គ្រោងឆ្អឹងរបស់គោសមុទ្រយក្ស ជាប្រភេទសត្វហ្វូក ទំហំធំបំផុតនៅលើពិភពលោកដែលធ្លាប់បង្ហាញខ្លួន និងផុតពូជអស់រយៈពេលយូរ បានជីកឃើញនៅក្រៅតំបន់ឆ្នេរខាងកើតប្រទេសរុស្ស៊ី កាលពីពេល ថ្មីៗកន្លងមក ធ្វើឱ្យមានការភ្ញាក់ផ្អើលដល់បណ្តាអ្នកឯកទេសជាច្រើន ។
គោសមុទ្រស្ទេលល័រ(Steller) ដែលដាក់ឈ្មោះតាមលោកចច ដាប់បលយូ ស្ទេលល័រ ជំនាញផ្នែកសត្វវិទ្យារបស់អាល្លឺម៉ង់ជាសត្វមួយប្រភេទនៅសមុទ្របេរីង(Bering) ចន្លោះប្រទេសរុស្ស៊ី និងអាឡាស្កា ប៉ុន្តែមានជំនឿថា វារងការបរបាញ់រហូតផុតពូជតាំងពីសតវត្សទី១៨ម្ល៉េះ ។
គ្រោងឆ្អឹងគោសមុទ្រមួយនោះប្រទះឃើញនៅតំបន់អភិរក្សធម្មជាតិកូមានដូស្គី នៅលើប្រជុំកោះ Commander ប្រទេសរុស្ស៊ី កាលពីពេលថ្មីៗកន្លងមក ដោយកប់យ៉ាងជ្រៅខាងក្រោមស្រទាប់ថ្ម និងខ្សាច់ធ្វើឱ្យអាជ្ញាធរពីតំបន់អភិរក្សត្រូវចំណាយពេលយូរជាង៤ម៉ោងក្នុងការជីកយកគ្រោងយ៉ាងប្រុងប្រយ័ត្ន ។ គ្រោងឆ្អឹងនោះមានឆ្អឹងខ្នងខាងក្រោយចំនួន៤៥កង ឆ្អឹងជំនីរចំនួន២៧ឆ្អឹង ក្រៅពីនេះនៅមានឆ្អឹងស្មា និងដៃ ។
អ្នកស្រាវជ្រាវមានជំនឿចិត្តថា គោសមុទ្រស្ទេលល័រមួយក្បាលនេះមានប្រវែងជាង៦ម៉ែត្រ ។
ការរកឃើញគ្រោងឆ្អឹងគោសមុទ្រស្ទេលល័រ ស្ថិតក្នុងសភាពពេញលេញនេះ គឺជាព្រឹត្តិការណ៍ដ៏សំខាន់មួយនៅតំបន់អភិរក្សធម្មជាតិ ៕
ចែករំលែកព័តមាននេះ