ខេត្តស្វាយរៀង ៖ មានរថយន្ត១គ្រឿងម៉ាកហ៊ីយិនដាយ ពាក់ស្លាកលេខ ព្រៃវែង ៣A-០៥០០ ចំណុះ១៥តោន ដឹកទំនិញលើសទម្ងន់ប្រមាណ២៥តោនទៅ៣០តាន បណ្ដាលឲ្យស្រុតផុងផ្លូវទៅមុខលែងរួច កាលពីរវេលាម៉ោង០៨និង១០នាទីព្រឹក ថ្ងៃទី២៣ ខែវិច្ឆិកា ឆ្នាំ២០១៧ ត្រង់ចំណុចខាងមុខផ្ទះលក់គ្រឿងសង្ហារិម យីហោចែមុំ ផ្លូវបំបែកជាបីជាប់ផ្លូវជាតិលេខ៣១០ ស្ថិតនៅភូមិរូបគោ សង្កាត់ព្រៃឆ្លាក់ ក្រុងស្វាយរៀង ។
បើតាមប្រជាពលរដ្ឋនៅកន្លែងកើតហេតុខាងលើ បានប្រាប់ឲ្យដឹងថា មុនពេលកើតហេតុគេឃើញរថយន្តនោះបើកបរពីរង្វង់មូលរូបគោឆ្ពោះមកទិសខាងជើង ដឹកទំនិញលើសទ្រុងខ្ពស់កប់ពពក លុះមកដល់ចុចកើតហេតុក៏ស្រុតថ្នល់ផុងជាប់រថយន្តទៅមុខលែងរួចតែម្តង ។ មហាជនក៏បានរិះគន់ថា រថយន្តនេះដឹកទំនិញ តាំងពីរាជធានីភ្នំពេញរហូតដល់ខេត្តស្វាយរៀងមានជញ្ជីងបីបួនកន្លែង និងមានមន្ត្រីនគបាលចរាចរដាក់ប៉ុស្តិ៍យាមតាមដងផ្លូវរហូតហេតុអ្វីរថយន្តដឹកទំនិញលើសទម្ងន់មកយ៉ាងរលូនដូច្នេះ អញ្ចឹងបានជាខូចផ្លូវជួសជុលមិនចេះហើយបើដឹកយ៉ាងៗហ្នឹង ហើយពេលប្រជាពលរដ្ឋទូរស័ព្ទហៅអ្នកសារព័ត៌មានឲ្យទៅថតយកព័ត៌មានមានមន្ត្រីនគរបាលមកឃាត់មិនឲ្យថតទៀត ។ សមត្ថកិច្ចយាមតាមដងផ្លូវជាតិលេខ១គួរតែរឹតបណ្ដឹងច្បាប់ចរាចរណ៍ ហើយកុំបណ្ដោយឲ្យឈ្មួញដឹកទំនិញលើសទម្ងន់បែបនេះទៀត ៕
ចែករំលែកព័តមាននេះ