ខេត្តកំពង់ឆ្នាំង ៖ ផ្លូវលំមួយខ្សែដែលមានប្រវែងសរុបជាង១១គីឡូម៉ែត្រ ស្ថិតក្នុងឃុំជ្រេស ស្រុកកំពង់ត្រឡាច បានទទួលរងនូវការខូចខាត ដោយកើតជាជង្ហុកសំបុកមាន់ មិនអាចឲ្យការធ្វើដំណើរបានស្រួលឡើយ ហើយថ្មីៗនេះ អាជ្ញាធរឃុំ រួមជាមួយក្រុមការងារគណបក្ស ចុះជួយមូលដ្ឋានខាងលើ បានកោះប្រជាពលរដ្ឋប្រជុំដើម្បីដាក់ផែនការរៃលុយពីប្រជាពលរដ្ឋ ដោយយកតម្លៃតាមគ្រួសារ ដែលយានយន្តប្រើប្រាស់ ធ្វើឲ្យពួកគាត់ ហាក់មិនសប្បាយចិត្ត មិនគួរមករៃអង្គាសប្រាក់ពីពួកគាត់ឡើយ ហេតុនេះពួកគាត់សំណូមពរដល់ប្រមុខរាជរដ្ឋាភិបាល សូមមេត្តាជួយជួសជុលផ្លូវក្នុងឃុំជ្រេស ស្រុកកំពង់ត្រឡាចនេះផង។ ប្រជាពលរដ្ឋទាំងនោះបានលើកឡើងថា ផ្លូវលំក្នុងឃុំជ្រេស ដែលតភ្ជាប់ពីផ្លូវជាតិលេខ៥ ចុះទៅមាត់កំពង់ទឹក កាត់តាមភូមិដកស្និត ភូមិជំទាវ និងភូមិតាសំ រួមនឹងផ្លូវខ្វែងទទឹកកាត់ទៅភូមិក្បាលដំរី ស្ថិតក្នុងឃុំជ្រេស មានប្រវែងសរុបជាង១១គីឡូម៉ែត្រ បានរងការខូចខាត កើតជាជង្ហុកសំបុកមាន់ដូចរន្ធបាយខុំ មិនអាចធ្វើដំណើរបានស្រួលឡើយ ហើយត្រូវចំណាយពេលវេលា ក្នុងការធ្វើដំណើរយូរ ហើយបើប៉ះចំត្រូវដឹកអ្នកជំងឺទៅសង្គ្រោះ ឬដឹកស្ត្រីឆ្លងទន្លេជាដើម ពិតជាជួបការលំបាកខ្លាំងជាពុំខាន។
ថ្មីៗនេះ អាជ្ញាមូលដ្ឋានបានកោះហៅ ប្រជាពលរដ្ឋប្រជុំ នៅសាលាឃុំ ហើយដាក់ផែនការរៃប្រាក់ពីប្រជាពលរដ្ឋ ដោយយកលុយតាមផ្ទះដែលមានយានយន្តប្រើប្រាស់ ដូចជាម៉ូតូ១គ្រឿង យក១ម៉ឺនរៀល គោយន្ត១គ្រឿងយក៣ម៉ឺនរៀល រថយន្តធុនតូច យក៥ម៉ឺនរៀល រថយន្តកូរ៉េដឹកកម្មករយក១០ម៉ឺនរៀល និងធំជាងនេះយក១៥ម៉ឺនរៀល ហើយបើផ្ទះខ្លះមានម៉ូតូ៣គ្រឿតយក៣ម៉ឺនរៀលជាដើម ។ ពួកគាត់ហាក់មិនសប្បាយចិត្តសោះ រឿងរៃលុយច្រើនៗបែបនេះ ពួកគាត់កំពុងជួបការខ្វះខាតផង បើតិចតូចដូចប្រាក់បដិភាគឃុំមួយគ្រួសារ១ពាន់រៀល គាត់មិនថាទេ។ ហេតុនេះ គាត់សំណូមពរដល់ប្រមុខរាជរដ្ឋាភិបាល សូមមេត្តាជួយធ្វើផ្លូវក្នុងឃុំជ្រេសនេះផង សូមកុំរៃលុយពីប្រជាពលរដ្ឋបែបនេះ។ ជុំវិញបញ្ហានេះដែរ លោក ឈឹម វុទ្ធា អភិបាលស្រុករលាប្អៀរ បានមានប្រសាសន៍ថា បញ្ហានេះលោកមិនបានដឹងទេ។
តែតាមលោកដឹង កាលពីកិច្ចប្រជុំវេទិការពិគ្រោះយោបល់ថ្នាក់ជាតិកាលពីពេលកន្លងទៅ ក៏មានប្រជាពលរដ្ឋបានលើកសំណូមពរឲ្យជួសជុលផ្លូវនេះដែរ ហើយកាលនោះ ខាងមន្ទីរអភិវឌ្ឍន៍ជនបទ បានទទួលយកសំណើនេះទៅពិភាក្សាហើយ មិនទាន់ដឹងថាបាន ឬមិនបានទេ។ ចំពោះការរៃប្រាក់នោះ លោកថា វាមិនខុសទេឲ្យតែមានការស្ម័គ្រចិត្ត មិនបង្ខំ។ រឿងនេះប្រហែលពួកគាត់ចង់បានការជួសជុលឆាប់ទេដឹង ព្រោះបើរង់ចាំប្រាក់មូលនិធិឃុំ ឬការជួសជុលរបស់មន្ទីរអភិវឌ្ឍន៍ ក្រែងវាយូរ។ លោកក៏បានបញ្ជាកដែរថា ផ្លូវនេះខូចដោយសារកាលពីខែវស្សាមានភ្លៀងធ្លាក់ច្រើន គួបផ្សំនឹងមានរថយន្តដឹកកម្មករជាច្រើនគ្រឿង ទាំងយប់ទាំងថ្ងៃផងទើបបណ្តាលឲ្យរងការខូចខាតបែបនេះ។ ទោះជាយ៉ាងនេះក្តីប្រជាពលរដ្ឋថា មិនគួររៃប្រាក់ច្រើនពីពួកគាត់បែបនេះឡើយ៕
ចែករំលែកព័តមាននេះ