ខេត្តសៀមរាប ៖ តាំងពីឆ្នាំ១៩៩៨ ជាពេលដែលកម្ពុជាទទួលបានសន្តិភាពពេញលេញលើផ្ទៃប្រទេស ក្រោមនយោបាយឈ្នះ-ឈ្នះរបស់ប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើឲ្យកិត្តិសព្ទអង្គរខ្ចរខ្ចាយកាន់តែខ្លាំងឡើងទៅកាន់ឆាកអន្តរជាតិ ។
ក្រោមដំបូលសន្តិភាព និងស្ថិរភាពនយោ បាយនេះ រមណីយដ្ឋានអង្គរក៏កំពុងតែបន្តភាពល្បីល្បាញ និងកាន់តែទាក់ទាញភ្ញៀវទេសចរជាតិ និងអន្តរជាតិកាន់តែ ច្រើនឡើងៗឥតឈប់ឈរពីមួយថ្ងៃទៅមួយថ្ងៃ ។ អង្គរធ្លាប់ទទួលបានចំណាត់លេខ១ជាប់គ្នាពីស្ថាប័នវាយតម្លៃធំៗលើលោកដូចជាArchaeo madness, Trip Adrisor, Lonely planet
ជាដើម ។
ប្រាសាទអង្គរវត្តគឺជាសក្ខីភាពមួយដែលបញ្ជាក់លើករណីនេះ ដោយកំណើននៃភ្ញៀវទេសចរឥតថមថយ និងមានតែកើនឡើងនូវចំនួនអ្នកចូលទស្សនា ។ ជាក់ស្តែងជារៀងរាល់ព្រឹក ដែលព្រះអាទិត្យមិនទាន់រះផង ភ្ញៀវទេសចរបានសម្រុកទៅមើលទិដ្ឋភាពថ្ងៃរះនៅប្រាសាទនេះរាប់ពាន់នាក់រួចទៅហើយ ។
នៅរៀងរាល់ព្រឹត្តិការណ៍ថ្ងៃរះចំកំពូលប្រាង្គកណ្តាលនៃប្រាសាទអង្គរវត្ត ភ្ញៀវជាតិអន្តរជាតិរាប់ម៉ឺននាក់បានទៅរង់ចាំទស្សនាពុំដែលខកខានម្តងណាឡើយ ។
ភាពទាក់ទាញភ្ញៀវទេសចរមកកាន់រមណីយដ្ឋានអង្គរនេះ ក្រៅពីភាពល្បីល្បាញនៃភាពអស្ចារ្យរបស់ប្រាសាទផ្ទាល់ខ្លួន នៅមានកត្តាដ៏សំខាន់មួយទៀត ដែលយើងមិនអាចបំភ្លេចបាន នោះគឺសន្តិភាព និងស្ថិរភាពនយោបាយ ដែលរាជរដ្ឋាភិបាលកម្ពុជាបានពុះពារដណ្តើមមកបាន និងកំពុងតែបន្តរក្សាដោយប្រុងប្រយ័ត្នបំផុត ។
នេះក៏ជាមោទនភាពជាតិមួយដែលកូនខ្មែរគ្រប់រូបត្រូវយល់ដឹង និងចូលរួមថែរក្សាទាំងអស់គ្នា ពោលគឺថែរក្សាទាំងស្នាដៃបុព្វបុរសដែលបានបន្សល់ទុក និងចូលរួមថែរក្សានូវសមិទ្ធផលដែលថ្នាក់ដឹកនាំកម្ពុជាបច្ចុប្បន្នបានប្រឹងប្រែងកសាងមកឲ្យបានគង់វង្សយូរអង្វែង ៕
ចែករំលែកព័តមាននេះ