ខេត្តកំពង់ឆ្នាំង ៖ បុរសអ្នករស់នៅលើផ្ទះបណ្តែតទឹកម្នាក់បានស្លាប់ ខណៈចុះទឹកមើលពាងទឹកដាក់ផ្កាប់ដើម្បីទ្រផ្ទះឲ្យអណ្តែតឡើង ប៉ុន្តែជាអកុសលត្រូវបានពាងបឺតស្រូបចូលបណ្តាលឲ្យដាច់ខ្យល់ស្លាប់ ។ ហេតុការណ៍នេះបានកើតឡើងនៅវេលាម៉ោង១និង៣០នាទីរសៀលថ្ងៃទី២៣ ខែវិច្ឆិកា ឆ្នាំ២០១៧ នៅភូមិយុគន្ធរ ភូមិឆ្នុកទ្រូ ស្រុកបរិបូណ៌ ខេត្តកំពង់ឆ្នាំង ។
ជនរងគ្រោះមានឈ្មោះ អម ថា អាយុ៣៧ឆ្នាំ ប្រពន្ឋឈ្មោះ ឈិន សុភា អាយុ៣៣ឆ្នាំ គ្រួសារនេះមានកូន៤នាក់ក្នុងបន្ទុក ។
សមត្ថកិច្ចនគរបាលមូលដ្ឋានបានបន្តថា មុនពេលកើតហេតុ ស្ថានភាពទឹកគោករាក់ បុរសរងរគ្រោះបានអូសផ្ទះទឹកចុះទៅរកកន្លែងទឹកជ្រៅ ពេលកំពុងអូសនោះបានជាប់នឹងទង្គត់ឈើ ទើបបុរសរងគ្រោះបានចុះមុជទឹកទៅដោះ ប៉ុន្តែជាអកុសលពេលចុះទៅនោះត្រូវទំនាញខ្យល់ក្នុងពាងទឹកផ្កាប់ដែលដាក់ទ្រផ្ទះ ស្រូបទាញយកជាប់ក្នុងពាងទឹកមិនអាចរើចេញរួច បណ្តាលឲ្យថប់ដង្ហើមស្លាប់តែម្តង ។ ដោយឡែកប្រពន្ធដែលនៅលើផ្ទះបាត់ប្តីយូពេក កើតការសង្ស័យបានហៅអ្នកជិតខាងឲ្យជួយមើល ហើយក៏បាននាំគ្នាចុះទឹកមើល ឃើញស្លាប់ក្នុងពាងទឹកបាត់ទៅហើយ ។ នៅពេលនោះប្រជាពលរដ្ឋស្រង់សពជនរងគ្រោះពីក្នុងទឹកឡើង ស្របពេលជាមួយគ្នានោះសមត្ថកិច្ចបានចុះដល់កន្លែងកើតហេតុ និងបានពិនិត្យធ្វើកុសល់វិច្ច័យ បានសន្និដ្ឋានថា ជនរងគ្រោះពិតជាស្លាប់ដោយសារលង់ទឹកពិតមែន ហើយបានប្រគល់ជូនក្រុមគ្រួសារតាមប្រពៃណី ។
សូមបញ្ជាក់ នេះមិនមែនជាលើកទី១ទេ ដែលមានករណីពាងទឹកទ្រផ្ទះបណ្តែតទឹកបឺតស្រូបយក មនុស្សបណ្តាលឲ្យស្លាប់ ហេតុនេះសូមបងប្អូនមានមានផ្ទះបណ្តែតទឹក ដោយការប្រើពាងទ្រផ្ទះ សូមមានការប្រុងប្រយ័ត្នទាំងអស់គ្នា ៕
ចែករំលែកព័តមាននេះ