វៀងចន្ទន៍ប្រទេសឡាវជាទីក្រុងទេសចរណ៍មួយស្ថិតនៅក្បែរប្រទេសកម្ពុជា អាចធ្វើដំណើរទៅទស្សនាដោយងាយស្រួលទោះបីជាមានពេលវេលាតិចតួចក៏អាចទៅទស្សនាបានដែរ ។
ទីតាំងទេសចរណ៍ចំនួន១០គួរឱ្យចង់ទៅកម្សាន្តរួមមាន ៖
១-ចេតិយថាតលួង
ថាតលួង ជាវត្ថុដ៏សក្តិសិទ្ធិស្ថិតនៅឆ្ងាយពីទីក្រុងប្រហែល៥គីឡូម៉ែត្រ ។ ជាស្ថាបត្យកម្មរបស់ឡាវ មានលក្ខណៈស្រដៀងចេតិយពណ៌មាសឡោមព័ទ្ធដោយកំផែងតាំងពីសតវត្សទី៣ ដោយទីនោះបើកឱ្យចូលទស្សនាជារៀងរាល់ថ្ងៃតែត្រូវតុបតែងកាយសមរម្យពេលចូលទស្សនា ។
២-ទ្វារជ័យ ឬ«ប្រាទូសៃ »
ទ្វារជ័យគឺជានិមិត្តរូបដ៏សំខាន់របស់ក្រុងវៀងចន្ទន៍ ស្ថិតនៅលើផ្លូវ «ឡានឆាង» កសាងឡើងកាលពីឆ្នាំ១៩៥៧ ជាវិមានអនុស្សាវរីយ៍រំលឹកដល់វីរបុរសក្នុងការតស៊ូទាមទារឯករាជ្យពីប្រទេសបារាំង ។
៣-វត្តស៊ីសាកេត
ជាវត្តដ៏សំខាន់របស់ក្រុងវៀងចន្ទន៍ និងជាវត្តបុរាណមួយបានសាងសង់តាំងពីឆ្នាំ១៨១៨ ដោយព្រះចៅអនុវង្ស តួអង្គវត្តស្ថិតនៅកណ្តាលក្រុង តាមបណ្តោយផ្លូវឡានឆាង ។ អ្វីដែលលេចធ្លោ គឺវិហារបុរាណដ៏ចំណាស់ និងនៅមានស្ថាបត្យកម្មបែបដើមប្រកបដោយភាពស្រស់ស្អាត ។
៤-វិហារព្រះកែវ
វិហារព្រះកែវ ជាទីកន្លែងធ្លាប់ច្នៃប្រឌិតពីគ្រឹះព្រះកែវមរកត ។ វិហារព្រះកែវកាលដើមឡើយសាងសង់ដោយសម្តេចព្រះចៅឆៃសេដ្ឋាធិរាជ ប៉ុន្តែក្រោយមកបានជួសជុលជាថ្មី ស្ថិតនៅតាមបណ្តោយផ្លូវ «សុផានុវង្ស» ។
៥-សារមន្ទីរជាតិឡាវ
ស្ថិតនៅតាមបណ្តោយផ្លូវ«សាមសែនថៃ» ជាទីតាំងទេសចរណ៍នៅវៀងចន្ទន៍ ។ ទីកន្លែងនោះមានរក្សាទុករឿងរ៉ាវប្រវត្តិសាស្ត្រ និងវត្ថុបុរាណរបស់ឡាវយ៉ាងច្រើន ហើយអគារនេះមានស្ថាបត្យកម្មនៅក្នុងយុគសសម័យអាណានិគមបារាំង លាយឡំជាមួយរូបសិល្បៈបែបបុរាណរបស់ឡាវ ។
៦-ឧទ្យានព្រះពុទ្ធ
ជាទីតាំងដ៏សំខាន់មួយនៅក្រុងវៀងចន្ទន៍នៅឆ្ងាយពីក្រុងប្រហែល២៦គីឡូម៉ែត្រ ស្ថិតនៅបរិវេណវត្តសៀងឃួន ជាឧទ្យានសម្បូរដោយរូបចម្លាក់របស់ព្រះវិស្ណុ ព្រះសិវៈ និងព្រះពុទ្ធរូបផ្សេងៗទាំងតូច និងធំ ។
៧-វត្តស៊ីមឿង
ជាវត្តមួយគួរឲ្យចាប់អារម្មណ៍នៅវៀងចន្ទន៍ ស្ថិតនៅបណ្តោយផ្លូវសេដ្ឋាធិរាជ សាងសង់ឡើងនៅឆ្នាំ១៥៦៣ ជាវត្តចំណាស់ ជាស្ថាបត្យកម្មដ៏គួរឲ្យចង់គយគន់ និងជាទីតាំងនៃបង្គោលឡាក់របស់ក្រុង ហើយក៏ជាទីតាំងដ៏សក្តិសិទ្ធិនៃក្រុងវៀងចន្ទន៍ ។ អ្វីដែលគួរឲ្យចាប់អារម្មណ៍គឺព្រះឧបោសថ ។
៨-ផ្សារណាត់រាត្រី
ជាវិធីសាស្ត្រនៃការរស់នៅរបស់ពលរដ្ឋនៅវៀងចន្ទន៍ ដោយពួកគេនិយមដើរកម្សាន្តនៅផ្សារណាត់រាត្រី ។ ភាពលេចធ្លោនៅទីនោះគឺតូបនីមួយៗមានក្រណាត់ពណ៌ក្រហម លក់ទំនិញជាច្រើនប្រភេទមានតម្លៃថោកសមរម្យ ។
៩-ហាងកាហ្វេ «Joma Bakery»
មិនមែនជាទីតាំងដើរកម្សាន្តទេ ប៉ុន្តែហាង «Joma Bakery»ចាត់ទុកថាជាទីតាំងដ៏សំខាន់នៅក្រុងវៀងចន្ទន៍មានចំនួន៣សាខា ដោយសាខា នីមួយៗតុបតែងយ៉ាងស្អាតមានភេសជ្ជៈសម្រាប់ទទួលបានច្រើនរសជាតិតាមចំណង់ចិត្ត។
១០-ក្រុងវ៉ាងវៀង
វ៉ាងវៀងជាទីក្រុងតូច ស្ថិតនៅខេត្តវៀងចន្ទន៍ ឆ្ងាយពីទីក្រុងប្រហែល១៥៦គីឡូម៉ែត្រ ជាទីក្រុងទេសចរណ៍នៅកណ្តាលជ្រលងភ្នំ បានទទួលការពេញនិយមបំផុតពីភ្ញៀវទេសចរនៅលើលោក ព្រោះទីកន្លែងនោះមានតែទេសភាពធម្មជាតិ អ្នកស្រុកអាចរស់នៅជាលក្ខណៈសាមញ្ញដូចមនុស្សសម័យដើម ជាទីក្រុងគួរឱ្យចង់សម្រាកលំហែកាយ និងទស្សនាទេសភាពធម្មជាតិដ៏ប្រណីត ៕
ចែករំលែកព័តមាននេះ