ខេត្តកំពង់ឆ្នាំង ៖ ប្រជាពលរដ្ឋក្នុងស្រុករលាប្អៀរ ពិសេសក្នុងឃុំជ្រៃបាក់ មានមោទនភាពណាស់ សង្ឃឹមថា ក្នុងពេលខាងមុខនេះនឹងបានផ្លូវមួយខ្សែ អមដោយប្រឡាយទឹក ដែលមានប្រវែងជិត៨គីឡូម៉ែត្រ ជាជំនួយឥតសំណង…
ខេត្តកំពង់ឆ្នាំង ៖ ប្រជាពលរដ្ឋក្នុងស្រុករលាប្អៀរ ពិសេសក្នុងឃុំជ្រៃបាក់ មានមោទនភាពណាស់ សង្ឃឹមថា ក្នុងពេលខាងមុខនេះនឹងបានផ្លូវមួយខ្សែ អមដោយប្រឡាយទឹក ដែលមានប្រវែងជិត៨គីឡូម៉ែត្រ ជាជំនួយឥតសំណង របស់ប្រទេសសាធារណៈរដ្ឋប្រជាមានិតចិន ក្រោមគម្រោងរបស់ក្រសួងអភិវឌ្ឍន៍ជនបទ។ លោក សាំង ឡេង ជំទប់ទី១ឃុំជ្រៃបាក់ស្រុករលាប្អៀរ មានប្រសាសន៍ថា ផ្លូវមួយខ្សែដែលចិនកំពុង កសាងនេះ មានប្រវែង ៧.៨០០ម៉ែត្រ មានទទឹង១២ម៉ែត្រ និងមានស្ពានចំនួនពីរកន្លែង ដែលទើបបានដំណើរការកសាងក្នុងជំហាន១ កាលពីថ្ងៃទី១៦ ខែវិច្ឆិកា ឆ្នាំ២០១៧ ដោយកាត់ចេញពីផ្លូវជាតិលេ៥៣ កាត់មកលើភូមិព្រៃលាក់នាង ភូមិអូរកំណប់ និងជំហាន២ គឺចេញពីផ្លូវជាតិលេខ៥ ត្រង់ចំណុចជិតផ្សារជ្រៃបាក់ កាត់ទៅភូមិបាញ់ឆ្គោល ភូមិត្រពាំងអន ភូមិឃ្លៃ និងភូមិត្រពាំងគ។
លោកបានបញ្ជាក់ថា ផ្លូវនេះជាផ្លូវសេដ្ឋកិច្ចយ៉ាងសំខាន់ មិនមែនសម្រាប់អ្នកឃុំជ្រៃបាក់មាន១៦ភូមិប៉ុណ្ណឹងទេ គឺសម្រាប់ស្រុករលាប្អៀរ និងខេត្តផ្សេងផងដែរ។ សព្វថ្ងៃនេះផ្លូវខាងលើ កំពុងរងការខូចខាតខ្លាំងណាស់ បើកម៉ូតូ រថយន្តស្ទើរតែមិនកើត ព្រោះមានក្រឡុកធំៗណាស់។ ពេលនេះ បានក្រសួងអភិវឌ្ឍន៍ជនបទ ដាក់គម្រោងកសាងផ្លូវនេះ ដោយមានជំនួយឥតសំណង ពីប្រទេសចិនផងនោះ ប្រជាពលរដ្ឋពិតជាមានសេចក្តីរីករាយក្រៃលែង ព្រោះបើតាមគម្រោងមានផ្លូវហើយមានទាំងប្រឡាយទឹក ដែលចាក់បេតុង អមផ្លូវទៀតផង ពិតជាមោទនភាពណាស់ សម្រាប់ប្រជាពលរដ្ឋក្នុងឃុំជ្រៃបាក់។
ក្នុងនាមលោកជាក្រុមប្រឹក្សាឃុំជ្រៃបាក់ តំណាងប្រជាពលរដ្ឋក្នុងឃុំទាំងមូល សូមថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល ចំពោះសម្តេចអគ្គមហាសេនាបតីតេជោ ហ៊ុន សែន ក្រសួងអភិវឌ្ឍន៍ជនបទ និងសូមអរគុណ ឯកឧត្តមអភិបាលខេត្ត លោកអភិបាលស្រុក ដែលបានគិតគូរទុក្ខលំបាករបស់ប្រជាពលរដ្ឋ ជួបការលំបាក បញ្ហាផ្លូវធ្វើដំណើរនេះ និងសូមជួនពរ សម្តេច ឯកឧត្តម សូមជូបប្រទះនូវពុទ្ធពរទាំង៤ប្រការគឺ អាយុៈ វណ្ណៈ សុខៈ និងពលៈ កុំបីឃ្លៀងឃ្លាតឡើយ។ សូមបញ្ជាក់ដែរថា ក្នុងគម្រោងកែលម្អផ្លូវលំជនបទ ជាជំនួយឥតសំណងពីរាជរដ្ឋាភិបាល សាធារណរដ្ឋប្រជាមានិតចិន សរុបមានផ្លូវ៦ខ្សែ មានទីតាំងក្នុងខេត្តកំពង់ឆ្នាំង កំពង់ស្ពឺ កំពង់ធំ និងកំពង់ចាម មានប្រវែងសរុប ៣៥,៥គីឡូម៉ែត្រ និងមានស្ពានសរុបប្រវែង១២៥ម៉ែត្រ រយៈពេលសាងសង់២៤ខែ៕
ចែករំលែកព័តមាននេះ