រាជធានីភ្នំពេញ ៖ ទៅហូបការមិត្តភក្តិត្រឡប់មកវិញបើករថយន្តបុកគូទរថយន្តដឹកទំនិញធុនធំមួយគ្រឿងចតតាមផ្លូវពេញទំហឹងបណ្តាលឲ្យរថយន្តមួយកំណាត់ខាងមុខខូចខាតអស់ទាំងស្រុងធ្វើឲ្យបុរសជាអ្នកបើករថយន្តស្លាប់នៅកន្លែងកើតហេតុ និងមិត្តភក្តិ៤នាក់ទៀតរងរបួសធ្ងន់ ហេតុការណ៍គ្រោះថ្នាក់ដ៏រន្ធត់នេះបង្កការភ្ញាក់ផ្អើលកាលពីវេលាម៉ោង៧និង៣០នាទីយប់ថ្ងៃទី២៥ ខែវិច្ឆិកា ឆ្នាំ២០១៧ នៅតាមបណ្ដោយផ្លូវជាតិលេខ២ ភូមិក្រាំងស្វាយ សង្កាត់ព្រែកកំពឹស ខណ្ឌដង្កោ ។
ជនរងគ្រោះដែលស្លាប់មានឈ្មោះ ឆៃ សេងហាក់ ភេទប្រុស អាយុ២៦ឆ្នាំ ស្នាក់នៅសង្កាត់ពងទឹក ខណ្ឌដង្កោ ជាអ្នកបើករថយន្ត ។ ចំណែកជនរងគ្រោះរងរបួសទី១-ឈ្មោះ វ៉ា វណ្ណា អាយុ២៧ឆ្នាំ ភេទប្រុស មុខរបរបុគ្គលិកអង្គការ ស្នាក់នៅភូមិតានី ឃុំក្រាំងចេក ស្រុកឧត្ដុង ខេត្ដកំពង់ស្ពឺ, ទី២-ឈ្មោះ ឃុយ ខេមរិន អាយុ២៣ឆ្នាំ, ទី៣-ឈ្មោះ ហែម វាសនា ភេទប្រុស អាយុ២៦ឆ្នាំ និងទី៤-ឈ្មោះ រក្សា វង្ស ភេទប្រុស អាយុ២៧ឆ្នាំ ។
យោងតាមប្រភពព័ត៌មានពីកន្លែងកើតហេតុបានប្រាប់ឱ្យដឹងថា មុនពេលកើតហេតុគេបានឃើញរថយន្ដមួយគ្រឿងម៉ាកឡិចស៊ីស RX300 ពណ៌ស ពាក់ស្លាកលេខ ភ្នំពេញ ២AB-០៩៦២ ធ្វើដំណើរក្នុងរថយន្ដមាន៥នាក់ ទិសដៅពីកើតទៅលិចក្នុងល្បឿនលឿន ស្រាប់តែមកដល់ចំណុចកើតហេតុក៏បានបុកគូថរថយន្ដធុនធំដឹកទំនិញ ពាក់ស្លាកលេខ ស្វាយរៀង ៣A-០៥៦២ ដែលចតនៅតាមផ្លូវបុកពេញមួយទំហឹងបណ្ដាលឱ្យរថយន្តខ្ទេចទាំងស្រុងមួយកំណាត់មុខកៀបអ្នកបើករថយន្ដ និងអ្នកអង្គុយខាងមុខជាប់ក្នុងរថយន្ដ២នាក់ និង៣នាក់ទៀតត្រូវរថយន្ដសង្គ្រោះដឹកទៅព្យាបាលនៅមន្ទីរពេទ្យភ្លាមៗ ដោយឡែករថយន្ដធន់ធំមិនបាននៅកន្លែងកើតហេតុនោះទេបានបើករត់គេចមកដល់រង្វង់មូលគួរស្រូវដីក្រហមទើបចតទុកចោលរួចអ្នកបើកបររថយន្ដចុះរត់គេចខ្លួនបាត់ស្រមោល ។
បើសម្ដីពីជនរងគ្រោះឈ្មោះ ឃុយ ខេមរិន ដែលមានរបួសស្រាលជាងគេបន្តិចបានប្រាប់ឱ្យដឹងថា ពួកគេទាំង៥នាក់បាននាំគ្នាទៅញុំាការមិត្តភក្តិនៅភូមិកើតហេតុខាងលើតែមុនពេលដែលចេញទៅញាំការនោះពួកគេបានទៅផឹកនៅផ្ទះមិត្តភក្តិផ្សេងទៀតអស់ស្រាបៀរ២កេសទើបបាននាំគ្នាទៅញុំាការមិត្តភក្តិតែម្ដងពេលទៅដល់រោងការពួកគេបានចូលហើយក៏ចាប់ផ្ដើមហូបបណ្ដើរ និងផឹកបណ្ដើរ កំពុងតែហូបយ៉ាងសប្បាយទើបតែអស់គ្រឿងក្លែម៨មុខស្រាប់ឈ្មោះ ឆៃ សេងហាក់ ជនរងគ្រោះជាអ្នកស្លាប់ បានខឹងជាមួយម្ចាស់ដើមការក៏បានដើរចេញពីតុឡើងបើករថយន្តតែម្នាក់ឯងចេញទៅបាត់មួយសន្ទុះក្រោយមកក៏ឈ្មោះ ឆៃ សេងហាក់ បានបើកឡានមកយកពួកគេ៤នាក់ដែលកំពុងតែអង្គុយចាំនៅផ្ទះការលុះពេលដែលបើករថយន្តចេញពីររោងកាក៏បានប៉ះដៃចង្កូតជាមួយនឹងម៉ូតូមួយគ្រឿងដែលបើកបញ្ច្រាសទិសគ្នាពេលនោះឈ្មោះ ឃុយ ខេមរិន បានប្រាប់ថា បើកឡានឱ្យស្រួលប៉ះម៉ូតូគេហើយ ស្របពេលនោះមោះ ឆៃ សេងហាក់ បានបួងចង្កូតគេចពីម៉ូតូជ្រុលទៅបុកគូទរថយន្តធន់ធំដែលចតទុកចោលតែម្ដងទៅ ៕
ចែករំលែកព័តមាននេះ