រាជធានីភ្នំពេញ ៖ លោកង្វៀន មិញត្រៀត ប្រធានាធិបតីប្រទេសវៀតណាម និងលោកជំទាវជាភរិយា ព្រមទាំងប្រតិភូអមដំណើរជាច្រើនរូបទៀតបានធ្វើដំណើរមកដល់អាកាសយានដ្ឋានអន្តរជាតិភ្នំពេញ ប្រទេសកម្ពុជាហើយ កាលពីវេលាម៉ោង២និង៤៥នាទីថ្ងៃទី២៦ សីហា ២០១០ នៅក្នុងដំណើរទស្សនកិច្ចផ្លូវរដ្ឋ ដើម្បីរឹតចំណងមិត្តភាព បង្កើនកិច្ចសហប្រតិបត្តិការរវាងប្រទេសកម្ពុជា-វៀតណាម ។
អញ្ជើញទទួលស្វាគមន៍យ៉ាងកក់ក្តៅនៅព្រលានយន្តហោះនោះ គេសង្កេតឃើញសម្តេចចៅហ្វាវាំងគង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង និងជាព្រះរាជតំណាងដ៏ខ្ពង់ខ្ពស់របស់ព្រះមហាក្សត្រកម្ពុជា ព្រះបាទនរោត្តម សីហមុនី ព្រមទាំងមន្ត្រីរាជវាំងជាច្រើនរូបទៀត ។
លោកប្រធានាធិបតីវៀតណាម និងគណៈប្រតិភូនឹងបំពេញទស្សនកិច្ចជាផ្លូវរដ្ឋរយៈពេល៣ថ្ងៃចាប់ផ្តើមពីថ្ងៃទី២៦ ដល់២៨ សីហា ឆ្នាំ២០១០ តបតាមការអញ្ជើញរបស់សម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា ។ ដំណើរទស្សនកិច្ចនេះ គឺបង្ហាញពីការរឹតចំណងមិត្តភាព កិច្ចប្រតិបត្តិការឆ្លើយតបទៅនឹងព្រះរាជដំណើរទស្សនកិច្ចរបស់ព្រះមហាក្សត្រខ្មែរ នរោត្តម សីហមុនី រួមទាំងសម្តេចឪ សម្តេចម៉ែ ដែលបានយាងជាផ្លូវរដ្ឋទៅកាន់ប្រទេសវៀតណាម កាលពីខែឧសភា កន្លងទៅ ។
ជាការរឹតចំណងមិត្តភាពឱ្យកាន់តែលេចធ្លោ រវាងប្រទេសទាំងពីរកម្ពុជា-វៀតណាម លើគ្រប់វិស័យនេះលោកប្រធានាធិបតីវៀតណាម ង្វៀន មិញត្រៀត នឹងចូលគាល់ពិភាក្សាជាមួយព្រះមហាក្សត្រខ្មែរ, ចូលក្រាបថ្វាយបង្គំព្រះសង្ឃទាំងពីរគណៈនៃព្រះរាជាណាចក្រកម្ពុជា, ជួបសម្តែងការគួរសម និងពិភាក្សាការងារជាមួយសម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា សម្តេចអគ្គមហាពញាចក្រីហេង សំរិន ប្រធានរដ្ឋសភា និងសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី ។
ចែករំលែកព័តមាននេះ