រដ្ឋបាលខេត្តកំពត ប្រារព្ធធ្វើទិវាអនាម័យបរិស្ថានជាតិ២៣វិច្ឆិកា
- កំពត
ខេត្តកំពត ៖ នៅព្រឹកថ្ងៃទី២៣ ខែវិច្ឆិកា ឆ្នាំ២០១៧នេះ នៅរង្វង់មូលក្រុងកំពត រដ្ឋបាលខេត្តកំពត បានប្រារព្ធធ្វើពិធី ទិវាអនាម័យបរិស្ថានជាតិ២៣ វិច្ឆិកា…
ខេត្តកំពត ៖ នៅព្រឹកថ្ងៃទី២៣ ខែវិច្ឆិកា ឆ្នាំ២០១៧នេះ នៅរង្វង់មូលក្រុងកំពត រដ្ឋបាលខេត្តកំពត បានប្រារព្ធធ្វើពិធី ទិវាអនាម័យបរិស្ថានជាតិ២៣ វិច្ឆិកា ២០១៧ ក្រោមប្រធានបទ “តោះនាំគ្នាសម្អាតផ្ទះរបស់យើង”។ ព្រឹត្តិការណ៍ដ៏មានអត្ថន័យនេះមានការចូលរួមពីសំណាក់ ឯកឧត្ដម អ៊ឹង ម៉េងហួរ ប្រធានក្រុមប្រឹក្សាខេត្ត ឯកឧត្ដម ចាន់ ចេស្ដា អភិបាលនៃគណៈអភិបាលខេត្ត ព្រមទាំងមន្ត្រីរាជការ កងកម្លាំងប្រដាប់អាវុធ សិស្សានុសិស្ស និស្សិត ក្រុមយុវជនកាយរិទ្ធ យុវជនកាកបាទក្រហម យុជន ស.ស.យ.ក រួមនឹងប្រជាពលរដ្ឋសរុបប្រមាណ២.០០០នាក់។ លោក ស៊ុយ ធា ប្រធានមន្ទីរបរិស្ថានខេត្តបានបញ្ជាក់ឲ្យដឹងថា៖ ឆ្នាំ២០១៧នេះ ទិវាអនាម័យបរិស្ថានជាតិ ២៣វិច្ឆិកា បានធ្វើឡើង គឺក្នុងគោលបំណងដើម្បីបំផុសចលនាអប់រំប្រជាពលរដ្ឋ សិស្ស និស្សិត ព្រះសង្ឃ កងកម្លាំងប្រដាប់អាវុធ មន្ត្រីរាជការ គ្រប់ជាន់ថ្នាក់ និងអាជីវករ ឲ្យមានការចូលរួមជាសកម្មភាព ទាំងស្មារតី សម្ភារ និងថវិកា ឲ្យបានខ្លាំងក្លាថែមទៀតក្នុងចលនាកិច្ចគាំពារបរិស្ថាន។
ពិសេសគឺការកែប្រែផ្នត់គំនិត និងឥរិយាបថរបស់ប្រជាពលរដ្ឋឲ្យស្រលាញ់ បរិស្ថាន មានស្មារតី ចូលរួមក្នុងកិច្ចគាំពារបរិស្ថាន និងការអភិរក្សជីវចម្រុះ និងការគ្រប់គ្រងធនធានធម្មជាតិប្រកបដោយចិរភាព។ មានប្រសាសន៍ ក្នុងអង្គពិធីនោះ ឯកឧត្ដម ចាន់ ចេស្ដា អភិបាលខេត្ត បានលើកបញ្ជាក់ថា៖ បច្ចុប្បន្នកម្ពុជាយើងកិច្ចការអភិវឌ្ឍន៍ប្រទេសជាតិមានការរីកចម្រើនជាបន្តបន្ទាប់ គឺស្ថិតក្រោមដំបូលនៃសុខសន្តិភាព និងការដឹកនាំរបស់់សម្ដេចតេជោ ហ៊ុន សែន ដ៏ឆ្នើម។ ហើយទន្ទឹមនឹងមានការអភិវឌ្ឍន៍ ក៏យើងទាំងអស់គ្នាមិនបានព្រងើយកន្តើយ និងការថែរក្សាបរិស្ថានផងដែរ។ ជាការជាក់ស្ដើង ទិវាបរិស្ថានជាតិ២៣ វិច្ឆិកា ២០១៧ ដែលបានប្រារព្ធឡើងនាពេលនេះ គឺពិតជាបានបង្ហាញឲ្យឃើញថាយើងទាំងអស់គ្នាស្រលាញ់បរិស្ថាន ស្រលាញ់ភាពស្រស់ស្អាត។ ឯកឧត្តម អភិបាលខេត្តក៏បានកោតសរសើរដល់ថ្នាក់ដឹកនាំមន្ត្រីរាជការនៃមន្ទីរ បរិស្ថានខេត្ត អាជ្ញាធរគ្រប់ជាន់ថ្នាក់ មន្ទីរ អង្គភាពជំនាញ ស្ថាប័នពាក់ព័ន្ធ អង្គការជាតិ អន្តរជាតិនានា បងប្អូនប្រជាពលរដ្ឋគ្រប់មជ្ឈដ្ឋាន ដែលតែងតែបានសហការគ្នា យ៉ាងសកម្មក្នុងបុព្វហេតុស្រលាញ់បរិស្ថាន ស្រលាញ់ភាពស្រស់ស្អាត និងការពារគុណភាពបរិស្ថាន អភិរក្សធនធានធម្មជាតិ និងសោភ័ណភាព នៅខេត្តកំពតនាពេលកន្លងមក។
ក្នុងគោលដៅដើម្បីសុខមាលភាពទាំងអស់គ្នា ក៏ដូចជាគោលដៅនៃការគាំទ្រដល់ ការប្រលងប្រណាំងទីក្រុងស្អាត ដែលខេត្តកំពតត្រូវបានដើរតួនាទីជាម្ចាស់ផ្ទះសម្រាប់បុណ្យសមុទ្រ នាឆ្នាំក្រោយ២០១៨នេះផងដែរ។ ឯកឧត្ដ ចាន់ ចេស្ដា ក៏បានអំពាវនាវដល់់សាធារណៈជន គ្រប់មជ្ឈដ្ឋានទាំងនៅក្នុង ឬក្រៅខេត្តកំពតក្ដី បណ្ដាភ្ញៀវទេសចរណ៍ជាតិ និងអន្តរជាតិនានា ដែលមកកម្សាន្តលើទឹកដីខេត្តកំពត ក៏ដូចក្នុងព្រះរាជាណាចក្រកម្ពុជា បន្តការចូលរួមសម្អាត អនាម័យ សោភ័ណភាពទីក្រុង ទីប្រជុំជនឲ្យបានទាំងអស់គ្នា ស្របតាមគោលការណ៍បរិស្ថានល្អស្អាតបី គឺ ស្អាតដី ស្អាតទឹក និងស្អាតខ្យល់។ បន្ទាប់ពីបញ្ចប់អង្គពិធីឯកឧត្ដម អ៊ឹង ម៉េងហួរ ឯកឧត្ដម ចាន់ ចេស្ដា និងសមាជិកអង្គពិធីទាំងអស់ បានចូលរួមសកម្មភាពដើម្បីបំផុសស្មារតីប្រជាពលរដ្ឋដោយបានសម្អាតអនាម័យបរិស្ថានតាមដងផ្លូវ សួនសាធារណៈ និងព្រែកក្នុងក្រុងកំពតផងដែរ៕
ចែករំលែកព័តមាននេះ