ខេត្តស្វាយរៀង ៖ ប្រជាពលរដ្ឋ០៤ភូមិអំពាវនាវសុំឲ្យអាជ្ញាធរខេត្តមេត្តាជួសជុលផ្លូវមួយខ្សែប្រវែង១៨គីឡូម៉ែត្រឆ្លងកាត់ភូមិបឹងភេ ភូមិម្រាមខាងត្បូង ភូមិត្រពាំងជ័រ ឃុំម្រាម និងភូមិក្រញូង ឃុំមុខដា ស្រុករមាសហែក កំពុងខូចស្ទើរទាំងស្រុងក្លាយជារណ្តៅជង្ហុកល្បាប់…
ខេត្តស្វាយរៀង ៖ ប្រជាពលរដ្ឋ០៤ភូមិអំពាវនាវសុំឲ្យអាជ្ញាធរខេត្តមេត្តាជួសជុលផ្លូវមួយខ្សែប្រវែង១៨គីឡូម៉ែត្រឆ្លងកាត់ភូមិបឹងភេ ភូមិម្រាមខាងត្បូង ភូមិត្រពាំងជ័រ ឃុំម្រាម និងភូមិក្រញូង ឃុំមុខដា ស្រុករមាសហែក កំពុងខូចស្ទើរទាំងស្រុងក្លាយជារណ្តៅជង្ហុកល្បាប់ និងរង្វះទឹកហូកាត់ថ្នល់គ្មានស្ពានលូសម្រាប់ឆ្លង ពិបាកធ្វើដំណើរយ៉ាងខ្លាំង ជាពិសេសពេលក្មេងៗធ្វើដំណើរទៅសាលារៀន និងពេលមានសមាជិកគ្រួសារមានជម្ងឺ ឬស្ត្រីមានផ្ទៃពោះឆ្លងទន្លេពេលយប់ត្រូវបញ្ជូនទៅមន្ទីរពេទ្យដើម្បីសង្គ្រោះ ។
នៅព្រឹកថ្ងៃទី២៣ វិច្ឆិកា ប្រជាពលរដ្ឋក្នុងភូមិទាំងបួនខាងលើបានអំពាវនាវសុំឲ្យអាជ្ញាធរខេត្តជាពិសេសប្រមុខរាជរដ្ឋាភិបាលមេត្តាជួសជុលផ្លូវលំជនបទប្រវែង១៨គីឡូម៉ែត្រនេះផង ។ ប្រភពពីប្រជាពលរដ្ឋបន្តទៀតថា ផ្លូវលំប្រវែង១៨គីឡូម៉ែត្រនេះខូចខ្ទេចខ្ទីដូច្នេះគឺដោយសារឈ្មួញដឹកទំនិញ និងដឹកស្រូវតាមរថយន្តធុនធំមានយីឌុបទាំងខែប្រាំងទាំងខែវស្សា ទើបបាក់ស្រុតថ្នល់ក្លាយជារណ្តៅ ជង្ហុកជ្រៅៗ បែកល្បាប់ រអឹល ដាច់ផ្លូវក្លាយជារង្វះទឹកហូគ្មានស្ពាន គ្មានដាក់លូ កាត់ថ្នល់ ធ្វើឲ្យពិបាកធ្វើដំណើរយ៉ាងខ្លាំង ។ ពេលក្មេងៗទៅសាលារៀនរអឹលដួលប្រឡាក់សំលៀកបំពាក់ ហើយកន្លែងរង្វះទឹកហូប្រជាពលរដ្ឋបានយកកូនឈើ និងបន្ទះក្តាតូចៗធ្វើស្ពានឆ្លងក៏ប៉ុន្តែជួនកាលក្មេងបណ្តើរកង់ និងម៉ូតូតាមស្ពានក្រឡិចរអឹលដួលធ្លាក់ទឹកទទឹកសំលៀកបំពាក់ និងកាបូបសៀវភៅខកខានទៅសាលាក៏មាន ។
បើតាមមន្ត្រីនគបាលឃុំម្រាមបានឲ្យដឹងថា ផ្លូវលំមួយខ្សែនេះមានប្រវែង១៨គីឡូម៉ែត្រចេញពីផ្លូវជាតិលេខ៣១០ឆ្លងកាត់ភូមិក្រញូង ឃុំមុខដា ទៅភូមិត្រពាំងជ័រ ភូមិម្រាមខាងត្បូង និងភូមិបឹងភេ ឃុំម្រាម គឺខូច៥-៦ឆ្នាំមកហើយមិនឃើញមានជួសជុលទេ ហើយការខូចផ្លូវនេះដែរគឺដោយសាររថយន្តធុនធំៗ ដឹកទំនិញលើសទម្ងន់អតិបរិមានៃផ្លូវលំឈ្មួញដឹកទំនិញពីប្រទេសវៀតណាមចូលមកតាមស្រុករមាសហែក ឆ្លងកាត់ទៅខេត្តព្រៃវែងហើយដឹកស្រូវឆ្លងកាត់ទៅប្រទេសវៀតណាម គឺចរាចរណ៍ទាំងខែប្រាំងនិងខែវស្សា គ្មានការជួសជុល ហើយនៅក្នុងរដូវវស្សាឆ្នាំ២០១៧នេះ ផ្លូវគឺខូចស្ទើរទាំងស្រុងតែម្តងមិនឃើញក្រុមប្រឹក្សាឃុំលើកគម្រោងជួសជុលឡើយ ទើបប្រជាពលរដ្ឋសំណូមពរសុំឲ្យអាជ្ញាធរខេត្តចុះមកពិនិត្យមើល និងមេត្តាជួសជុលផ្លូវមួយខ្សែនេះឲ្យប្រជាពលរដ្ឋទាំងបួនភូមិបានធ្វើដំណើរស្រួលដូចភូមិដ៏ទៃផង ៕
ចែករំលែកព័តមាននេះ