមដានពាសពេញនោះ អ្នកគួរស្វែងរកកន្លែងចតថ្មីវិញល្អជាង ហើយអាចម៍បក្សីមានជាតិអាស៊ីតម្យ៉ាង ដែលអាចធ្វើឲ្យរថយន្តមានពណ៌ចម្រុះបាន បើសិនជាអ្នកចតវាចោលយូរថ្ងៃ ។ ម្យ៉ាងទៀត គឺអាចនឹងមានមែកឈើធ្លាក់មកសង្កត់រថយន្តទៀតផង ។
ប៉ុន្តែបើគ្មានជម្រើសមែននោះ យ៉ាងណាៗ ក៏ត្រូវចតនៅកន្លែងនេះ គឺបន្ទាប់ពីចតហើយ ចូរប្រញាប់សម្អាតវាដោយប្រើប្រាស់ទឹកថ្នាំរលោងសម្រាប់ពណ៌រថយន្ត និងលាងទឹកឲ្យបានស្អាត ដើម្បីជួយកម្ចាត់ស្នាមសំណក ។ កុំបណ្តោយឲ្យស្នាមទាំងនេះជាប់ស្អិតនឹងរថយន្ត រហូតដល់ត្រូវប្រើទឹកថ្នាំបំបាត់ស្នាម ។
២-ប្តូរប្រេងម៉ាស៊ីនតាមគេប្រាប់ថាល្អ ៖
ការប្តូរប្រេងម៉ាស៊ីនជាប្រចាំរៀងរាល់៦ខែ ឬរៀងរាល់ចម្ងាយ៨ពាន់ ទៅ១ម៉ឺនគីឡូម៉ែត្រ គឺជារឿងដែលគួរតែធ្វើស្រាប់ហើយ ប៉ុន្តែការជ្រើសរើសប្រេងម៉ាស៊ីននេះទៅវិញទេ គឺជាប្រធានបទ ។
មនុស្សភាគច្រើនមិនដឹងថា នឹងជ្រើសរើសប្រេងម៉ាស៊ីនម៉ាកអ្វី បែបណា ក៏ជ្រើសរើសតាមអ្វីដែលបានឮមកថា ម៉ាកនេះល្អ ឬប្រើប្រាស់បច្ចេកវិទ្យាខ្ពស់ ហើយតម្លៃកាន់តែថ្លៃ គឺកាន់តែល្អ ។ ការពិត ប្រេងម៉ាស៊ីនដែលមានតម្លៃថ្លៃ ឬអ្នកដទៃប្រាប់ថាល្អនោះ អាចនឹងមិនស័ក្តិសមជាមួយគ្រឿងម៉ាស៊ីនរថយន្តរបស់លោកអ្នកទេ ។
ហេតុនេះហើយ មុននឹងផ្លាស់ប្តូរប្រេងម៉ាស៊ីន ម្ចាស់រថយន្តគួរតែស្វែងរកទិន្នន័យបន្ថែមទៀតថា រថយន្តរបស់យើងសមស្របជាមួយប្រេងម៉ាស៊ីនប្រភេទណាឲ្យប្រាកដ ។ កុំគិតថា រថយន្តទាំងអស់ គឺដូចៗគ្នា ។
៣-បន្ថែមល្បឿនភ្លាមៗ ៖
នៅពេលកាន់ដៃចង្កូត មនុស្សជាច្រើននឹងមានចិត្តក្តៅជាងធម្មតា ហើយបន្ថែមល្បឿនរថយន្តដោយមិនរង់ចាំយូរឡើយ ឬហៅងាយៗថា បើកបររថយន្តបែបចិត្តក្តៅ ។ អ្នកអាចនឹងមិនបានគិតថា វាគឺជាការបំផ្លាញរថយន្ត ព្រោះឥរិយាបថនៃការបើកបរបែបនេះ នឹងធ្វើឲ្យគ្រឿងម៉ាស៊ីនឆាប់ខូច ឬអន់គុណភាពលឿនជាងធម្មតា ។
៤-ពន្យារពេលពីមួយថ្ងៃទៅមួយថ្ងៃ ៖
ជាញឹកញាប់ យើងអាចនឹងផ្តោតលើការថែទាំរថយន្ត ហើយពន្យារពេលពីមួយថ្ងៃទៅមួយថ្ងៃជាមួយរឿងផ្សេងទៀត ជាពិសេស ការធានារ៉ាប់រងយានយន្ត ។ ពួកគេតែងបណ្តោយឲ្យការធានារ៉ាប់រងយានយន្តផុតកំណត់ ហើយនឹងបន្តការធានារ៉ាប់រងនៅពេលក្រោយ ។ អ្នកខ្លះគិតខ្លួនឯងថា គ្រោះថ្នាក់នៅមិនទាន់កើតលើខ្លួនយើងទេ តែការពិត គ្រោះថ្នាក់វាស្វែងរកយើងគ្រប់ពេលវេលា ។ ដូច្នេះហើយ បើអ្នកពិតជាស្រឡាញ់រថយន្ត គួរតែយកចិត្តទុកដាក់ទៅលើការធានារ៉ាប់រងផងដែរ ៕
ចែករំលែកព័តមាននេះ