ខេត្តកំពង់ឆ្នាំង ៖ គិតមកដល់ត្រឹមរសៀលថ្ងៃទី២៨ ខែវិច្ឆិកា ឆ្នាំ២០១៧នេះ ការប្រមូលឯកសារមិនប្រក្រតី ពីជនបរទេស ជាជនជាតិវៀតណាម របស់មន្ត្រីនគរបាលការិយាល័យជនអន្តោប្រវេសន៍ នៃស្នងការដ្ឋាននគរបាលខេត្តកំពង់ឆ្នាំង មានរយៈពេល៦ថ្ងៃហើយ ទើបតែបានឯកសារមិនប្រក្រតីជាង៤០០ច្បាប់ប៉ុណ្ណោះ ក្នុងចំណោមជនជាតិវៀតណាមចំនួន១.៧៣៣ គ្រួសារ។ ហេតុនេះហើយ នាយការិយាល័យជំនាញ សូមអំពាវនាវឲ្យប្រជាពលរដ្ឋ វៀតណាមទាំងអស់ត្រូវប្រញាប់រូតរះយកឯកសារមិនស្របច្បាប់ទាំងនោះ មកប្រគល់ជូនមន្ត្រីជំនាញ ដើម្បីប្តូរយកបង្កាន់ដៃសម្គាល់ជនអន្តោប្រវេសន៍ស្របច្បាប់វិញ។ លោកលោក ប៉ាន់ ឡៃឃាង នាយការិយាល័យគ្រប់គ្រងជនអន្តោប្រវេសន៍ នៃស្នងការដ្ឋាននគរបាលខេត្តកំពង់ឆ្នាំង បានឲ្យដឹងថា យោងតាមអនុក្រឹតលេខ១២៩ អនក្រ ប្រក ចុះថ្ងៃទី១៥ ខែសីហា ឆ្នាំ២០១៧ ស្តីពីការលុបចោល និងការដកហូតឯកសាររដ្ឋបាលកម្ពុជា មិនប្រក្រតីពីជនបរទេស ដែលកំពុងកាន់កាប់និងប្រើប្រាស់ក្នុងទឹកដីកម្ពុជា។
ក្រសួងមហាផ្ទៃ ក៏ដូចជាស្នងការដ្ឋាននគរបាលខេត្ត បានឲ្យមន្ត្រីនគរបាលជនអន្តោប្រវេសន៍ ដកហូតនូវឯកសារមិនស្របច្បាប់ទាំងនោះដូចជា ៖ សៀវភៅស្នាក់នៅ ,សៀវ ភៅគ្រួសារ ,អត្តសញ្ណាញប័ណ្ណសញ្ជាតិខ្មែរ ,សំបុត្រកំណើត ,សេចក្តីចម្លងសំបុត្រកំណើត ,សំបុត្រអាពាហ៍ពិពាហ៍, និងលិខិតឆ្លងដែនជាដើមពីជនជាតិវៀតណាមដែលកំពុងប្រើប្រាស់។ ក្រោយពេលដកហូតរួចជនបរទេសទាំងនោះ ត្រូវដាក់ពាក្យសុំធ្វើជាជនអន្តោប្រវេសន៍ និងបំពេញបែបបទមួយចំនួនថែមទៀត ដើម្បីបានក្លាយជាជនអន្តោប្រវេសន៍ស្រប់ច្បាប់របស់ប្រទេសកម្ពុជា។ ចំពោះជនណាមិនព្រមយកឯកសារ លិខិតស្នាមទាំងនោះមកប្រគល់ឲ្យសមត្ថកិច្ចនគរបាលដើម្បីបំពេញពាក្យស្នើសុំថ្មីនោះទេ គាត់នឹងក្លាយជាជនអន្តោប្រវេសន៍ដោយខុសច្បាប់ជាពុំខាន។
លោកបានបញ្ជាក់ថា ជនជាតិវៀតណាម ដែលត្រូវដកហូតឯកសារមិនប្រក្រតីទាំងនោះមានចំនួន ១.៧៣៣គ្រួសារ ដែលកំពុងរស់នៅក្នុងខេត្តកំពង់ឆ្នាំង។ ក្នុងនាមលោកនាយការិយាល័យ គ្រប់គ្រងជនអន្តោប្រវេសន៍ សូមអំពាវនាវដល់បងប្អូនប្រជាពលរដ្ឋវៀតណាមក៏ដូចជាជនបរទេសផ្សេងទៀត សូមប្រញាប់យកលិខិតមិនប្រក្រតីទាំងនោះមកប្រគល់ឲ្យសមត្ថកិច្ចឲ្យបានរួសរាន់ទាន់ពេលវេលា។ ទោះជាយ៉ាងនេះក្តីតាមការឲ្យដឹងពីប្រជាពលរដ្ឋវៀតណាមមួយចំនួនបានប្រាប់ថា គ្រួសារខ្លះបានបាត់ឯកសារទាំងអស់ ដោយសារការលិចទូក (ទូកស្នាក់នៅ) និងដោយខ្យល់ប៉ើងរហូតពីជញ្ជាំងផ្ទះស្លឹកស្នាក់នៅជាដើម ដោយសារតែពួកគាត់ខ្វះការយល់ដឹងទុកដាក់មិនបានល្អ៕
ចែករំលែកព័តមាននេះ