ខេត្តកំពង់ឆ្នាំង ៖ ផ្លូវលំមួយខ្សែប្រវែងជាង៣០០ម៉ែត្រ ដែលជាផ្លូវលំក្រាលគ្រួសក្រហម ស្ថិតនៅភូមិពន្លៃ ឃុំពន្លៃ ត្រូវបានសាលាស្រុកបរិបូរណ៍ ទម្លាក់កញ្ចប់ថវិកាកសាង និងអភិវឌ្ឍន៍ឲ្យក្លាយជាផ្លូវក្រាលបេតុង ដើម្បីសម្រួលដល់ការធ្វើដំណើររបស់ប្រជាពលរដ្ឋ ព្រោះជាផ្លូវសេដ្ឋកិច្ចយ៉ាងសំខាន់ផងដែរ សម្រាប់ប្រជាពលរដ្ឋចេញចូលផ្សារពន្លៃ។ សមិទ្ធផលថ្មីមួយនេះត្រូវបានប្រជាពលរដ្ឋរីករាយសាទរជាមួយអាជ្ញាធរមូលដ្ឋាន ដោយបានរួមចំណែកផលប៉ះពាល់បន្តិចបន្តួចដើម្បីបានផ្លូវថ្មីយ៉ាងស្អាតល្អមួយខ្សែនេះ។ លោក អ៊ុយ ប៊ុនធឿន មេភូមិពន្លៃ ឃុំពន្លៃមានប្រសាសន៍ថា ផ្លូវមួយខ្សែនេះមានសារៈសំខានខ្លាំងណាស់ សម្រាប់ប្រជាពលរដ្ឋ ក្នុងធ្វើដំណើរចេញចូលផ្សារពន្លៃ ដែលកាលដើមជាផ្លូវតូចចង្អៀត ដោយសារការដាក់លក់នូវទំនិញតាមផ្ទះប្រជាពលរដ្ឋចេះតែលយចូលដល់ចំណីផ្លូវ។
ប៉ុន្តែក្រោយពេលមានផែនការឈូសឆាយពង្រីក កសាងជាផ្លូវចាក់បេតុងប្រជាពលរដ្ឋ តាមដងផ្លូវបានចូលរួមទាំងអស់គ្នា និងធ្វើឲ្យផ្លូវមួយខ្សែនេះ មានសភាពធំទូលាយ និងរឹងមាំជាងមុនជាពុំខាន។ ជាមួយគ្នានេះដែរ ក្នុងនាមលោកជាអាជ្ញាធរភូមិ តំណាងឲ្យប្រជាពលរដ្ឋទាំងអស់សូមថ្លែងអំណរគុណដល់អាជ្ញាធរស្រុក ដែលបានជួយកែលម្អផ្លូវមួយខ្សែនេះ ពីផ្លូវក្រាលគ្រួសក្រហម មកជាផ្លូវចាក់បេតុងយ៉ាងស្អាត និងមានគុណភាពជាប់បានយូរ ហើយពង្រីកផ្លូវបានធំទូលាយងាយស្រួលធ្វើដំណើរបានស្រួលជាងមុន។ ជុំវិញការកសាងផ្លូវបេតុងមួយខ្សែនេះដែរ លោក ឃួន សៅរុំ អភិបាលស្រុកបរិបូរណ៍ បានមានប្រសាសន៍ថា ពេលចាប់ផ្តើមកសាង មានប្រជាពលរដ្ឋសប្បាយរីករាយ និងសាទរព្រមទាំងបានចូលរូមជាច្រើនណាស់។
ផ្លូវមួយខ្សែនេះ បានចំណាយកញ្ចប់ថវិកាកសាងដោយរាជរដ្ឋាភិបាល ក្នុងគម្រោងកែលម្អ និងអភិវឌ្ឍន៍ផ្លូវក្នុងស្រុកឆ្នាំ២០១៧ ដោយបានដាក់ឲ្យដេញថ្លៃ មានក្រុមហ៊ុនចំនួន៣ បានចូលរួមដេញថ្លៃ ហើយបានទៅលើក្រុមហ៊ុនឈ្មោះ សុខ អាន ក្នុងតម្លៃទឹកប្រាក់ ១៧៩លានរៀល ដោយចាប់ផ្តើមកសាងពីថ្ងៃទី២៨ ខែវិច្ឆិកា និងបញ្ជប់គម្រោងនៅបំណាច់ខែធ្នូ ឆ្នាំ២០១៧ ដែលមានប្រវែង ៣២៧ម៉ែត្រ មានទទឹងបេតុង៤ម៉ែត្រកន្លះ និងមានកម្រាស់១តឹកកន្លះ។ ជាមួយសមិទ្ធផលថ្មីនេះដែរ ក្នុងនាមលោកជាអាជ្ញាធរស្រុកបរិបូរណ៍ សូមអំពាវនាវដល់បងប្អូនប្រជាពលរដ្ឋ សូមចូលរួមថែរក្សាទាំងអស់គ្នា ដោយមិនត្រូវបើកបររថយន្តដឹកធ្ងន់ៗលើសចំណុះលើផ្លូវនោះទេ ពិសេសពេលទើបកសាងហើយថ្មីៗ៕
ចែករំលែកព័តមាននេះ