រាជធានីភ្នំពេញ ៖ បុរសអ៊ិស្លាមអាចយកប្រពន្ធបានលើសពីមួយ ។ តើអាចយកបានប៉ុន្មានទៅ ? នៅក្នុងសាសនាអ៊ិស្លាម គឺច្បាប់បានអនុញ្ញាតឲ្យបុរសយកប្រពន្ធបាន៤នាក់ បើសិនជាគេមានសមត្ថភាព លទ្ធភាពគ្រប់គ្រាន់ក្នុងការរ៉ាប់រងសម្រាប់ក្រុមគ្រួសារ…
រាជធានីភ្នំពេញ ៖ បុរសអ៊ិស្លាមអាចយកប្រពន្ធបានលើសពីមួយ ។ តើអាចយកបានប៉ុន្មានទៅ ?
នៅក្នុងសាសនាអ៊ិស្លាម គឺច្បាប់បានអនុញ្ញាតឲ្យបុរសយកប្រពន្ធបាន៤នាក់ បើសិនជាគេមានសមត្ថភាព លទ្ធភាពគ្រប់គ្រាន់ក្នុងការរ៉ាប់រងសម្រាប់ក្រុមគ្រួសារ និងមានសមត្ថភាពក្នុងការរួមភេទ ហើយអ្វីដែលសំខាន់គឺត្រូវមានយុត្តិធម៌ ដោយមិនត្រូវបែងចែកប្រពន្ធទី២ ទី៣ ឬប្រពន្ធទី៤ឡើយ ។
លោកម៉ាន់សួត អាប់ឌុលឡោះ គ្រូបង្រៀនផ្នែកច្បាប់សាសនាដែលបានបញ្ចប់ការសិក្សាពីប្រទេសអារ៉ាប់នៃទីក្រុងម៉ាឌីណះ បានលើកឡើងកាលពីពេល ថ្មីៗកន្លងមកថា នៅក្នុងសាសនាអ៊ិស្លាម គឺច្បាប់អនុញ្ញាតឲ្យបុរសយកប្រពន្ធបាន៤នាក់បើសិនជាបុរសនោះមានសមត្ថភាព លទ្ធភាពគ្រប់គ្រាន់សម្រាប់ការចាយវាយក្នុងក្រុមគ្រួសារ មានសមត្ថភាពក្នុងការរួមភេទជាមួយគ្នា និងមានយុត្តិធម៌ទាំងការរស់នៅ ដោយមិនត្រូវបែងចែកប្រពន្ធទី១ ប្រពន្ធទី២ទេ ។
លោកម៉ាន់សួត អាប់ឌុលឡោះ ថ្លែងថា៖ «តែបើសិនជាបុរសនោះគ្មានលទ្ធភាព គឺយកបានតែប្រពន្ធមួយទេ ព្រោះសាសនាអ៊ិស្លាម ជាសាសនាដែលផ្ដល់សិទ្ធិ ផ្ដល់តម្លៃឲ្យនារីខ្លាំងជាងអ្វីទាំងអស់ មិនអាចលេងសើចជាមួយនឹងស្ត្រីដោយបំពានសិទ្ធិលើនាងឡើយ តែបើសិនជាបុរសនោះចង់រួមរ័កជាមួយស្ត្រីណាមួយ ត្រូវតែធ្វើតាមច្បាប់ដោយរៀបការត្រឹមត្រូវ ផ្ដល់កិត្តិយសឲ្យខ្លួនឯង និងអ្នកដែលខ្លួនស្រឡាញ់ មិនអាចលេងសើចនឹងច្បាប់សាសនាអ៊ិស្លាមបានទេ គឺត្រូវមានចាស់ទុំដឹងលឺទាំងសងខាង ដើម្បីការពារពេលមានកូនមកកុំឲ្យគ្មានឪពុក»។
ចំណែកអ្នកស្រីស៊ូ អៃនី គ្រូបង្រៀនផ្នែកសាសនានៅវិទ្យាល័យអាល់ហ្សាមេល ខេត្តកំពត ថ្លែងថា៖ «ច្បាប់អ៊ិស្លាមគឺអនុញ្ញាតឲ្យបុរសយកប្រពន្ធ៤ពិតមែន តែត្រូវគោរពតាមលក្ខខណ្ឌរបស់ច្បាប់ មិនមែនចេះតែយកបានទេ»។
១-យុត្តិធម៌ និងទំនួលខុសត្រូវខ្ពស់៖ បុរសនោះត្រូវមានលទ្ធភាពក្នុងការចាយវាយសម្រាប់ក្រុមគ្រួសារ មានលទ្ធភាពក្នុងការផ្ដល់ភាពកក់ក្ដៅ ផ្ដល់សុភមង្គលដល់គ្រួសារទាំង៤ និងមានសមត្ថភាពក្នុងការរួមភេទ មិនអាចយកមកដោយមិនមានលទ្ធភាពទេ ។ និយាយរួមត្រូវមានយុត្តិធម៌ និងទំនួលខុសត្រូវខ្ពស់។
២-មានទ្រព្យសម្បត្តិ និងសមត្ថភាព៖ បើសិនជាគ្មានសមត្ថភាពគ្រប់គ្រាន់ក្នុងការផ្គត់ផ្គង់គ្រួសារ ឬគ្មានសមត្ថភាពក្នុងការបង្កើតកូនចៅទេ បុរសនោះមិនអាចយកប្រពន្ធពីរ បីនាំតែវេទនាដល់ស្ត្រីនោះទេ ។
៣-ត្រូវមានការអនុញ្ញាត្ត៖ មុននឹងយកប្រពន្ធមួយទៀតបានត្រូវសុំការអនុញ្ញាតពីប្រពន្ធទី១សិន ទោះបីជាបុរសនោះជាអ្នកមានទ្រព្យសម្បត្តិក៏ដោយ មិនអាចលួចទៅយកប្រពន្ធទី២បន្ថែមទៀត ដោយគ្មានការសុំអនុញ្ញាតពីប្រពន្ធទី១ឡើយ តែបើសិនជាបុរសនោះមានយុត្តិធម៌ និងសមត្ថភាពគ្រប់គ្រាន់ហើយ ប្រពន្ធក៏មិនអាចហាមឃាត់ស្វាមីរបស់ខ្លួនបានដែរ ព្រោះវាជាសិទ្ធិរបស់ប្តី ។
ពាក់ព័ន្ធនឹងច្បាប់សាសនាអ៊ិស្លាមដែលអនុញ្ញាតឲ្យបុរសយកប្រពន្ធ៤បាននោះ លោក ម៉ានសួត អាប់ឌុលឡោះ បញ្ជាក់បន្ថែមថា ច្បាប់អ៊ិស្លាម គឺអនុញ្ញាតឲ្យបុរសយកប្រពន្ធបានតែ៤នាក់ប៉ុណ្ណោះ បើសិនជាមានសមត្ថភាព មិនមែនអាចយកបាន៧នាក់ទេ ព្រោះព្រះជាម្ចាស់បានមានបន្ទូលថា៖ «ចូរអ្នកឯងយកចុះជាមួយនឹងស្ត្រី២ ,៣ ,៤ តែបើអ្នកឯងមិនយុត្តិធម៌ទេ គឺតែ១បានហើយ» ៕
ចែករំលែកព័តមាននេះ