ខេត្តពោធិ៍សាត់ ៖ រថយន្ដតាក់ស៊ីមួយគ្រឿងបានបើកទៅបុកម៉ូតូដែលកំពុងជិះឌុបគ្នា០៣នាក់បណ្ដាលឲ្យស្ត្រីជាម្ដាយស្លាប់ភ្លាមៗនៅនឹងកន្លែងកើតហេតុ ករណីគ្រោះថ្នាក់ចរាចរណ៍នេះបានកើតឡើងលើកំណាត់ផ្លូវជាតិលេខ៥៥ ភូមិអង្គ្រង ឃុំសំរោង ស្រុកភ្នំក្រវាញកាលពីវេលាម៉ោង០៧និង៥០នាទីព្រឹកថ្ងៃទី២៧ ខែវិច្ឆិកា ឆ្នាំ២០១៧ ។
ជនរងគ្រោះឈ្មោះ អ៊ី ផល អាយុ៦៧ឆ្នាំជាម្ដាយ រីឪពុកឈ្មោះកែវ ឌី អាយុ៥៥ឆ្នាំ និងកូនដែលនៅរស់ជាអ្នកបើកម៉ូតូនោះឈ្មោះមុត ស្ងួន ភេទប្រុស អាយុ៤៧ឆ្នាំ រងរបួសធ្ងន់កំពុងសង្គ្រោះនៅមន្ទីរពេទ្យបង្អែកខេត្តពោធិ៍សាត់ ។ ជនរងគ្រោះទាំង០៣នាក់ឪពុកម្ដាយនិងកូនរស់នៅភូមិឃុំកើតហេតុខាងលើ។ ចំណែកអ្នកបើករថយន្ដឈ្មោះម៉ិច វុទ្ធីហៅរ៉េវ ភេទប្រុស អាយុ៣៧ឆ្នាំ រស់នៅភូមិចំការជ្រៃខាងត្បូងឃុំអន្លង់រាបស្រុកវាលវែង ក្រោយកើតហេតុរត់គេចខ្លួនបាត់ ។
នគរបាលប៉ុស្តិ៍រដ្ឋបាលបានឲ្យដឹងថា នៅព្រឹកនោះរថយន្ដតាក់ស៊ីផ្ដាច់ព្រលឹងមួយគ្រឿង ពណ៌ទឹកប្រាក់ ស្លាកលេខ ពោធិ៍សាត់ ២A-១៣៨៤ ធ្វើដំណើរពីលិចទៅកើត ។ លុះដល់ចំណុចកើតហេតុមិនដឹងជាយ៉ាងម៉េច ស្រាប់តែទៅបុកម៉ូតូជិះគ្នា០៣នាក់ដែលកំពុងធ្វើដំណើរស្របទិសគ្នា បណ្ដាលឲ្យបាក់ដៃបាក់ជើងបែកក្បាលហូរឈាមរងរបួសយ៉ាងធ្ងន់ធ្ងរ ។ មួយសន្ទុះក្រោយមកស្ត្រីជាម្ដាយបានស្លាប់ភ្លាមៗនៅនឹងកន្លែងកើតហេតុ ហើយឪពុកបានស្លាប់តាមផ្លូវខណៈពេលបញ្ជូនទៅសង្គ្រោះនៅមន្ទីរពេទ្យបង្អែកខេត្ត ។
រថយន្ដបង្កគ្រោះថ្នាក់ និងម៉ូតូសមត្ថកិច្ចបានយកទៅរក្សាទុកនៅអធិការដ្ឋាននគរបាលស្រុកភ្នំក្រវាញ ដើម្បីដោះស្រាយទៅតាមនីតិវិធីច្បាប់ ។ ចំណែកសាកសពជនរងគ្រោះបានប្រគល់ជូនបងប្អូនសាច់ញ្ញាតិនៃសពយកទៅធ្វើបុណ្យតាមប្រពៃណី ៕
ចែករំលែកព័តមាននេះ