ខេត្តកំពង់ឆ្នាំង ៖ កសិករពីរនាក់ប្តីប្រពន្ធរស់នៅភូមិក្បាលដំរី ឃុំជ្រេស ស្រុកកំពង់ត្រឡាចបានចាប់អាជីពភ្ញាស់កូនមាន់លក់ រកប្រាក់ចំណូលបានច្រើនបង្គួររយៈពេលជាង៣ឆ្នាំបានកែប្រែជីវភាពធូរធាមួយកម្រិត ។ បច្ចុប្បន្ន មានអ្នកខេត្តនានា បានមកទិញកូនមាន់គាត់ដើម្បីយកទៅចិញ្ជឹមមិនលួសពេលឡើយ ។
យោងតាមបទសម្ភាសន៍ជាមួយភ្នាក់ងារកាលរសៀលពីថ្ងៃសៅរ៍កន្លងទៅនេះលោកប៉ែន ចាន់ណា និងភរិយាឈ្មោះ ប៊ី ធីរ៉េន កសិករភ្ញាស់កូនមាន់បានរៀបរាប់ថា គាត់បានប្តូរពីការធ្វើស្រូវប្រាំងដែលមានកូនស្រែតូចមួយ និងធ្វើបានតែមួយរដូវ មកចាប់អាជីពភ្ញាស់កូនមាន់រយៈពេល៣ឆ្នាំហើយ ធ្វើឲ្យជីវភាពគាត់បានធូរធារមួយកម្រិត ។
ការចាប់យកមុខរបរនេះ គឺដោយសារគាត់បានទទួលការណែនាំពីមន្ទីរកសិកកម្មខេត្ត និងការិយាល័យកសិកម្មស្រុកផងដែរដែលបានជួយផ្តល់បច្ចេកទេស ។ គាត់បានបញ្ជាក់ថា គាត់បានទិញពងមាន់ស្រុកពីអ្នកភូមិជិតៗដើម្បីយកមកដាក់ភ្ញាស់ ដោយពងមាន់មួយគ្រាប់ថ្លៃពី៨រយទៅ១ពាន់រៀល ហើយពេលភ្ញាស់បានគាត់លក់ក្នុងតម្លៃកូនមាន់មួយក្បាលថ្លៃ៣៧០០រៀល ក្នុង១ខែគាត់ភ្ញាស់លក់កូនមាន់បានពី២៥០០ ទៅ៣ ០០០ក្បាល មានទាំងអ្នកក្នុងខេត្ត និងអ្នកមកពីខេត្តផ្សេងៗ ដែលគេដឹងតាមរយៈការផ្សព្វផ្សាយរបស់ក្រសួងកសិកម្ម និងតាមរយៈ យូធូប( You Tube) ។
ចំណែកវិធីភ្ញាស់គាត់ប្រើអំពូលភ្លើងអគ្គីសនីដែលជាបច្ចេកទេសពាក់កណ្តាលស្វ័យប្រវត្តិ ព្រោះត្រូវបង្វិលប្រែដោយដៃមួយថ្ងៃពី៣ទៅ៥ដង ។ បច្ចុប្បន្នគាត់មានទូរភ្ញាស់ចំនួន៧ទូ ។ ក្នុងគម្រោងរបស់គាត់ឆ្នាំ២០១៨ គាត់នឹងបង្កើនការភ្ញាស់ឲ្យច្រើនព្រោះតម្រូវការទីផ្សារមានច្រើន ការដើរទិញពងមាន់ពីអ្នកភូមិមិនអាចគ្រប់គ្រាន់ឡើយ ។ ជាចុងក្រោយគាត់អំពាវនាវឲ្យកសិករតាមខេត្តនានា មកជួយទិញកូនមាន់គាត់យកទៅចិញ្ចឹមចុះមិនខុសបំណងឡើយ ព្រោះវាមានសុខភាពល្អៗណាស់ ។
បើតាមការបញ្ជាក់ពីគ្រួសារកសិករខាងលើ បានប្រាប់ពីហានិភ័យផងដែរ ពីបញ្ហាលើការទិញចំណីទីផ្សារ មិនដឹងថា ប៉ះផលិតផលឬចំណីក្លែងក្លាយយ៉ាងម៉េចមិនដឹង កន្លងមកមានម្តងនោះគាត់ទិញចំណីមានស្លាកសញ្ញាដូចគាត់ធ្លាប់ទិញប្រើ មកឲ្យកូនមាន់ស៊ី ស្រាប់តែកូនមាន់ទន់ជើងងាប់អស់៦រយកូន ពេលគាត់ពិនិត្យទើបដឹងថាកូនមាន់មិនស៊ីចំណីនោះ ហើយបានដូរចំណីថ្មីវិញ នេះជាបទពិសោធន៍សម្រាប់គ្រសារគាត់ផងដែរ ៕
ចែករំលែកព័តមាននេះ