ខេត្តស្វាយរៀង ៖ លោក អឹម កុច រដ្ឋលេខាធិការក្រសួងអប់រំយុវជននិងកីឡា មានប្រសាសន៍ថា សាស្ត្រាចារ្យ និស្សិត បញ្ញាវន្តកម្ពុជាត្រូវពួកប្រល័យពូជសាន៍ប៉ុលពតសម្លាប់អស់ស្ទើរតែគ្មានសល់ ដូច្នេះយើងត្រូវការបណ្តុះបណ្តាល និស្សិត មន្ត្រីរាជការវ័យក្មេងដែលជាយុវជនដើម្បីជាអ្នកបន្តវេនដឹកនាំលើវិស័យអប់រំ ទាំងចំណេះដឹង និងវិជ្ជាជីវៈ ខ្ញំសូមអគុណដល់ការគាំទ្រដោយទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន ហៅកាត់ថា JICA ក៏ដូចរាជរដ្ឋាភិបាលជប៉ុន ដែលបានជួយឧបត្ថម្ភគាំទ្រដល់ការងារអប់រំបណ្តុះបណ្តាលបច្ចេកទេស និងវិជ្ជាជីវៈដល់និស្សិត សាស្ត្រាចារ្យ និងថ្នាក់ដឹកនាំវ័យក្មេង នៃព្រះរាជាណាចក្រកម្ពុជា ជាពិសេសអតីតសិក្ខាកាម ថ្នាក់ដឹកនាំវ័យក្មេងទាំង១៤រូប ដែលបានទៅចូលរួមវគ្គបណ្តុះបណ្តាលនៅប្រទេសជប៉ុន ហើយបានចងក្រងឯកសារ និងបានសហការជាមួយJICA ក្នុងការរៀបចំសិក្ខាសាលាដើម្បីចែករំលែកបទពិសោធន៍ និងចំណេះដឹងដែលបានសិក្សាមកជួយអភិវឌ្ឍសមត្ថភាពមន្ត្រីរាជាការគ្រូបច្ចេកទេសនៅក្នុងវិស័យអប់រំ និងអប់រំបណ្តុះបណ្តាលបច្ចេកទេស និងវិជ្ជាជីវៈ។
លោក អ៊ឹម កុច បានមានប្រសាសន៍បែបនេះនៅក្នុងពិធីសិក្ខាសាលាចែករំលែកបទពិសោធន៍ និងចំណេះដឹងស្តីពីការបណ្តុះណ្តាលវិជ្ជាជីវៈនៅប្រទេសជប៉ុននាព្រឹកថ្ងៃទី២៤ វិច្ឆិកា ២០១៧ នៅសាលប្រជុំសាខាកាកបាទក្រហមកម្ពុជា ខេត្តស្វាយរៀង ដែលមានសិក្ខាកាមចូលរួមជាង៦០នាក់។ កញ្ញា Kishida Nami តំណាងការិយាល័យ JICA ប្រចាំនៅកម្ពុជាបានថ្លែងមតិស្វាគមន៍ថា កាលពីថ្ងៃទី១១ ដល់ថ្ងៃទី២៨ ខែកញ្ញា២០១៧ កន្លងទៅនេះរាជរដ្ឋាភិបាលជប៉ុន តាមរយៈការិយាល័យJICA ប្រចាំនៅកម្ពុជា បានបញ្ជូនមន្ត្រីរាជាការចំនួន១៤រូប ក្នុងនោះ១០រូបមកពីរក្រសួងការងារ និងបណ្តុះបណ្តាលវិជ្ជាជីវៈ និង៤រូបមកពីក្រសួងអប់រំយុវជន និងកីឡា ដើម្បីចូលរួមវគ្គបណ្តុះបណ្តាលរយៈពេល១៨ថ្ងៃនៅប្រទេសជប៉ុន តាមរយៈកម្មវិធីបណ្តុះបណ្តាលសម្រាប់អ្នកដឹកនាំវ័យក្មេង ក្រោមប្រធានបទ “ការអប់រំបណ្តុះបណ្តាលវិជ្ជាជីវៈ”។
កញ្ញាបន្តទៀតថា កម្មវិធីបណ្តុះបណ្តាលសម្រាប់អ្នកដឹកនាំវ័យក្មេង គឺជាកម្មវិធីមួយក្នុងចំណោមកម្មវិធីកិច្ចសហប្រតិបត្តិការបច្ចេកទេសរបស់JICA ដែលត្រូវបានបង្កើតឡើងដើម្បីលើកកម្ពស់ និងចូលរួមចំណែកដល់ការអភិវឌ្ឍន៍ធនធានមនុស្សរបស់ប្រទេសកម្ពុជា។ JICA បានចាប់ផ្តើមកម្មវិធីនៅកម្ពុជា ចាប់តាំងពីឆ្នាំ១៩៩៥ ដែលរហូតដល់ពេលនេះមានសិក្ខាកាមដែលជាមន្ត្រីកម្ពុជាវ័យក្មេងចំនួន១,០៣៩
រូប បានចូលរួមកម្មវិធីបណ្តុះណ្តាលនេះនៅប្រទេសជប៉ុន លើវិស័យផ្សេងៗ រួមមាន វិស័យបណ្តុះបណ្តាលវិជ្ជាជីវៈ អប់រំ សុខាភិបាល គោលនយោបាយសេដ្ឋកិច្ច។ល។
កញ្ញាបន្តទៀតថា តាមរយៈការចូលរួមកម្មវិធីនេះសិក្ខាកាមនឹងអាចអភិវឌ្ឍនូវជំនាញ និងចំណេះដឹងរបស់ខ្លួនតាមរយៈការរៀនសូត្រ និងផ្លាស់ប្តូរនូវបទពិសោធន៍ ជាមួយអ្នកជំនាញ និងការចុះអង្កេតផ្ទាល់នៅតាមបណ្តាស្ថាប័នពាក់ព័ន្ធនានានៅប្រទេសជប៉ុន។ កញ្ញា Kishida Nami ក៏បានសំណូមពរដល់សិក្ខាកាមទាំងអស់ប្រើប្រាស់ចំណេះដឹងថ្មីៗនៅក្នុងការងារប្រចាំថ្ងៃ របស់លោកអ្នកក្នុងគោលបំណងដើម្បីលើកម្ពស់ស្ថាប័នរបស់លោកអ្នកក៏ដូចជាការអភិវឌ្ឍន៍វិស័យអប់រំវិជ្ជាជីវៈនៅប្រទេសកម្ពុជាទាំងមូលផងដែរ។ និងមេត្តាកុំស្ទាក់ស្ទើរក្នុងការចែករំលែកបទពិសោធន៍ ចំណេះដឹង និងផ្លាស់ប្តូរព័ត៌មានរវាងគ្នាទៅវិញទៅមក៕ វ៉ាន់ប៊ុនធឿនED176
ចែករំលែកព័តមាននេះ