រាជធានីភ្នំពេញ ៖ ស្របពេលក្រុមហ៊ុន Facebook បានធ្វើកំណែទម្រង់ខ្លះនោះ ធ្វើឲ្យអាជីវកម្មខ្នាតតូចមួយចំនួនដែលទាញយកប្រយោជន៍ពីបណ្ដាញនេះ កំពុងរងផលប៉ះពាល់។ ទោះបីយ៉ាងណា អ្នកជំនួញវ័យកណ្ដាលមួយរូបដែលកំពុងលេចធ្លោ និងទទួលបានជោគជ័យបានបង្ហើបប្រាប់ពីដំណោះស្រាយដែលកំពុងជាប់គាំងនេះ…
រាជធានីភ្នំពេញ ៖ ស្របពេលក្រុមហ៊ុន Facebook បានធ្វើកំណែទម្រង់ខ្លះនោះ ធ្វើឲ្យអាជីវកម្មខ្នាតតូចមួយចំនួនដែលទាញយកប្រយោជន៍ពីបណ្ដាញនេះ កំពុងរងផលប៉ះពាល់។ ទោះបីយ៉ាងណា អ្នកជំនួញវ័យកណ្ដាលមួយរូបដែលកំពុងលេចធ្លោ និងទទួលបានជោគជ័យបានបង្ហើបប្រាប់ពីដំណោះស្រាយដែលកំពុងជាប់គាំងនេះ ។
លោក ជី សិលា អគ្គនាយកក្រុមហ៊ុន Sabay បានថ្លែងឲ្យដឹងតាមទូរស័ព្ទនាល្ងាចថ្ងៃទី២២ វិច្ឆិកា ថា មានអាជីវកម្មមួយចំនួនបានទទួលផលប្រយោជន៍ពីបណ្តាញទំនាក់ទំនងសង្គមមួយនេះ ដោយម្ចាស់អាជីវកម្មបានបង្កើតគេហទំព័រជាដើម ។ ដោយសារតែបច្ចុប្បន្ន ក្រុមហ៊ុនគ្រប់គ្រងលើបណ្តាញទំនាក់ទំនងសង្គមនេះបានធ្វើកំណែទម្រង់ និងសាកល្បងនៅប្រទេសមួយចំនួន វាធ្វើឲ្យបាត់បង់ចំនួនអ្នកចូលមើល ហើយបើម្ចាស់អាជីវកម្មនោះចង់ឲ្យគេឃើញអាជីវកម្មរបស់ខ្លួនច្រើន ត្រូវធ្វើការបង់ប្រាក់ជាដើម ដូច្នេះហើយបានជារងផលប៉ះពាល់ដោយសារការកែទម្រង់នេះ ។
លោកបន្ដថា សម្រាប់រយៈពេលវែងមានចំណុចវិជ្ជមាន និងអវិជ្ជមាន ។ ដូច្នេះ អ្នកធ្វើជំនួញគួររកមធ្យោបាយផ្សេងៗទៀត ព្រោះការធ្វើជំនួញមិនអាចប្រើប្រាស់តែមួយនោះទេ ។
លោក ជី សិលា ថ្លែងថា ៖« អ្នកគួរតែមានមធ្យោបាយផ្សេងៗទៀតដូចជា ប្រើប្រាស់ Instagram, Line ឬប្រើប្រាស់យុទ្ធសាស្ត្រទីផ្សារផ្សេងៗទៀត ។ យើងក៏គួរត្រៀមប្រើប្រាស់មធ្យោបាយដទៃទៀតដែរ » ។
អ្នកជំនាញផ្នែកបច្ចេកវិទ្យាព័ត៌មានវិទ្យា មកពីសហរដ្ឋអាមេរិក លោក Toun Rithy Michael សហស្ថាបនិកនៃក្រុមហ៊ុន LVLs Media បានថ្លែងថា ការកែទម្រង់របស់ Facebook ពិតជាមានផលប៉ះពាល់ច្រើនដល់អាជីវកម្មខ្នាតតូច ដោយសារបច្ចុប្បន្ន ម្ចាស់អាជីវកម្មមួយចំនួនបានមើលឃើញសារសំខាន់របស់វាខ្លាំងពេក ។
ដើម្បីធ្វើជំនួញ និងពង្រីកសកម្មភាពទីផ្សារ ឲ្យជោគជ័យគួរផ្តោតលើគោលដៅរបស់ខ្លួនជាក់លាក់វិញ ជាជាងចំណាយប្រាក់ច្រើនលើបណ្តាញនេះ ។
លោកបន្តថា ៖« ដើម្បីដោះស្រាយបញ្ហានេះ អ្នកធ្វើអាជីវកម្មដែលធ្លាប់តែពឹងលើប្រព័ន្ធបណ្តាញសង្គមនេះ គួរតែផ្តោតអាជីវកម្មរបស់ខ្លួនតែលើប្រជាជន និងអតិថិជនគោលដៅ ជាជាងចំណាយប្រាក់ច្រើនលើបណ្តាញនេះ» ។ លោកបន្តថា ៖« ខ្ញុំមិនដឹងថា វានឹងប៉ះពាល់រយៈពេលយូរឬឆាប់ទេ ប៉ុន្តែអ្វីសំខាន់ យើងត្រូវកំណត់ទីផ្សាររបស់យើងជំនួសវិញ ដើម្បីឲ្យអាជីវកម្មជោគជ័យ ដោយកុំពឹងផ្អែកខ្លាំងតែលើ Facebook តែមួយមុខ » ៕
ចែករំលែកព័តមាននេះ