សិក្ខាសាលាបោសសម្អាតមីនឲ្យអស់ទិសដៅឆ្នាំ២០២៥
- កំពង់ឆ្នាំង
ខេត្តកំពង់ឆ្នាំង ៖ លោក សេរី កុសល ទេសរដ្ឋមន្ត្រី និងជាអនុប្រធានទី១ អាជ្ញាធរមីនកម្ពុជា បានថ្លែងទៅកាន់សិក្ខាកាម ក្រុមបោសសម្អាតមីនទាំង១៧ខេត្តក្រុងថា…
ខេត្តកំពង់ឆ្នាំង ៖ លោក សេរី កុសល ទេសរដ្ឋមន្ត្រី និងជាអនុប្រធានទី១ អាជ្ញាធរមីនកម្ពុជា បានថ្លែងទៅកាន់សិក្ខាកាម ក្រុមបោសសម្អាតមីនទាំង១៧ខេត្តក្រុងថា ផែនការជាតិបោសសម្អាតមីនឲ្យអស់ពីកម្ពុជានៅក្នុងឆ្នាំ២០២៥ គឺអាស្រ័យលើអស់លោកជាសិក្ខាកាម និងជាប្រតិបត្តិករទាំងអស់គ្នាដែលមករៀននេះហើយ ។ ដូច្នេះដើម្បីសម្រេចឲ្យបាន យើងត្រូវចេះធ្វើផែនការប្រចាំឆ្នាំឲ្យបានច្បាស់លាស់ និងត្រូវតែអនុវត្តផែនការនោះឲ្យបានសម្រេច ។ មានប្រសាសន៍បែបនេះ ក្នុងសិក្ខាសាលាមួយដែលរៀបចំឡើងនៅសណ្ឋាគារ ផាម៉ា កាលពីរសៀល ថ្ងៃទី២៣ ខែវិច្ឆិកា កន្លងទៅនេះ ។
លោកបានបន្តថា ៖ ក្នុងឆ្នាំ២០១៧ គិតមកដល់ថ្ងៃនេះ ប្រជាពលរដ្ឋយើងបានស្លាប់ដោយសារមីន និងគ្រាប់មិនទាន់ផ្ទុះចំនួន៤៧នាក់ ដែលបញ្ហានេះរាជរដ្ឋាភិបាល និងម្ចាស់ជំនួយរបស់យើង គេមិនចង់ឃើញប្រជាពលរដ្ឋយើងស្លាប់បែបនេះនោះឡើយ ។ ផែនការយើងនៅក្នុងឆ្នាំ២០១៨ ទាំងប្រតិបត្តិករជាតិ និងអង្គការមួយចំនួនដែលជួយយើង ត្រូវបោសសម្អាតមីនឲ្យអស់លើផ្ទៃដី២៥៧គីឡូម៉ែត្រការ៉េ ដែលត្រូវរកលុយប្រមាណ៥២លានដុល្លារ សម្រាប់ធ្វើកិច្ចការងារនេះ ។ សូមមន្ត្រីយើងកុំយកការងារដោះមីនដែលជាការងារមនុស្សធម៌ទៅពាក់ព័ន្ធនឹងរឿងនយោបាយ ព្រោះគ្រាប់មីន និងគ្រាប់មិនទាន់ផ្ទុះ វាមិនស្គាល់គណៈបក្សនយោបាយណានោះទេ ចំណែកអ្នកស្លាប់គឺសុទ្ធតែជាប្រជាពលរដ្ឋខ្មែរ មិនមែនអ្នកនយោបាយនោះឡើយ ។ ខ្ញុំសូមផ្តាំផ្ញើដល់មន្ត្រីយើងទាំងអស់ ពេលត្រលប់ទៅកាន់អង្គភាពវិញ ត្រូវយកចំណេះដឹងក្នុងពេលរៀនសូត្រនេះទៅប្រើប្រាស់ឲ្យមានប្រសិទ្ធិភាព និងត្រូវសហការជិតស្និតជាមួយអាជ្ញាធរមូលដ្ឋាន និងស្ថាបនពាក់ពន្ធ័ ដើម្បីសម្រេចឲ្យបាននូវភារកិច្ចចំពោះមុខ ដែលរដ្ឋាភិបាល និងប្រជាពលរដ្ឋប្រគល់ឲ្យ ។
ដោយឡែក លោក ប្រាក់ សុភាព អគ្គរងអាជ្ញាធរមីនកម្ពុជា បានរាយការណ៍ឲ្យដឹងថា ៖ សិក្ខាសាលានេះ ប្រារព្ធធ្វើឡើងរយៈពេល៣ថ្ងៃ នៅក្នុងសណ្ឋាគារផាម៉ា ក្នុងក្រុងកំពង់ឆ្នាំង ក្នុងគោលបំណងឆ្លើយតបទៅនឹងសេចក្តីណែនាំបច្ចេកទេស ស្តីពីការរៀបចំ និងកសាងផែនការអភិវឌ្ឍន៍រយៈពេលប្រាំឆ្នាំ និងការកែសម្រួលថ្មី ដោយគណៈកម្មាធិការជាតិសម្រាប់ការអភិវឌ្ឍន៍ តាមបែបប្រជាធិបតេយ្យនៅថ្នាក់ក្រោមជាតិ ដែលតម្រូវឲ្យអាជ្ញាធរមីនត្រូវតែកែសម្រួលគោលការណ៍ណែនាំ និងគោលការណ៍ប្រតិបត្តិការស្តីពីការគ្រប់គ្រងកិច្ចប្រតិបត្តិការបោសសម្អាតមីន ដើម្បីរួមចំណែកអភិវឌ្ឍន៍សេដ្ឋកិច្ចកសាងសង្គមជាតិ ៕
ចែករំលែកព័តមាននេះ